Puonjri Bedo gi Paro Kaka mar Jehova gi Yesu

1-2. Hero Jehova oriwo timo ang’o, to ere kaka Yesu nonyiso mano maler?

“NYAKA iher Jehova Nyasachi gi chunyi duto, gi ngimani duto, gi tekoni duto, kendo gi pachi duto.” (Luka 10:27) Yesu nong’eyo maler ni mano e wach maduong’ ma Chike Musa ne jiwo. Hero Jehova gi chunywa duto oriwo gombowa, kaka wawinjo e chunywa, kod kaka waneno gik moko. Oriwo bende chiwruok chuth ne Nyasaye gi tekowa duto. Kata kamano, nyaka waher Jehova gi pachwa bende, to mano oriwo bedo gi paro ma en-go e wi gik moko. En adier ni ok wanyal ng’eyo pach Jehova e weche duto. Kata kamano, wanyalo ng’eyo pach Nyasaye ka wang’eyo “pach Kristo” nikech Yesu luwoga ranyisi mar Wuon-gi e yo makare chuth.​—1 Kor. 2:16 kod weche ma lero ndikoni e Study Bible, e bwo kare mar “we do have the mind of Christ.”

² Yesu nohero Jehova gi pache duto. Nong’eyo gik ma Nyasaye ne dwaro ni otim kendo notimogi kata obedo ni nonge’eyo ni mano ne dhi miyo osande. Noketo pache duto e timo dwach Wuon-gi, kendo mano nomiyo ok oyie mondo gimoro amora ogale.

3. Ang’o ma jaote Petro nopuonjore kuom Yesu, to nojiwo Jokristo wetene mondo otim ang’o? (1 Petro 4:1)

³ Petro kaachiel gi joote mamoko noyudo thuolo makende mar bedo gi Yesu kendo ne gipuonjore mathoth kuome. Ka ne jaote Petro ndiko barua mokwongo ne Jokristo, nojiwogi ni gibed gi paro kaka mar Kristo. (Som 1 Petro 4:1.) Petro notiyo gi wach ma itiyogago e lweny ka nondiko kama: “Ikreuru.” Omiyo, ka Jokristo opuonjore bedo gi paro kaka mar Kristo, gibiro bedo moikore gi gige lweny ma biro konyogi kedo gi gombo maricho kod piny ma Satan lochoeni.—2 Kor. 10:3-5; Efe. 6:12.

4. Ere kaka sulani nyalo konyowa luwo puonj ma Petro nomiyowa?

⁴ Wadwaro nono pach Yesu mondo wane kaka wanyalo luwo ranyisine. Wabiro puonjore kaka wanyalo (1) luwo pach Jehova, nikech timo kamano biro konyowa bedo e paro achiel, (2) bedo joma bolore, kod (3) bedo gi paro ma long’o ka wageno Jehova e lamo.

BED GI PARO KAKA MAR JEHOVA

5. Ere kaka kinde moro Petro ne ok onyiso ni oluwo pach Jehova?

⁵ Wane ane kinde moro ma Petro ne ok onyiso ni oluwo pach Jehova. Yesu nonyiso jopuonjrene ni nodhi dhi Jerusalem, kendo ne idhi chiwe e lwet jotend din ma ne dhi sande malit, kae to ginege. (Mat. 16:21) Ne ok yot ne Petro yie ni Jehova ne dhi weyo mondo oneg Yesu ma ne en jal ma Jo-Israel ne geno ni ne dhi resogi kendo Mesia ma nosingi. (Mat. 16:16) Omiyo, Petro notero Yesu tenge monyise niya: “Kechri iwuon, Ruoth. Mano ok bi timoreni ngang’.” (Mat. 16:22) Petro ne ok par kaka Jehova paro, kendo mano e momiyo ne gipogore e paro gi Yesu e wachno.

6. Ere kaka Yesu nonyiso ni ne en gi paro kaka mar Jehova?

⁶ Yesu ne nigi paro kaka mar Wuon-gi. Nonyiso Petro niya: “Dog e ng’eya, Satan! In gima kelona chwanyruok, nikech ok in gi paro mag Nyasaye, to mag dhano.” (Mat. 16:23) Yesu nong’eyo ni dwach Jehova ne en ni mondo osande kendo onege. Omiyo, Yesu ne ok orwako paro ma Petro ne nigo kata obedo ni Petro ne paro ni okonye. Wachno nopuonjo Petro ni ne dwarore ni otem obed gi paro kaka mar Nyasaye. Mano gima wan bende dwarore ni watim.

7. Ere kaka kinde moko bang’e Petro nonyiso ni ne en gi paro kaka mar Nyasaye? (Ne picha bende.)

⁷ Kinde moko bang’e, Petro nonyiso ni noikore luwo pach Jehova e wi gik mopogore opogore. Kinde mar Jehova nochopo mar rwako joma ok oter nyangu mondo gibed jotichne. Noor Petro mondo odhi olend ne Kornelio jal mokwongo ma ne dhi bedo Jakristo ma wuok e ogendini mamoko. Jo-Yahudi ne ok riwrega gi joma wuok e ogendni mamoko, to mano e momiyo ne dwarore ni Petro olok pache mondo olendnegi. Ka nofwenyo pach Nyasaye e wachno, noyie timo lokruok. Omiyo, ka noore mondo odhi irgi, ne ok ‘otamore.’ (Tich 10:28, 29) Nolendo ne Kornelio gi joode kendo nobatisgi.—Tich 10:21-23, 34, 35, 44-48.

8. Ere kaka wanyalo nyiso ni wan gi paro machal gi mar Jehova? (1 Petro 3:8)

⁸ Higni moko bang’e, Petro nojiwo Jokristo wetene mondo gibed e “paro achiel.” (Som 1 Petro 3:8) Sama wapuonjore Muma, wafwenyoga pach Jehova kendo mano miyo wabedo e paro achiel gi Jokristo wetewa. Kuom ranyisi, Yesu nojiwo jolupne ni giket Pinyruoth obed mokwongo e ngimagi. (Mat. 6:33) Wawach ni jalendo moro e kanyaklau oyiero tiyo ne Jehova kuom thuolone duto. Kar nyise ni okechre kendo odag e ngima ma pile mana kaka jomamoko, wanyalo jiwe kendo sire mondo ochop gomboneno.

BED NG’AT MA BOLORE

9-10. Ere kaka Yesu nonyiso kido mar bolruok e okang’ malach?

⁹ E otieno mogik ka ne pok oneg Yesu, nopuonjo Petro kaachiel gi jootene mamoko ber mar bedo joma bolore. Motelo ne mano, Yesu nooro Petro gi Johana mondo gidhi giik gik ma ne gidhi tiyogo e nyasi mogik ma nodhi timo kodgi ka pok onege. Nenore ni moko kuom gik ma ne giiko ne gin besen kod taulo ma ne idhi tigo e lwoko ne welo tiendegi ka pok gichako chiemo. Kata kamano, ng’ano ma ne dhi lwoko tiende welo?

¹⁰ Yesu ne ok odigni timo tijno kendo mano nonyiso kaka nobolore. Jootene nowuoro ahinya nikech notimo gima misumba e ma ne timoga. Noketo lepe ma oko tenge kendo nokawo taulo motueyo e nungone, kae to noolo pi e besen mochako lwokogo tiende jootene. (Joh. 13:4, 5) Nyalo bedo ni Yesu nokawo thuolo malach kolwoko tiende jootene 12, moriwo nyaka tiende Judas ma ne dhi ndhoge. To nikech Yesu nobolore, notimo tijno duto motieko. Bang’ mano, nopenjogi kama: “Be ung’eyo tiend gima asetimonu? Un uluonga ni, ‘Japuonj,’ kendo ni, ‘Ruoth,’ to un kare nikech an kamano. Kuom mano, ka an Ruoth kendo Japuonj e ma aselwoko tiendeu, un bende onego ulwok tiende joweteu.”—Joh. 13:12-14.

11. Ere kaka Petro nonyiso ni nosepuonjore bedo ng’at ma bolore? (1 Petro 5:5) (Ne picha bende.)

¹¹ Petro nopuonjore kido mar bolruok kokalo kuom Yesu. Bang’ ka Yesu nosedok e polo, Petro nochango ng’at moro ma nonyuol ka en puth e yor hono. (Tich 1:8, 9; 3:2, 6-8) Oganda ma noneno honono nohum kendo ne gichokore ka gilworo Petro. (Tich 3:11) To nikech Petro nowuok e oganda ma ji nohero miyore duong’ kendo pakore, be nodhi yie mondo jogo omiye duong’ nikech hono ma notimono? Ooyo, ne ok otimo kamano. Kar mano, nobolore momiyo Jehova kod Yesu duong’ kowacho niya: “Kokalo kuom nying Yesu, kendo nikech wayie kuom nyinge, ng’at ma sani uneno kendo ung’eyoni koro wuotho.” (Tich 3:12-16) Weche ma Petro notiyogo e barua ma nondiko ne Jokristo ka nojiwogi ni girwak kido mar bolruok, nyalo paronwa kaka Yesu nonyiso kidono ka notueyo taulo e nungone molwoko tiend jootene.—Som 1 Petro 5:5.

12. Ere kaka wanyalo nyiso kido mar bolruok mana kaka Petro?

¹² Wanyalo luwo ranyisi mar Petro kuom bedo joma bolore. Ng’at ma bolore gadier ok nyis mana kidono kuom yo mowuoyogo kende. Wach ma Petro notiyogo e ndikono kowuoyo kuom bolruok madier oriwo kaka wanenore wawegi kod kaka waneno jomamoko. Watimoga gik mabeyo ne jomamoko nikech wahero Jehova kod dhano wetewa, to ok nikech wadwaro ni opakwa. Wanyisoga ni wabolore sama watiyo ne Jehova kod jowetewa gi chunywa duto bed ni gifwenyo gima ber ma watimonegi kata ooyo.—Mat. 6:1-4.

BED NG’AT ‘MA PACHE LONG’O’

13. Ler ane tiend bedo ng’at ‘ma pache long’o.’

¹³ Bedo ng’at ma pache long’o oriwo ang’o? (1 Pet. 4:7) Jakristo ma pache long’o timoga duto monyalo mondo otim yiero mabeyo ka luwore gi pach Jehova. Ong’eyo ni onge gima duong’ moloyo winjruok ma en-go gi Jehova. Jakristono ong’eyo ni orem, kendo ni ok ong’eyo gik moko duto. Onyisoga ni ogeno Jehova kuom wuoyo kode e lamo nyading’eny.a

14. Ere kaka kinde moro Petro ne ok ogeno Jehova?

¹⁴ Otieno mogik ka pok Yesu notho, nonyiso jopuonjrene niya: “E otienoni, uduto ubiro chwanyoru nikech an.” Petro nodwoke gi chir niya: “Kata ka jogi duto ochwanyore nikech in, an to ok abi chwanyora ngang’!” E otienono, Yesu nojiwo moko kuom jopuonjrene niya: “Sikuru ka uneno kendo lemuru kinde duto.” (Mat. 26:31, 33, 41) Ka dine Petro oluwo weche ma Yesu nowachogo, samoro dine oyudo chir mar yie ni en achiel kuom jopuonjre mag Yesu. Kar mano, ne okwedo Ruodhe, kendo mano nomiyo oywago ang’e bang’e.—Mat. 26:69-75.

15. Ere kaka Yesu nonyiso ni en ng’at ma pache long’o e otieno mogik ka pok nonege?

¹⁵ Yesu nogeno Jehova gi chunye duto. Kata obedo ni ne en ng’at makare, nowuoyoga gi Jehova e lamo nyading’eny. Mano nomiye chir mar timo dwach Jehova. (Mat. 26:39, 42, 44; Joh. 18:4, 5) Onge kiawa ni wi Petro ne ok wil gi kaka Yesu nolemo gi kinda e otieno mogik ka ne pok onege.

16. Ere kaka Petro nonyiso ni ne en ng’at ma pache long’o? (1 Petro 4:7)

¹⁶ Bang’ kinde, Petro nopuonjore gimomiyo nonego ogen Jehova kokalo kuom lamo. Yesu ma koro nosechier nonyiso Petro gi joote mamoko ni ne gidhi yudo roho maler mondo okonygi timo migawo ma nomiyogi mar lando wach maber. Kata kamano, Yesu nonyisogi ni gibed Jerusalem nyaka mano timre. (Luka 24:49; Tich 1:4, 5) Ang’o ma Petro kod Jokristo wetene ne timo e kindego? Ne “gilemo gi chuny achiel.” (Tich 1:13, 14) Higni moko bang’e ka ne Petro ndiko barupe mokwongo, nojiwo Jokristo wetene ni gibed joma pachgi long’o kendo ginyis ni gigeno Jehova kuom lamo. (Som 1 Petro 4:7.) Petro nopuonjore geno Jehova kendo nobedo kaka siro ne kanyakla mokwongo.—Gal. 2:9.

17. Bed ni wan gi nyalo kata lony mage, ang’o monego wadhi nyime timo? (Ne picha bende.)

¹⁷ Mondo wanyis ni wan joma pachgi long’o, nyaka wawuo gi Jehova e lamo nyading’eny. Dwarore ni wakwaye mondo okonywa, kata wabed mana gi lony kod nyalo mage, to moloyo sama wadwaro timo yiero moko madongo. Onego wakwaye mondo otawa ka wan gadier ni ong’eyo maber gima owinjore kodwa.

18. Ere kaka wanyalo loko pachwa mondo ochalre gi pach Nyasaye?

¹⁸ To mano kaka wamor ni ochuewa e kit Nyasaye kendo wanyalo nyiso kido mabeyo ma en-go. (Cha. 1:26) En adier ni ok wanyal luwo ranyisine e yo makare chuth. (Isa. 55:9) Kata kamano, mana kaka Petro, pod wanyalo dhi nyime temo bedo gi paro kaka mar Jehova. Mad wadhiuru nyime nyiso ni wan gi pach Nyasaye, wabolore, kendo wanyis ni wan joma pachgi long’o.