Be Ing’eyo?

Be Jo-Rumi ne yiega mondo oyik joma ne giguroga e yath, kuom ranyisi, kaka nogur Yesu?

JI MANG’ENY osesomo weche ma nyiso ni nogur Yesu e yath, kae to notho e yadhno e kind jomecho moko ariyo. (Mat. 27:35-38) Kata kamano, nitie joma ok oyiega ni Muma wacho adier sama owacho ni ringre Yesu nolos maber mi oyiki e liel moro.​—Mar. 15:42-46.

Moko kuom joma kwedo buge mag Injili oseketo kiawa ka be ne inyalo chiw thuolo mondo olos ringre ja mahundu ma nonegi, kendo yike e liel. Giwacho ni ringre joma kamago ne itimonegiga gima opogore. Jafwamb weche miluongo ni Ariel Sabar nondiko e gaset mar Smithsonian kolero kama parono noaye. Nondiko kama: “Joma nineno ka joricho ahinya e ma niguroga e yath, kendo jolony moko ne wachoga ni Jo-Rumi ne ok nyal yie mondo oyik ringre joma kamago e yor luor.” Jo-Rumi ne dwaroga timo ne jo mahundu ma ne gikumo achaya maduong’. Kuom mano, thothne ne giweyoga ringre joma kamago e yath mondo le mag bungu ochamgi. Kae to bang’e, ringre ma nodong’ e yath ne ibolo e liel gi ringre mamoko.

Kata kamano, gik machon mokuny nyiso wach moro mopogore ma notim ne moko kuom ringre Jo-Yahudi ma nonegi. E higa mar 1968, ne oyud choke mag ng’at moro ma nonegi e kinde Jokristo mokwongo. Noyud chokego e liel moro mar Jo-Yahudi but Jerusalem. Chokego ne ni e sanduk moro. Achiel kuom chokego ne en mar ofunj tielo. Chogono nogur e yath kitiyo gi chuma ma borne ne en inji 4 gi nus. Sabar nowacho kama: “Chogono ne en mar ng’at miluongo ni Yehochanan, kendo chogono nokonyo e tieko ywaruok ma nosebetie kuom kinde malach e wi gima buge mag Injili wacho e wi yik Yesu e liel.” Wach maduong’ en ni “chok Yehochananno nochiwo ranyisi maber mag Jo-Yahudi ma Jo-Rumi noyie mondo oyiki bang’ ka noseneggi e ndalo mag Yesu.”

Paro mopogore opogore pod nyalo betie e wi ofunj tielono ka luwore gi yo ma nogurgo Yesu e yath. Kata kamano, gima nenore maler en ni nitie jo mahundu moko ma noyik e yor luor kendo ringregi ne ok owit awita e liel. Omiyo, wanyalo bedo gadier sama Muma wacho ni noyik ringre Yesu e liel. Chogo ma nokunyno riwo lwedo gima Muma wacho.

Gima duong’ moloyo en ni Jehova nosekoro ni ne idhi yik Yesu e liend jamwandu moro, to onge gima nyalo mono gima Nyasaye owacho chopo kare.​—Isa. 53:9; 55:11.