Hori Mos Kendo Igen Kuom Jehova

1. En penjo mane ma Ruoth Daudi nopenjo ma moko kuomwa bende nyalo penjore?

WADUTO wagombo dak e ngima ma mor kendo mokuwe. Onge ng’ama winjoga maber sama en gi parruok. Kata kamano, nitie kinde ma parruok nyalo bembowa ahinya. Nitie sama kata mana jotich Jehova nyalo penjore penjo ma Ruoth Daudi nopenjo niya: “Abiro parora nyaka karang’o, ka chunya okuyo pile ka pile?”​—Zab. 13:2.

2. Gin ang’o ma wabiro wuoyoe e sulani?

² Kata obedo ni ok wanyal tieko parruok chuth, nitie gik ma pod wanyalo timo mondo kik parruok obembwa. E sulani, wadwaro nono moko gik ma nyalo kelonwa parruok. Kae to, wabiro nono gik moko auchiel ma nyalo konyowa bedo gi chuny mokuwe sama wanyagore gi chandruoge.

GIK MA NYALO KELONWA PARRUOK

3. Gin ang’o ma nyalo kelonwa parruok, to be nitie gima wanyalo timo e moko kuom gigo?

³ Nitie gik mang’eny ma nyalo miyo wabed gi parruok, kendo moko kuomgi onge gima wanyalo timoe. Kuom ranyisi, onge gima wanyalo timo e nengo gik moko ma siko ka idho malo higa ka higa kaka nengo mag chiemo, lewni, kod udi. Bende, ok wanyal ng’eyo ni jotich wetewa kata joskul wetewa biro yondhowa mondo girwakwa e timbegi maricho nyadidi. To bende ok wanyal tieko timbe mahundu ma timore e alworawa. Waromoga gi chandruoge kaka mago nikech wadak e piny ma ji mang’eny ok luw puonj mag Muma. Satan ma en e nyasach pinyni ong’eyo ni nitie joma “parruok mag pinyni” nyalo monogi tiyo ne Jehova. (Mat. 13:22; 1 Joh. 5:19) Omiyo, ok en gima kawowa gi wuoro neno ka pinyni opong’ gi gik ma kelo ne ji parruok!

4. Parruok ahinya nyalo miyo watim ang’o?

⁴ Gik ma miyowa parruok nyalo chando chunywa ahinya ma chop kama gin e ma wasiko ka waparogi seche duto. Kuom ranyisi, wanyalo chako parore ni ok wabi yudo pesa moromowa ng’iewo gik ma ochuno e ngima, kata ni wanyalo tuore ma walal tich. Bende, wanyalo luor ni di po ka waketho chik Jehova sama waromo gi tem. Machiegnini, Satan biro miyo joge omonj jotich Nyasaye, kendo mano nyalo chando chunywa nikech wakia ni wabiro timo nang’o e kindeno. Wanyalo penjore ni, ‘Be parruok e wi weche kaka mago en gima rach?’

5. En ang’o ma Yesu ne temo wacho ka nowacho ni: “Weuru bedo gi parruok”?

⁵ Yesu nonyiso jolupne niya: “Weuru bedo gi parruok.” (Mat. 6:25) Be Yesu ne temo wacho ni kik waparre e wi gimoro amora? Ooyo! Par ni nitie jotich Jehova moko ma bende ne nigi parruok to Jehova pod noherogi ahera.b (1 Ru. 19:4; Zab. 6:3) Gima Yesu ne temo wacho en ni ok onego waparre ahinya e wi chandruoge ma waromogo ma chop kama gimonowa tiyo ne Jehova. Kare gin ang’o ma wanyalo timo sama wan-gi parruok ahinya?​—Ne sanduk ma wacho ni, “Gik Minyalo Timo.”

GIK MOKO AUCHIEL MA NYALO KONYOWA BEDO GI CHUNY MOKUWE

6. Ka luwore gi Jo-Filipi 4:6, 7, en ang’o ma nyalo miyo wabed gi chuny mokuwe?

⁶ (1) Lem kinde duto. Jokristo ma chunygi chandore nyalo yudo yueyo ka gikwayo Jehova e lamo koa e chunygi. (1 Pet. 5:7) Jehova nyalo dwoko lamogi kuom miyogi “kuwe mar Nyasaye ma loyo ng’eyo duto [mar dhano].” (Som Jo-Filipi 4:6, 7.) Jehova miyo wabedo gi chuny mokuwe kokalo kuom teko mar roho maler.​—Gal. 5:22.

7. En ang’o monego waket e paro sama wakwayo Jehova e lamo?

⁷ Sama iwuoyo gi Jehova e lamo nyise gik moko duto ma ni e chunyi. Nyise achiel kachiel gima chandi kendo kaka iwinjo e chunyi. Ka po ni nitie yo minyalo loyogo chandruogno, kwaye mondo omiyi rieko kod teko mar tiyo gi yorno. To ka po ni onge gima inyalo timo e wi chandruogno, kwa Jehova mondo okonyi kik ibed gi parruok mang’eny e wi wachno. Sama inyiso Jehova achiel kachiel gik ma chandi, ibiro neno maler kaka odwoko lamo magi. Ka po ni Jehova ok odwoko lamoni ma piyo, chunyi kik jogi. Jehova dwaro ni inyise achiel kachiel gima chandi, kendo kik iol gi timo kamano.​—Luka 11:8-10.

8. En ang’o ma wiwa ok onego owilgo sama wakwayo Jehova e lamo?

⁸ Sama inyiso Jehova gik ma chandi, kik wiyi wil gi goyone erokamano. Ber paro gueth mang’eny ma waseyudo kata bed ni wakalo e chandruoge. Seche moko chunywa nyalo nyosore ma chop kama wakia kata ni wawach ne Jehova ang’o. Kata kamano, par ni Jehova winjo kata mana weche machuok ma wanyalo nyise ni, ‘Jehova konya!’​—2 We. 18:31; Rumi 8:26.

9. En ng’a ma nyalo miyowa resruok madier?

⁹ (2) Gen kuom rieko mar Jehova, to ok kuom riekoni iwuon. Nitie kinde ma Jo-Asuria nomonjo Jo-Juda. Jo-Juda ne ok dwar ni Jo-Asuria ologi, omiyo ne gikwayo kony koa kuom Jo-Misri. (Isa. 30:1, 2) Jehova nonyisogi ni yiero ma ne gitimono ne dhi kelonegi mana masira. (Isa. 30:7, 12, 13) Jehova nonyiso Jo-Judago kokalo kuom janabi Isaya kaka ne ginyalo yudo resruok. Jehova nowachonegi kama: “Kugeno kuoma kendo kuhoru mos, to unuyud teko.”​—Isa. 30:15b.

10. Gin kinde kaka mage ma wanyalo nyisoe ni wageno Jehova gadier?

¹⁰ Ere kaka wanyalo nyiso ni wageno kuom Jehova? Ne ane ranyisi ma luwogi: Wawach ni iyudo tich moro maber, kata kamano, obiro kawo thuoloni mang’eny kendo chocho chenrogi mag lamo Jehova. Kata, jatich wadu moro ma ok en jatich Jehova mobatisi ochako nyisi hera mar kisera. Kata, achiel kuom joodu owachoni ni obiro were kodi chuth ka po ni idhi nyime tiyo ne Jehova. E moro ka moro kuom wechego, biro dwarore ni itim yiero. Kata kamano, bed gadier ni ka igeno Jehova, to obiro konyi mondo itim yiero mowinjore. (Mat. 6:33; 10:37; 1 Kor. 7:39) Penjo en ni, be ibiro yie gi kony ma Jehova biro miyi?

11. Gin ranyisi kaka mage ma yudore e Muma ma nyalo konyowa siko ka wan-gi chuny mokuwe sama jomoko kwedowa?

¹¹ (3) Puonjri kuom jotich Jehova machon. Muma oting’o sigendni ma nyalo konyowa ng’eyo kaka wanyalo bedo gi chuny mokuwe kendo geno kuom Jehova. Sama isomo sigendnigo, tem neno gima nokonyo jotich Jehova machon-go bedo gi chuny mokuwe kata obedo ni ne gikalo e akwede. Kuom ranyisi, ka ne Sanhedrin okwero joote ni kik gichak gilendi, joote ne ok oyie gi wachno. Kar mano, ne giwacho gi chir niya: “Nyasaye e ma nyaka wawinj nikech en e jalochwa, kar winjo dhano.” (Tich 5:29) Kata mana bang’ ka nosechwadgi, chuny jootego ne ok onyosore. Nikech ang’o? En nikech ne ging’eyo ni Jehova ne konyogi. Jehova ne mor kodgi, omiyo, ne gidhi nyime yalo wach maber. (Tich 5:40-42) Kuom ranyisi, Stefano ne okuwe mos ka nochiegni nege, kendo ‘lela wang’e ne chal gi mar malaika.’ (Tich 6:12-15) Nikech ang’o? En nikech nong’eyo ni Jehova ne mor kode.

12. Ka luwore gi 1 Petro 3:14 kod 4:14, ang’o momiyo wanyalo siko ka wamor kata sama isandowa?

¹² Joote ne ni gadier chuth ni Jehova ne ni kodgi. Jehova nomiyogi teko mar timo honni. (Tich 5:12-16; 6:8) Wan to Jehova pok omiyowa teko ma kamano. Kata kamano, kokalo kuom Wachne, Jehova nyisowa ni ka di po ni wachandore nikech tim makare, omor kodwa kendo roho mare biro konyowa. (Som 1 Petro 3:14; 4:14.) Omiyo, kar keto pachwa e tembe ma wabiro romogo e kinde ma biro, onego waket pachwa kuom gima wanyalo timo sani mondo wabed gadier ni Jehova nyalo resowa kendo ritowa e tembe ma wanyalo romogo. Mana kaka jolup Yesu mokwongo, wan bende onego wabed gadier e wi weche ma ne Yesu osingo niya: “Abiro miyou weche kod rieko ma onge ja akwede kata achiel ma nyalo tamore, kata kwedo.” Nomedo singonwa niya: “Ubiro reso ngimau ka unano.” (Luka 21:12-19) Bende, wiyi kik wil ni Jehova ong’eyo kata mana weche matindo tindo e wi jotichne mosetho komakore kode. Nikech ong’eyo weche duto ma notimrenegi, obiro chierogi.

13. Ere kaka nono ranyisi mar joma ne ok ohore kendo ne ok ogeno Jehova nyalo konyowa?

¹³ Wanyalo puonjore bende kuom joma ne ok ohore kendo ma ne ok ogeno kuom Jehova. Nono ranyisi mag jogo biro konyowa mondo wan be kik watim gik ma ne gitimo. Kuom ranyisi, ka ne ruodh Jo-Juda miluongo ni Asa ochako locho, nogeno Jehova ka ne oganda lweny moro maduong’ omonje kendo Jehova nokonye moloyo oganda lwenyno. (2 We. 14:9-12) Kata kamano, ka ne ruodh Israel miluongo ni Baasha obiro monje gi oganda lweny moro matin, Asa nochulo jolweny mag Siria mondo obi okonye kedo, kar manyo kony kuom Jehova mana kaka nosetimo e kinde mokalo. (2 We. 16:1-3) Bang’e, ka nochiegni tho, nobedo matuo ahinya kendo ne ok ogeno Jehova mondo okonye.​—2 We. 16:12.

14. En ang’o ma wanyalo puonjore kuom gima Asa notimo?

¹⁴ Mokwongo okwongo, Asa ne ogeno Jehova mondo okonye loyo chandruoge ma ne en-go. To bang’e Asa noweyo geno kuom Jehova kendo notimo gik moko kaka en owuon e ma nodwaro. Ne nyalo nenore e wang’ dhano ni paro ma Asa nong’ado mondo Jo-Siria okonye kedo gi Jo-Israel ne en paro maber. Kata kamano, Jo-Juda nobedo gi kuwe mana kuom kinde machuok. Jehova nonyiso Asa kama kokalo kuom janabine: “Nikech ne iketo genoni kuom ruodh Siria kendo ne ok igeno Jehova Nyasachi, oganda lweny mar ruodh Siria osebwodho e lweti.” (2 We. 16:7) Onego wan bende wabed motang’ mondo sama wang’ado paro e wi wach moro, kik wagenre wawegi. Kar mano, onego wagen kuom Jehova kokalo kuom Wachne. Kata sama wan-gi wach moro monego wang’adie paro mapiyo, dwarore ni wakuwe mos kendo geno kuom Jehova mondo okonywa.

15. En ang’o ma wanyalo timo sama wasomo Muma?

¹⁵ (4) Mak ndiko moko e wiyi. Sama isomo ndiko moko e Muma ma nyiso gimomiyo dwarore ni ibed gi chuny mokuwe kendo geno kuom Jehova, tem mako ndikogo e wiyi. Gima nyalo konyi mako ndikogo en somogi gi dwol ma winjore, ndikogi piny, kendo nonogi kinde ka kinde. Jehova nonyiso Joshua mondo osom bug Chik gi dwol mapiny odiechieng’ gotieno e ka nonyalo bedo gi rieko. Weche ma nodhi somo e bug Chikno ne dhi konye bende loyo luoro mora amora sama notayo jotich Nyasaye. (Jos. 1:8, 9) Weche ma yudore e Wach Nyasaye nyalo miyo wabed gi chuny mokuwe kata sama waromo gi chandruoge ma nyalo miyowa parruok kod luoro.​—Zab. 27:1-3; Nge. 3:25, 26.

16. Ere kaka Jehova tiyoga gi joma ni e kanyakla mondo okonywa bedo gi chuny mokuwe kendo geno kuome?

¹⁶ (5) Bed machiegni gi jotich Nyasaye. Jehova tiyoga gi owetewa gi nyiminewa mondo okonywa bedo gi chuny mokuwe kendo geno kuome. Sama wan e chokruok, wayudoga jip kokalo kuom twege migolo, paro ma owete gi nyimine chiwo, kachiel gi mbaka ma wanyalo goyo gi owetewa kod nyiminewa. (Hib. 10:24, 25) Bende, wanyalo yudo jip ahinya sama wanyiso owete gi nyimine ma wageno e kanyakla gik ma chando chunywa. “Wach maber” moa kuom osiepwa ma wageno, nyalo konyowa nyagore gi parruok kod pek ma waromogo.​—Nge. 12:25.

17. Ka luwore gi Jo-Hibrania 6:19, ere kaka geno ma wan-go e wi Pinyruoth nyalo miyo wachung’ motegno kata sama wakalo e chandruoge mang’eny?

¹⁷ (6) Med tego geno ma in-go. Geno ma wan-go mar Pinyruoth chalo “kaka nanga mar meli mosiro ngimawa.” Okonyowaga chung’ motegno sama wakalo e chandruoge kata sama wan-gi parruok. (Som Jo-Hibrania 6:19.) Par matut kuom singo mag Jehova ma kinde ma biro kama gik ma miyowa luoro ok nobedie kendo. (Isa. 65:17) Temie paro ka in e piny kama chandruoge kod achiedh nade ok nochak obedie kendo. (Mika 4:4) Teg geno mari kuom wuoyo gi jomoko e wi piny manyien. Tim duto minyalo mondo iland wach maber kendo ilok ji obed jopuonjre. Kitimo kamano, to ibiro bedo “gadier chuth kuom genono nyaka giko.”​—Hib. 6:11.

18. Gin chandruoge mage ma pod wabiro romogo e kinde ma biro, to en ang’o ma biro konyowa nyagore kodgi e yo maber?

¹⁸ Kaka pinyni medo sudo e gikone, wabiro bedo gi chandruoge mang’eny ahinya ma nyalo miyowa parruok. Ndiko mar higa 2021 nyalo konyowa nyagore gi chandruoge ma waromogo ka wan gi chuny mokuwe, kendo onyalo konyowa geno kuom Jehova kar geno kuom tekowa wawegi. E higani duto, weuru wanyis kokalo kuom timbewa ni wayie kuom singo mar Jehova ma wacho ni: “Kugeno kuoma kendo kuhoru mos, to unuyud teko.”​—Isa. 30:15.