SULA MAR PUONJRUOK 26
WER 123 Bolruok ne Chenro ma Nyasaye Oketo
Bolri Sama Ok Ing’eyo Weche Duto
“Ok wanyal ng’eyo Ng’at Manyalo Duto e yo makare chuth.”—AYUB 37:23.
GIMA SULANI WUOYE
Kata obedo ni ok wang’eyo gik moko duto ma biro timore e kinde ma biro, wanyalo nyagore gi pek ma waromogo ka waketo pachwa kuom gik ma wang’eyo kendo ka wageno kuom Jehova.
1. Jehova nochueyowa gi nyalo mage, to nikech ang’o?
JEHOVA nochueyowa gi nyalo mar paro, puonjruok gik manyien, winjo tiend weche, kendo tiyo gi gik ma wasepuonjore. Ang’o momiyo nochueyowa e yo ma kamano? Odwaro ni ‘wayud rieko ming’eyego’ kendo watine nikech wang’eye e yo maber.—Nge. 2:1-5; Rumi 12:1.
2. (a) Ang’o monego wang’e kuomwa wawegi? (Ayub 37:23, 24) (Ne picha bende.) (b) Ere kaka wayudo ber ka wayie ni ok wang’eyo weche duto?
2 Kata obedo ni wanyalo puonjore gik manyien, ok wanyal ng’eyo weche duto. (Som Ayub 37:23, 24.) Ne ane ranyisi mar Ayub. Jehova nopenje penjo mang’eny kendo mano nokonyo Ayub ng’eyo ni nitie weche mathoth ma nokia. Penjogo nomiyo Ayub obolore kendo loko paro ma ne en-go. (Ayub 42:3-6) Wan bende wayudoga ber ka wayie ni warem kendo ok wang’eyo weche duto. Bolruok ma kamano miyo wabedo gadier ni Jehova biro elonwa weche monego wang’e mondo watim yiero mowinjore.—Nge. 2:6.
Mana kaka Ayub, wanyalo yudo ber mathoth ka wayie ni nitie gik ma ok wang’eyo (Ne paragraf mar 2)
3. Ang’o ma wadwaro nono e sulani?
3 E sulani, wadwaro nono moko kuom gik ma ok wang’eyo kod pek ma wanyalo romogo nikech wachno. Bende, wabiro nono gimomiyo en gima ber ni nitie weche moko ma ok wang’eyo. Nono wechego biro konyowa bedo gadier ni Jehova, ma en “Jal mong’eyo gik moko duto,” osenyisowa gik mochuno ma dwarore ni wang’e.—Ayub 37:16.
OK WANG’EYO CHIENG’ MA GIKO NOBIE
4. Ka luwore gi Mathayo 24:36, en wach mane ma ok wang’eyo?
4 Som Mathayo 24:36. Ok wang’eyo chieng’ ma giko mar pinyni nobie. Kata mana Yesu ne ok ong’eyo “chieng’no kod sano” ka ne en e piny kae.a Bang’e, nonyiso jootene ni Jehova e ‘ma nigi ratiro’ kata teko mar wacho kinde ma weche moko onego otimree. (Tich 1:6, 7) Jehova oseketo chieng’ ma giko mar pinyni nobie, kata kamano, wan ok wanyal ng’eyo chieng’no.
5. Bedo ni ok wang’eyo ni giko nobi karang’o nyalo duoko kindawa chien e yo mane?
5 Weche ma Yesu nowachogo nyiso ni ok wang’eyo ni wabiro rito kuom kinde ma romo nade ka giko pok ochopo. Mano nyalo miyo chunywa onyosre, kata wanyalo weyo nyiso horuok ka po ni waserito odiechieng Jehova kuom kinde malach. Kata, chunywa nyalo jok sama joodwa kod osiepewa jarowa nikech gik ma wasebedo ka warito pok ochopo. (2 Pet. 3:3, 4) Yot chako paro ni ka wang’eyo odiechieng’ sie ma giko nobie, to wanyalo hore kendo chung’ motegno kata sama jomamoko jarowa.
6. Ang’o momiyo en gima ber ni ok wang’eyo chieng’ ma giko nobie?
6 Kuom adier, bedo ni Jehova ok onyisowa odiechieng’ ma giko nobie miyowa thuolo maber mar nyiso ni watiyone nikech wahere kendo wagene. Ok wati ne Jehova ka wan gi tarik moro sie e pachwa, nikech dwaher tiyone nyaka chieng’. Kar keto pachwa kuom kinde ma “odiechieng Jehova” nobie, waketo pachwa kuom gik mabeyo ma biro timore e odiechiengno. Ka watimo mano, wabiro medo sudo machiegni gi Jehova kendo timo kinda ahinya mondo wamore.—2 Pet. 3:11, 12.
7. En ang’o ma wang’eyo?
7 Ber keto pachwa kuom gik ma wang’eyo. Kuom ranyisi, wang’eyo ni ndalo mag giko nochakore e higa mar 1914. Jehova osenyisowa weche mathoth mokor e Muma ma konyowa bedo gadier ni higano e ma ndalo mag giko nochakoree, kendo osenyisowa gik mang’eny ma ne dhi timore e ndalo mag giko. Omiyo, wan gadier ni “odiechieng’ maduong’ mar Jehova chiegni.” (Zef. 1:14) Bende, wang’eyo ni tich maduong’ ma Jehova dwaro ni watim en lando ne ji mang’eny kaka nyalore “wach maber mar Pinyruoth.” (Mat. 24:14) Wachno sani ilando e pinje ma dirom 240 kendo e dhok mokalo 1,000. Ok ochuno ni wang’e “chieng’no kod sano” e ka wabed jokinda e tich maduong’ momiwano.
OK WANG’EYO KAKA JEHOVA BIRO TIMO GIK MOKO
8. “Tije mag Nyasaye madier” ochung’ ne ang’o? (Eklesiastes 11:5)
8 Kinde mang’eny, ok wang’eyoga “tije mag Nyasaye madier.” (Som Eklesiastes 11:5.) Wechego wuoyo kuom gik ma Jehova nyalo timo, kata monyalo yie ni otimre mondo dwache ochopi. Ok wanyal ng’eyo gadier chuth gimomiyo Jehova nyalo weyo mondo gimoro otimre kata yo monyalo tiyogo e resowa. (Zab. 37:5) Mano en wach ma ok yot ng’eyo mana kaka josayans pod ok ong’eyo kaka nyathi dongo e i min-gi.
9. Bedo ni ok wang’eyo kaka Jehova biro timo gik moko nyalo duoko kindawa chien nade?
9 Sama ok wang’eyo yo sie ma Jehova biro tiyogo e konyowa, wanyalo digni timo yiero moko. Mano nyalo miyo kik wachiwre tiyo ne Jehova e okang’ momedore. Kuom ranyisi, wanyalo digni keto ngimawa obed mayot kata chiwore dhi lendo e alwora ma jolendo dwaroree moloyo. Wanyalo bedo gi kiawa ka be Jehova oyie kodwa sama ok wachopo chenro ma ne waketo e tij Nyasaye, sama ok wane nyak mar tich matek ma watimo e tij lendo, kata sama waromo gi pek moko e tij Nyasaye.
10. Gin kido mage ma wabedogago nikech ok wang’eyo kaka Jehova biro timo gik moko?
10 Bedo ni ok wang’eyo kaka Jehova biro timo gik moko nyalo konyowa ng’eyo tong’ marwa kendo bedo joma bolore. Mano konyowa ng’eyo ni pach Jehova kod yorene ni malo moloyo magwa. (Isa. 55:8, 9) Bende, mano konyowa keto genowa kuom Jehova chuth sama watimo gimoro amora. Wamiyoga Jehova duong’ sama wayudo nyak maber e tij lendo kata e migawo moro ma watimo. (Zab. 127:1; 1 Kor. 3:7) Kata ka gik moko ok odhi kaka ne waparo, pod wan gadier ni Jehova e ma chiko weche. (Isa. 26:12) Watimoga duto ma wanyalo ka wan gadier ni Jehova bende biro timo ma kore. Wan gadier ni Jehova biro tayowa maber kata ka ok otimo mano e yor hono kaka notimoga chon.—Tich 16:6-10.
11. Gin weche mage ma wang’eyo ma nyalo konyowa?
11 Par kinde duto ni Jehova en Nyasaye ma jahera, ma timo gik moko duto e yo makare, kendo riekone tut. Wang’eyo ni ogeno ahinya gik ma watimone kod ma watimo ne Jokristo wetewa. Bende, wang’eyo ni kinde duto Jehova guedhoga joma omakore kode.—Hib. 11:6.
OK WANG’EYO GIK MA BIRO TIMORE KINY
12. Ka luwore gi Jakobo 4:13, 14, en ang’o ma ok wang’eyo?
12 Som Jakobo 4:13, 14. Gimoro achiel ma ok wang’eyo en kaka ngimawa ma kiny biro chalo. Wadak e piny ma “weche ma apoya timore ne ji duto sa asaya.” (Ekl. 9:11) Nikech mano, ok wang’eyo ka chenrowa biro dhi maber, kata ka be wabiro bedo mangima mondo wane kaka chenrogo chopo.
13. Wawinjoga nade nikech ok wang’eyo gik ma biro timore kinde ma biro?
13 Nyalo bedonwa matek nano sama waromo gi chandruok nikech ok wang’eyo gik ma biro timore e kinde ma biro. Ang’o momiyo en kamano? Sama wan gi parruok mar kinde ma biro, wanyalo lalo mor ma wan-go. Masiche ma timore apoya nyalo kelonwa kuyo kod lit e chunywa. Bende, sama gik ma wageno obare, chunywa nyalo nyosore ahinya.—Nge. 13:12.
14. Ang’o monego watim ka wadwaro bedo mamor gadier? (Ne pichni bende.)
14 Sama wanano e chal moro amora matek ma waromogo, wanyiso ni watiyo ne Jehova nikech wahere to ok nikech gik momiyowa. Muma nyiso ni ok onego wagen ni Jehova biro geng’onwa chandruoge duto ma waromogo. Bende, ok ochan-ga chon gik ma timorenwa e ngima. Ong’eyo ni mor marwa ok otenore kuom ng’eyo gik moko duto ma biro timore e kinde ma biro. Kar mano, wanyalo bedo mamor mana ka wayie mondo otawa kendo waluw chikene. (Jer. 10:23) Ka wagene sama pok watimo yiero moro amora, wachalo joma wacho niya: “Ka en dwaro mar Jehova, wanabed mangima mi watim ma kata macha.”—Jak. 4:15.
Luwo kaka Jehova tayowa kendo winje miyo wayudo arita maber (Ne paragraf mar 14-15)b
15. Ang’o monego wang’e e wi kinde ma biro?
15 Kata obedo ni ok wang’eyo gik ma biro timore odiechieng’ kodiechieng’, wang’eyo ni Jehova osingonwa ngima ma nyaka chieng’, bed ni wan gi geno mar dak e polo kata e piny. Wang’eyo ni ok onyal riambo kendo onge gima nyalo mone chopo singoge. (Tito 1:2) En kende e monyalo wacho ‘giko mar gimoro ka pok otimore, kendo chakre chon, osekoro gik ma pok otimore.’ Weche ma nokoro chon nochopo kare, kendo singoge ma kinde ma biro bende biro chopo. (Isa. 46:10) Wang’eyo ni onge gima nyalo pogowa gi hera mar Jehova. (Rumi 8:35-39) Obiro miyowa rieko, teko, kendo obiro hoyowa sama waromo gi tem moro amora. Wanyalo bedo gadier ni Jehova biro konyowa kendo guedhowa.—Jer. 17:7, 8.
OK WANYAL NG’EYO MALONG’O KAKA JEHOVA ONG’EYOWA
16. Mana kaka inyisowa e Zaburi 139:1-6, ang’o ma Jehova ong’eyo kuomwa e yo malong’o chuth?
16 Som Zaburi 139:1-6. Jehova ong’eyo kaka ochuewa. Ong’eyo kaka dendwa, chunywa, kod pachwa chalo. Hera moherowago pok olokore. Ong’eyo gik ma wawacho kod gik manie chunywa. Mana kaka Ruoth Daudi nowacho, Jehova ritowa kendo onge gima nyalo mone chopo kama wantie. Donge wamor ahinya ng’eyo ni Ruodh polo gi piny, kendo Nyasaye Manyalo Duto oritowa e yo ma kamano! Wayie gi weche ma Daudi nowachogi: “Ing’eya e yo matut modhiera nono. Adier, yo ming’eyago tut miwuoro.”—Zab. 139:6.
17. Ang’o momiyo nyalo bedonwa matek yie ni Jehova ong’eyowa malong’o?
17 Samoro nyalo bedonwa matek neno Jehova kaka Wuoro ma jahera kendo ma dewowa gadier nikech kaka ne wapon, kit ngimawa, kata puonj ma ne wayiego chon. Wanyalo paro ni Jehova ok ong’eyowa kata ni en mabor kodwa nikech richo moko ma ne watimo chon. Nitie kinde ma Daudi bende ne paro kamano. (Zab. 38:18, 21) Ng’at ma temo loko kit ngimane mondo odag ka luwore gi chike makare mag Jehova bende nyalo penjore niya: ‘Ka kuom adier Nyasaye ong’eya malong’o, ang’o momiyo odwaro ni awe kit ngima ma kelona mor kendo ma ahero?’
18. Gin ber mage ma wayudo ka wang’eyo ni Jehova ong’eyowa maber moloyo kaka wang’ere? (Ne pichni bende.)
18 Wanyalo bedo gadier ni Jehova ong’eyowa maber moloyo kaka wang’ere, kendo ni onenoga gik mabeyo kuomwa ma ok wanyal neno wan wawegi. Bende, oneno nyawo magwa kod kinda ma watimo mondo walo nyawogo kendo oherowa ahinya. (Rumi 7:15) Sama wang’eyo ni Jehova neno nyalowa kendo ni doher tiyo kodwa e yo momedore, mano chwalowa mondo wamed makore kode kendo tiyone ka wamor.
Jehova konyowa tego yiewa kuom singo mabeyo mag kinde ma biro. Kuom timo mano, okonyowa nano e bwo tembe ma waromogo (Ne paragraf mar 18-19)c
19. Ang’o ma wan-go gadier e wi Jehova?
19 Wang’eyo ni Jehova en hera, kendo waonge gi kiawa moro amora kuom wachno. (1 Joh. 4:8) Wang’eyo ni chike makare momiyowa nyiso kaka oherowa kendo ni odwaro ni wadag e ngima maber. Wang’eyo bende ni Jehova dwaro ni wadag nyaka chieng’. Mano e momiyo nooro Wuode mondo othonwa. Rawar miyo wabedo gadier ni wanyalo moro Jehova kata obedo ni warem. (Rumi 7:24, 25) Wang’eyo ni “Nyasaye duong’ moloyo chunywa kendo ong’eyo gik moko duto.” (1 Joh. 3:19, 20) Jehova neno gik moko duto ma watimo, kendo en gadier ni wanyalo timo gik ma more.
20. Ang’o ma biro konyowa geng’o parruok mokalo tong’?
20 Jehova osenyisowa gik moko duto monego wang’e. Ka wabolore kendo wayie gi wachno, mano konyowa mondo kik wabed gi parruok mokalo tong’ kendo waket pachwa kuom gik mochuno. Ka watimo kamano, wanyiso ni wageno Jehova, ma en Nyasaye “mong’eyo weche duto.” (Ayub 36:4) Kata obedo ni sani ok wang’eyo weche mathoth, warito kinde ma wabiro dak nyaka chieng’ ka wapuonjore weche mang’eny e wi Jehova Nyasachwa.—Ekl. 3:11.
WER 104 Roho Maler En Mich ma Nyasaye Chiwo
b WECHE MA LERO PICHA: Wuoro moro gi wuode iko bag ma ginyalo ringogo ka po ni masira opoyogi.
c WECHE MA LERO PICHA : Owadwa moro ma kalo e chandruoge oketo pache kuom mor mobiro bedogo e piny manyien.