“Tinde Ahero Tij Lendo!”

MOR MA NE AN-GO NOLAL

Gima lit en ni ka nachako bedo rawera, winjruok ma ne an-go gi Jehova nochako dok chien. Ka narango jo skul wetena, naneno ka gin thuolo timo gimoro amora ma gidwaro, kendo an be nagombo bedo kaka gin. Nawinjo ka aol gi chike mag jonyuolna kod ngima mar bedo Jakristo. Nachako paro ni lamo Jehova en tich matek ahinya. Nang’eyo ni Jehova nitie, kata kamano, nachako bedo mabor kode.

Ne ok aweyo lendo chuth, kendo natemoga mondo alendie kata mana matin mondo ayudie gima dami Jehova. Ka ne adhiga lendo ne ok aikraga maber, to mano nomiyo ne ok yotna chako mbaka kata chwalo mbaka gi ng’ato. Nikech mano, ne ok ayudga nyak, kendo tij lendo koro ne ok mora. Napenjoraga ni, ‘Ere kaka ng’ato nyalo tiyo tijni juma ka juma, dwe ka dwe, to pod omor amora?’

Ka nachopo higni 17, nagombo ahinya dak kenda ma onge ng’ama chika. Omiyo, nafundo gigena kendo nawuok dala ma adhi dak e piny Australia. Ne lit ne jonyuolna ahinya ka ne gineno ka awuok dala. Wachno nochando chunygi ahinya, kata kamano, pod ne gigeno ni nadhi dhi nyime tiyo ne Jehova.

Ka ne an Australia, winjruokna gi Jehova nomedo dok chien. Nachako bara ne chokruoge. Namako osiep gi rowere moko ma ne mor dhi e chokruok e odhiambo achiel, to odhiambo machielo gidhi e math kod miel e club. Ka aparo kindego, aneno ni adier, tienda achiel ne ni e adiera to machielo ne ni e piny. Ngima ma kamano ne ok kelna mor kata matin.

WACH MORO MAKENDE MA NOLOKO PACHA

Bang’ higni ariyo kama, naromo gi nyaminwa moro ma ne wabedogo kuom kinde machuok. Ne ok ong’eyo ni thuolo ma ne wabedo kodeno, nomiyo achako nono ngimana kendo. Ne wadak e ot moro gi nyimine abich ma ne pok okendi, kendo ne wagwelo jarit-alwora gi jaode miluongo ni Tamara mondo gidag kodwa kuom juma achiel. Seche ma ne jaod Tamara odich e weche mag kanyakla, Tamara ne dong’ga kodwa kendo ne wajabedoga gi kinde ma jaber ahinya kode. Nobolore ahinya kendo wuoyo kode ne yot. Nawuoro ahinya ka nafwenyo ni kara ng’ato nyalo bedo mamor ka omako osiep gi ng’at moketo pache duto e tij Jehova!

Tamara noil ahinya kendo hera ma noherogo adiera kod tij lendo nomiyo an be agombo bedo kaka en. Nomor nikech notimo duto monyalo e tij Jehova, an to ne ok amor nikech ne amiyo Jehova mana gima ayudo. Paro makare ma ne en-go e tiyo ne Jehova kod mor madier ma ne en-go nomulo ngimana ahinya. Ranyisineno nomiyo aparo adiera moro ma yudore e Ndiko, ma wacho ni: Jehova dwaro ni joma tiyone, ‘otine ka gimor’ kendo ka ‘giwero wende mag mor.’​—Zab. 100:2.

ACHAKO HERO TIJ LENDO KENDO

Nagombo bedo mamor kaka Tamara. Kata kamano, mondo nabed gi mor ma kamano, ne nyaka atim lokruoge madongo e ngimana. Timo kamano nokawa kinde, kata kamano, bang’e nachako timo lokruoge moko matindo tindo. Nachako timo ikruok ne tij lendo, kendo najabedoga painia ma konyo kinde ka kinde. Timo kamano nokonya mondo alo luoro ma najabedogo e tij lendo kendo koro nanyalo lendo gi chir. Kaka namedo tiyo gi Muma e tij lendo, e kaka namedo bedo mamor gi tijno. Mapiyo nono, nachako bedo painia makonyo dwe ka dwe.

Nachako mako osiep gi joma hikgi opogore opogore, kendo ma ne dhi maber e adiera. Ranyisigi maber nokonya mondo anonra mondo ane ni en ang’o mokwongo ma nonego aket e ngimana. Nachako bedo gi chenro maber mar somo Muma pile ka pile. Namedo bedo mamor gi tij lendo kendo gikone nabedo painia mapile. Bang’ higni mang’eny, nawinjo ka achako bedo mamor, kendo koro namor bedo e kanyakla.

NAYUDO NG’AMA NE DHI KONYA E TIJ PAINIA E NGIMANA DUTO

Bang’ higa achiel, naromo gi Alex. Ne ong’won kendo nohero Jehova gi chunye duto kaachiel gi tij lendo. Ne en jakony-tich kendo nosebedo painia kuom higni auchiel. Alex nosedhiga lendo kuonde ma jolendo dwarore ahinya e piny Malawi. Ka ne en kuno, noromo gi jomisonari moko ma noketone ranyisi maber kendo nojiwe ni odhi nyime keto Pinyruodh Nyasaye obedo mokwongo e ngimane.

Ne wakendore e higa mar 2003, kendo wasebedo ka watiyo ne Jehova kuom thuolowa duto nyaka sani. Wasepuonjore gik mathoth, kendo Jehova oseguedhowa e yore mang’eny ahinya.

JEHOVA NOMEDO GUEDHOWA

Ka nochopo higa mar 2009, nomiwa migawo mar bedo jomisonari e piny moro matin miluongo ni Timor-Leste, ma yudore e chulni mag Indonesia. Dhowa nomoko kendo ne waluor, kata kamano, ne wamor gi migawono. Dweche abich bang’e, ne wachopo e taon maduong’ mar pinyno miluongo ni Dili.

Ngima ma ne wadhi dakie kuno ne dhi pogore ahinya gi ngima ma ne wadakie Australia. Ne nyaka wang’i gi timbe kod kido mag joma nodak kuno, dhok ma ne giwacho, chiemo ma ne gichamo, kendo dak kaka gidak. Ka ne wan e tij lendo ne wajoromo gi joma odhier ahinya, ma sombgi ni piny, kendo ma chandore. Ne waromo bende gi ji mathoth ma nosegayudo hinyruok nikech lwenje ma ne gorega kuno.a

Tij lendo to ne ber ahinya! Kuom ranyisi, ne waromo gi nyako moro ma jahigni 13 miluongo ni Maria ma nokuyo ahinya.b Noyudo min Maria oa tho higni moko matin mokalo, kendo Maria ne ok hinyga neno wuon-gi. Maria ne ok ong’eyo gima nodwa timo e ngimane mana kaka nyithindo mathoth ma nodak kuno. Aparo odiechieng’ moro ma noywak kolero kaka nowinjo e chunye. Kata kamano, ne ok ang’eyo gima nowacho nikech pok napuonjora dhok ma ne giwacho maber. Nalamo Jehova ka akwaye mondo okonya kaka nanyalo jiwe, kendo nachako somone ndiko moko ma ne nyalo jiwe. Bang’ higni moko machuok, naneno kaka adiera nochako loko ngima Maria, yo ma nonenogo gik moko, kod pache. Nobatise kendo sani otayo jopuonjrege owuon. Tinde Maria mor nikech en gi jotich Jehova molwore kendo ma dewe gadier.

Jehova oseguedho tijwa mar lendo e piny Timor-Leste. Thoth jolendo gin ma nobatisi kuom higni apar mokalo, kendo ng’enygi sani gin jopainia, jokony-tich, kata jodongo e kanyakla. Moko kuomgi tiyo e ofise milokoe dhok kendo gikonyo e loko buge ma lero Muma e dhok miwacho e pinyno. Abedoga mamor ahinya sama aneno kaka giwer e chokruoge, kaka gimor, kendo kaka gidhi nyime timo dongruok e tij Nyasaye.

NGIMA MABERIE MOLOYO

Ngima ma ne wadakie ka wan Timor-Leste nopogore ahinya gi ma ne wadakie Australia. Kata kamano, mano e ngima ma ne berie moloyo. Seche moko ne wajaidhoga mtoka ma iye ofundore gi ji, moting’o rech motwo, kendo moting’o alode ma ji oa ng’iewo e chiro. Kendo e odiechienge moko ne wanyaloga tayo puonjruok mag Muma e ute matindo, maliet ahinya, ma dier ot bende samoro olil, kendo ma gwen ringoe koni gi koni. Kata obedo ni ne waromo gi pek ma kamago, ne ajawachoga e chunya ni, ‘To ma ngima mamit manadeni!’

Ka aparo chien, agoyo ne jonyuolna erokamano ahinya nikech ne gitimo matek mondo gipuonja weche Jehova kendo sira, kata obedo ni ne ok en gima yot, to ahinya-ahinya e kinde ma ne an rawera. Mano nomiyo aneno adiera ma yudore e Ngeche 22:6. Wuonwa gi minwa mor ahinya kodwa, kendo gimor neno kaka watiyo ne Jehova. Chakre higa mar 2016, Alex osebedo ka en jarit-alwora e bwo alwora mar ofis ma Australasia.

Ng’at mong’eya sani ok nyalo yie ka anyise ni chon ne ok ahero tij lendo. Tinde ahero tij lendo. Nafwenyo ni kata obedo ni wanyalo kalo e pek moko, mor madier to yudore mana kuom tiyo ne Jehova gi chunywa duto. Kuom adier, higni 18 ma asebedo ka atiyo ne Jehova ka wan gi Alex, e higni ma asebedoe mamor e ngimana duto. Koro ang’eyo ni weche ma Daudi nondikogi gin adier: “Jogo duto ma manyo kar buok iri nobed mamor; giniwer pile gi mor. . . . Kendo jo ma ohero nyingi nobed mamor ahinya nikech in.”​—Zab. 5:11.