Med Tego Genoni Kaka Jakristo

1. En geno mane ma Jehova osemiyowa?

JEHOVA osemiyowa geno ma jaber mar ngima ma nyaka chieng’. Jomoko nigi geno mar dak e polo nyaka chieng’ kaka chuech mag roho kendo ka gin gi del ma ok nyal tho. (1 Kor. 15:50, 53) Ji mang’eny to nigi geno mar dak e piny kae nyaka chieng’ ka gimor kendo ka gin gi ngima maber. (Fwe. 21:3, 4) Bed ni wageno dak e piny kata e polo, wamor ahinya gi geno ma wan-go.

2. Genowa otenore kuom ang’o, to nikech ang’o?

² Wach motigo e Muma ni “geno” tiende en “bedo gadier ni gik mabeyo biro timore.” Wanyalo bedo gadier gi geno ma wan-go nikech Jehova e mosingonwago. (Rumi 15:13) Wang’eyo gima Jehova osingonwa kendo wang’eyo ni Jehova timoga duto mowacho. (Kwan 23:19) Wan gadier ni Jehova nigi gombo kod teko mar timo duto mosingo. Kuom mano, genowa ok otenore kuom gik miparo apara, to kar mano, otenore kuom gik ma wan-go gadier chuth.

3. Ang’o ma wabiro nono e sulani? (Zaburi 27:14)

³ Wuonwa manie polo oherowa kendo odwaro ni wagene. (Som Zaburi 27:14.) Sama wan gi geno motegno kuom Jehova, mano biro konyowa nano ka wan gi chir kod mor e tembe ma waromogo sani kod ma wanyalo romogo e kinde mabiro. We wanon ane kaka geno ma wan-go ritowa. Mokwongo, wabiro neno kaka geno marwa chalo gi nanga mar meli kod ogudu. Kae to wabiro neno kaka wanyalo medo tego geno ma wan-go.

GENOWA CHALO GI NANGA

4. Geno chalo nade gi nanga? (Jo-Hibrania 6:19)

⁴ E barua ma ne Paulo ondiko ne Jo-Hibrania, nopimo genowa gi nanga. (Som Jo-Hibrania 6:19.) Nikech Paulo ne jadhiga wuoth kotiyo gi meli, nong’eyo maber ni nanga konyo meli mondo yamo kik tere mabor. Chieng’ moro ka ne en e meli, yamo mager notugore. Noneno ka jokwang’ meli diro nanga e i pi mondo apaka kik ter melino kuonde ma kite madongo nitie. (Tich 27:29, 39-41) Mana kaka nanga konyo meli mondo ochung’ kar tiende, e kaka genowa konyowa chung’ motegno mondo apaka mag pinyni kik terwa mabor gi Jehova. Genowa miyo wabedo gi chuny mokuwe sama wakalo e chandruoge madongo nikech wang’eyo ni weche biro dhi maber machiegnini. Par ni Yesu nowacho ni ne idhi sandwa. (Joh. 15:20) Omiyo, paro matut e wi geno ma wan-go e kinde mabiro konyowa chung’ motegno e ngimawa kaka Jokristo.

5. Ere kaka geno nokonyo Yesu sama ne tho ochome?

⁵ Par ane kaka geno nokonyo Yesu chung’ motegno kata obedo ni tho malit nochome. Chieng’ Pentekost 33, jaote Petro nowuoyo e wi weche ma nokor e bug Zaburi ma nyiso gimomiyo Yesu ne nigi chuny mokuwe sama nisande. Wechego wacho kama: “Abiro dak gi geno; nimar ok ibi weya e Liel, bende ok iniwe ng’ati momakore kodi mondo ringrene otow. . . . Ibiro miyo apong’ gi mor maduong’ e nyimi.” (Tich 2:25-28; Zab. 16:8-11) Kata obedo ni Yesu nong’eyo ni nodhi tho, ne en gi geno motegno ni Nyasaye ne dhi chiere kendo ni nodhi bedo kanyachiel gi Wuon-gi e polo kendo.​—Hib. 12:2, 3.

6. Owadwa moro nowacho ang’o e wi geno?

⁶ Geno ma wan-go kaka Jokristo osekonyo owete gi nyimine mang’eny nano. Ne ane ranyisi mar Owadwa Leonard Chinn, ma nodak e piny England. E kinde Lweny Mokwongo mar Piny Ngima, notueye nikech notamore dhi e lweny. Kuom dweche ariyo, notueye kar kende, kae to bang’e nomiye kum mar timo tich matek ahinya kuom kinde moko. Nondiko kama: “Gik ma notimorena nokonya neno kaka geno nyalo konyowa nano. Wan gi ranyisi mag Yesu, joote, kod jonabi, kaachiel gi singo manie Muma ma konyowa. Magi duto miyo wabedo gi geno mar kinde mabiro kendo tegowa mondo wadhi nyime nano.” Geno e nanga ma nosiro Leonard, to wan bende, genono nyalo sirowa.

7. Ere kaka tembe nyalo tego geno ma wan-go? (Jo-Rumi 5:3-5; Jakobo 1:12)

⁷ Sama wanano e bwo tembe kendo neno kaka Jehova konyowa, genowa medo bedo motegno. (Som Jo-Rumi 5:3-5; Jakobo 1:12.) Genowano koro bedo motegno moloyo kaka nochalo kinde ma ne wahango puonjore adiera. Satan dwaro ni tembe ohewwa, kata kamano, Jehova nyalo konyowa loyo tembego duto.

GENOWA CHALO GI OGUDU

8. Geno chalo nade gi ogudu? (1 Jo-Thesalonika 5:8)

⁸ Muma pimo genowa gi ogudo bende. (Som 1 Jo-Thesalonika 5:8.) Jalweny rwakoga ogudu e wiye mondo jasike kik hinye. E lweny ma wakedoe gi Satan, dwarore ni warit pachwa mondo Satan kik hinywa. Satan thung’owa gi tembe kod paro maricho mondo ochoch pachwa. Mana kaka ogudu rito wi jalweny, e kaka geno ma wan-go rito pachwa mondo wasik ka wamakore gi Jehova.

9. Ang’o ma jatimorega sama ji onge gi geno?

⁹ Geno ma wan-go mar ngima ma nyaka chieng’ biro konyowa timo gik moko gi rieko kendo timo yiero mabeyo. To komachielo, ka genowa odok chien, kendo wayie mondo gombo mag ringruok opong’ pachwa, mano nyalo monowa keto pachwa kuom ngima mochwere. Par ane ranyisi mar Jokristo moko ma nodak Korintho. Ne giweyo bedo gi geno e wi chier, ma en mise mar yie mar Jokristo. (1 Kor. 15:12) Paulo nowacho ni joma onge geno odich mana gi ngima ma sani kende. (1 Kor. 15:32) E kindewagi, ji mang’eny ma onge gi geno kuom singo mag Nyasaye timo gimoro amora ma ginyalo mondo gibed mamor. Wan to waketo genowa kuom gik ma Nyasaye osingonwa. Genowa chalo gi ogudu ma rito pachwa kendo okonyowa mondo kik wadonj e timbe ma nyalo ketho winjruokwa gi Jehova.​—1 Kor. 15:33, 34.

10. Ere kaka geno nyalo konyowa mondo wakwed paro marach ni ok wanyal moro Jehova?

¹⁰ Geno nyalo konyowa mondo kik wapar ni onge tiende moro Jehova. Kuom ranyisi, ng’ato nyalo wacho e chunye ni: ‘An to ok anyal yudo ngima mochwere. Ok an ng’at maber kendo ok anyal rito chike Nyasaye.’ Par ni achiel kuom osiepe Ayub ma ne odhi hoye ne nigi paro ma chalo kamano. Nyinge ne en Elifaz. Nonyiso Ayub kama: “Dhano adhana en ang’o ma dowuondre ni oler?” E wi mano, nowacho kama kuom Nyasaye: “Ne! Nyasaye ok ogeno kata mana malaikene, kata mana polo bende ok ler e wang’e.” (Ayub 15:14, 15) To mago doko miriambo madongo! Par ni Satan e ma chwalo paro ma kamago. Ong’eyo ni kiketo pachi kuom gik ma kamago, to genoni biro dok chien. Kwed miriambo kaka mago kendo iket pachi kuom singo mag Jehova. Bed gadier chuth ni Jehova dwaro ni idag nyaka chieng’ kendo obiro konyi.​—1 Tim. 2:3, 4.

MED TEGO GENO MA IN-GO

11. Ang’o momiyo ok onego waol gi rito kinde ma Nyasaye biro chopoe singoge?

¹¹ Ok en-ga gima yot rito genowa mondo osik kotegno. Wanyalo ol gi rito singo mag Nyasaye. Kata kamano, Jehova en Nyasaye mochwere kendo yo monenogo seche opogore gi kaka wan wanene. (2 Pet. 3:8, 9) Obiro timo dwache e yo maberie moloyo, kata kamano, onyalo timo mano e sa mopogore gi ma wan wawegi waparo. Ang’o ma nyalo konyowa siko ka wan gi geno motegno sama wahore ka warito mondo Nyasaye ochop singoge?​—Jak. 5:7, 8.

12. Ka luwore gi Jo-Hibrania 11:1, 6, ere kaka Muma tudo geno gi yie?

¹² Wabiro bedo gi geno motegno ka wasiko machiegni gi Jehova ma e Jal ma miyowa geno. Kuom adier, Muma wacho ni ng’at ma nigi geno bende bedo gi yie ni Jehova nitie kendo ni en e “jachiw-mich ne jo ma manye gi kinda.” (Som Jo-Hibrania 11:1, 6.) Kaka wamedo bedo gadier ni Jehova nitie, e kaka wamedo bedo gadier ni obiro timo gik moko duto mosesingo. We wanon ane yore moko ma wanyalo tegogo winjruokwa gi Jehova kendo tego genowa.

13. Ere kaka wanyalo sudo machiegni gi Nyasaye?

¹³ Wuo gi Jehova e lamo, kendo isom Wachne. Kata obedo ni ok wanyal neno Jehova, wanyalo sudo machiegni kode. Wanyalo wuoyo kode e lamo ka wan gadier ni obiro winjowa. (Jer. 29:11, 12) Wawinjo Nyasaye sama wasomo Wachne kendo paro matut kuom gik ma wasomo. Sama wasomo kaka Jehova norito joma nomakore kode e kinde machon, genowa medo bedo motegno. Gik moko duto manie Wach Nyasaye ‘ne ondiki mondo opuonjwa, mondo kokalo kuom sinani ma watimo, kendo kokalo kuom hoch moa e Ndiko, wabed gi geno.’​—Rumi 15:4.

14. Ang’o momiyo onego wapar matut kuom singo ma Jehova osechopo ne jotichne mamoko?

¹⁴ Par matut kaka Jehova osechopo singoge. Par ane gima Nyasaye notimo ne Ibrahim kod Sara. Ne gichopo higni ma koro ok ne ginyal bedo gi nyithindo. To e ma Nyasaye nosingonegi ni ne gidhi yudo nyathi. (Cha. 18:10) Ibrahim nowinjo nade bang’ mano? Muma wacho ni ne “obedo gi yie ni ne odhi bedo wuon ogendni mang’eny.” (Rumi 4:18) Kata obedo ni ne nenore ni mano ne en gima ok nyalre, Ibrahim ne ni gadier ni Jehova ne dhi chopo singone. To mano e gima Jehova notimo. (Rumi 4:19-21) Ranyisi kaka mago puonjowa ni wanyalo geno ni kinde duto, Jehova biro chopo singoge kata obedo ni weche chalo nade.

15. Ang’o momiyo onego wapar gik ma Jehova osetimonwa wawegi?

¹⁵ Par gik ma Jehova osetimoni. Par ane kaka gik mosing e Wach Nyasaye osekonyi in iwuon. Kuom ranyisi, Yesu singo ni Wuon-gi biro miyi gik moko duto ma dwarore ni ibedgo e ngima. (Mat. 6:32, 33) Bende, Yesu singoni ni Jehova biro miyi rohone maler sama ikwaye. (Luka 11:13) Jehova osebedo ka chopo singogo. Samoro inyalo paro singo mamoko bende ma Jehova osechopo e ngimani. Kuom ranyisi, osingo ni obiro weyoni kethogi, obiro hoyi, kendo obiro miyi chiemb chuny. (Mat. 6:14; 24:45; 2 Kor. 1:3) Sama iparo kuom gik ma Nyasaye osetimoni e ngimani, mano biro tego geno ma in-go ni obiro timo gik mosingo e kinde mabiro.

BED MAMOR GI GENO MA IN-GO

16. Ang’o momiyo geno en mich ma jaber?

¹⁶ Geno ma wan-go mar ngima ma nyaka chieng’ en mich ma jaber moa kuom Nyasaye. Wan gadier chuth gi genono. Genono chalo gi nanga ma konyowa chung’ motegno sama wanano e bwo tembe, sama wakalo e sand, kata sama tho ochomowa. Bende, genono chalo gi ogudu ma rito pachwa mondo okonywa kwedo gik maricho kendo makore gi gik makare. Geno ma wan-gono miyo wasudo machiegni gi Nyasaye kendo waneno maler kaka Nyasaye oherowa. Sama watego geno ma wan-go, wayudo ber lilo.

17. Ang’o momiyo geno ma wan-go miyowa mor?

¹⁷ E barua ma jaote Paulo nondiko ne Jo-Rumi, nojiwogi kama: “Moruru nikech geno.” (Rumi 12:12) Paulo ne nyalo bedo mamor nikech ne en gadier ni ka nodhi nyime makore motegno gi Nyasaye, ne odhi yudo ngima ma nyaka chieng’ e polo. Wan bende, wanyalo bedo mamor gi geno ma wan-go nikech wan gadier ni Jehova biro chopo singoge. Mana kaka jandik-zaburi nondiko, “ng’at mamor en ng’at . . . mogeno Jehova Nyasache, ma . . . en ja adiera kinde duto.”​—Zab. 146:5, 6.