Kony Jopuonjre Muma Mondo Gichung’ Motegno e Adiera

1-2. (a) Ang’o momiyo jopuonjre moko mag Muma digniga kawo okang’ mar tiyo ne Jehova? (b) Ang’o ma wadwaro nono e sulani?

DIBED ni ne idigni ka pok ne ikawo okang’ mibedo Janeno mar Jehova? Samoro niluor ni jotich weteni, osiepeni, kata joodu ne dhi kwedi. Kata samoro niparo ni ne ok inyal luwo chike makare mag Jehova. Ka en kamano, to inyalo neno gimomiyo jopuonjre moko mag Muma nyalo digni ka pok gitimo yiero mar tiyo ne Jehova.

² Yesu nong’eyo ni luoro kaka mago ne nyalo mono ng’ato timo dongruok e weche Jehova. (Mat. 13:20-22) To e ma pod nojiwo joma ne digni luwe mondo gitim kamano. Nonyiso jopuonjrene kaka nonego gikony joma kamago (1) fwenyo gik ma nyalo monogi timo dongruok, (2) hero Jehova e yo matut, (3) keto dwach Jehova obed mokwongo e ngimagi, kendo (4) loyo pek ma giromogo. Ere kaka wanyalo luwo ranyisi mar Yesu sama wapuonjo ji Muma ka watiyo gi bug Inyalo Dak gi Mor Nyaka Chieng’!?

KONY JAPUONJRENI FWENYO GIK MA NYALO MONE TIMO DONGRUOK

3. Ang’o ma samoro ne mono Nikodemo bedo japuonjre Yesu?

³ Nikodemo ne en achiel kuom jotend Jo-Yahudi. Kata kamano, nitie gima ne mone bedo jalup Yesu. Mana dweche auchiel kama bang’ Yesu chako tije mar yalo e piny kae, Nikodemo nofwenyo ni Yesu ne en jaote mar Nyasaye. (Joh. 3:1, 2) Nochano romo gi Yesu aling’ling’ nikech ‘noluoro Jo-Yahudi.’ (Joh. 7:13; 12:42) Samoro noluor ni kobedo japuonjre Yesu, to nodhi lalo gik mang’eny ahinya.a

4. Ere kaka Yesu nokonyo Nikodemo ng’eyo gima Nyasaye ne dwaro ni otim?

⁴ Nikodemo nong’eyo Chik Musa, kata kamano, ne dwarore ni okonye mondo ong’e gima Jehova ne dwaro ni otim. Ere kaka Yesu nokonye? Yesu noikore tiyo gi thuolone mondo owuo kode kata mana gotieno. Yesu nolerone adimba gima nonego otim mondo obed japuonjrene. Ne dwarore ni owe richo kendo olok chunye gadier, obatise e pi, kendo onyis yie kuom Wuod Nyasaye.—Joh. 3:5, 14-21.

5. Ere kaka wanyalo konyo japuonjre Muma fwenyo gik ma mone timo dongruok?

⁵ Kata ka po ni japuonjre olony gi Ndiko, pod dwarore ni okonye fwenyo gik ma mone timo dongruok. Tij andika kod akwede ma wuok kuom joodgi kata wedene nyalo mone timo yiero mar tiyo ne Jehova. Omiyo, ikri tiyo gi thuoloni mondo iwuo gi japuonjreni. Inyalo gwele mondo udhi umadhie chai kata urieru kode matin. E kinde kaka mago, onyalo nyisi pek moko mokaloe. Jiwe mondo otim lokruoge ma dwarore nikech ohero Jehova, to ok ni mondo omori.

6. Ere kaka inyalo konyo japuonjreni bedo gi chir? (1 Jo-Korintho 16:13)

⁶ Ka japuonjre Muma ni gadier ni Jehova biro konye dak ka luwore gi chikene makare, obiro bedo gi chir mar tiyo gi gik ma opuonjore. (Som 1 Jo-Korintho 16:13.) Puonjo ng’ato Muma inyalo pim gi puonjo nyithindo e skul. Kiparo kinde ma ne in e skul, ne ihero japuonj ma ne nigi kido mage? Onge kiawa ni nihero japuonj ma ne hore kodi kendo konyi tiyo maber gi lony ma ne in-go. E yo ma chalo kamano, japuonj maber mar Muma ok puonj apuonja gik ma Nyasaye dwaro ni watim kende, to okonyo japuonjre bedo gadier ni Jehova oikore konye timo lokruoge duto ma dwarore e ngimane. Ere kaka inyalo timo mano?

KONY JAPUONJRENI OHER JEHOVA E YO MATUT

7. Ere kaka Yesu nokonyo joma ne winje mondo gimed hero Jehova?

⁷ Yesu nong’eyo ni ka jopuonjrene ohero Nyasaye, to mano ne dhi chwalogi tiyo gi gik ma ne gipuonjore. Kinde duto nopuonjogi gik ma ne nyalo konyogi medo hero Wuon-gi manie polo. Kuom ranyisi, nopimo Jehova gi wuoro ma miyo nyithinde gik mabeyo. (Mat. 7:9-11) Moko kuom joma ne winjo Yesu ne onge gi wuoro ma kamano. Par ane kaka ne giwinjo e chunygi ka ne Yesu ogoyo ngero mar wuoro moro ma jahera ma nokecho wuode kendo rwake bang’ ka wuodeno nosetimo gik maricho. Ne ginyalo neno kaka Jehova ohero nyithinde manie piny kae.—Luka 15:20-24.

8. Ere kaka inyalo konyo japuonjre mar Muma mondo omed hero Jehova e yo matut?

⁸ In bende inyalo konyo japuonjreni mondo omed hero Jehova e yo matut sama ijiwo kido mabeyo ma Jehova nigo. E puonjruok ka puonjruok, konye mondo one tudruok mantie e kind gik mopuonjore kod hera mar Jehova. Sama uwuoyo e wi rawar, konye neno kaka mano en mich ma Jehova nomiye en owuon. (Rumi 5:8; 1 Joh. 4:10) Ka japuonjre oneno kaka Jehova ohere, mano nyalo chwale mondo omed hero Jehova e yo matut.—Gal. 2:20.

9. Ang’o ma nokonyo Michael timo lokruoge e ngimane?

⁹ Ne ane ranyisi mar Michael modak Indonesia. Nodongo e adiera, kata kamano, ne ok obatise. Ka nochopo higni 18, noyudo tich e piny machielo kaka dereva mar loche. Bang’e nokendo, kata kamano, noweyo joode e piny Indonesia sama nodhi nyime tiyo e piny machielo. Bang’ kinde moro, jaode kod nyare nochako puonjore Muma gi Joneno kendo ne gitimo dongruok mobatisgi. Min Michael notho, kendo nong’ado ni nodhi dok thurgi mondo orit wuon-gi, kae to en bende noyie puonjore Muma gi Joneno mag Jehova. Ka ne ginono kare mar “Tim Nonro” e sula mar 27 e bug Inyalo Dak gi Mor Nyaka Chieng’!, weche man kanyo nomulo chunye ahinya. Pi wang’ Michael nochuer ka noparo kaka Jehova nowinjo malit ka noneno kisando Wuode. Noneno kaka mich mar rawar en mich makende, kendo mano nochwale motimo lokruoge mobatise.

KONY JAPUONJRENI OKET DWACH JEHOVA OBED MOKWONGO E NGIMANE

10. Ere kaka Yesu nokonyo jopuonjrene mondo giket tij Jehova obed mokwongo e ngimagi? (Luka 5:5-11) (Ne picha bende.)

¹⁰ Jopuonjre mokwongo mag Yesu nofwenyo mapiyo ni en e Mesia ma nosingi, kata kamano, ne dwarore ni giket tij lendo obed mokwongo e ngimagi. Petro gi Andrea nosebedo jopuonjre Yesu kuom kinde moro ka ne Yesu ogwelogi mondo gibed jolupne. (Mat. 4:18, 19) Ohandgi mar lupo ne dhi maber kendo nenore ni ne gitiyo kanyachiel gi Jakobo gi Johana. (Mar. 1:16-20) Ka ne Petro gi Andrea ‘oweyo gognigi’ mondo gibed jolup Yesu, nyaka bed ni ne gitimo chenro maber mondo joutegi oyud gik mochuno e ngima. Ang’o momiyo ne giyie weyo ohandgi? Weche ma yudore e Luka nyisowa ni Yesu notimo hono moro ma nokonyogi bedo gadier ni Jehova nigi nyalo mar pidhogi.—Som Luka 5:5-11.

11. Ere kaka wanyalo tiyo gi gik mosetimore e ngimawa mondo wateg yie mar jopuonjrewa?

¹¹ Ok wanyal timo honni kaka Yesu, to wanyalo wuoyo e wi yore ma Jehova osebedo ka konyogo joma oketo tije obed mokwongo e ngimagi. Kuom ranyisi, be inyalo paro kaka Jehova nokonyi ka nichako dhi e chokruoge mag kanyakla? Samoro nochuni wuoyo gi jatendi mondo inyise gimomiyo ne ok inyal tiyo kuom seche momedore ka po ni mano ne nyalo moni dhi e chokruoge. Sama inyiso japuonjreni gik mosetimore e ngimani, lerne kaka yieni notiegi, kendo kaka Jehova nokonyi mondo iket lamone obed mokwongo e ngimani.

12. (a) Ang’o momiyo onego wagwel jolendo mopogore opogore e puonjruok marwa? (b) Ere kaka inyalo tiyo gi vidio mondo ichop e chuny japuonjreni? Chiw ane ranyisi.

¹² Japuonjreni biro yudo ber mathoth kowinjo kaka Jokristo weteni osetimo lokruoge mondo giket tij Jehova obed mokwongo e ngimagi. Omiyo, gwel owete gi nyimine mopogore opogore e puonjruok maru. Kwagi mondo ginyisu kaka ne gipuonjore adiera, kod lokruoge ma ne gitimo mondo giket tij Jehova obed mokwongo e ngimagi. E wi mano, losuru thuolo mondo une vidio ma yudore e kare mar “Tim Nonro” kata kare mar “Med Timo Nonro” e bug Inyalo Dak gi Mor Nyaka Chieng’! Kuom ranyisi, sama uwuoyo e wi sula mar 37, inyalo jiwo puonj madongo ma yudore e vidio mar Jehova biro miyowa gik ma wachando.

KONY JAPUONJRENI NG’EYO KAKA ONYALO LOYO PEK MOROMOGO

13. Ere kaka Yesu noiko jopuonjrene ne akwede?

¹³ Yesu nonyiso jolupne nyadinwoya ni jomamoko ne dhi kwedogi, moriwo nyaka wedegi. (Mat. 5:11; 10:22, 36) Ka nochiegni tieko tije e piny kae, nonyiso jopuonjrene ni jo akwede ne nyalo negogi. (Mat. 24:9; Joh. 15:20; 16:2) Nonyisogi ni gibed motang’ sama gilendo. Nonyisogi bende ni kik giyware gi jo akwede, to gibed mariek sama gin e tij lendo.

14. Ere kaka wanyalo iko japuonjrewa ne akwede? (2 Timotheo 3:12)

¹⁴ Wanyalo konyo japuonjrewa mondo oikre ne akwede ka wakonye ng’eyo gik ma jotich wetene, osiepene, kata wedene nyalo nyise. (Som 2 Timotheo 3:12.) Moko kuom jotich wetene nyalo jare nikech oluwo puonj mag Muma. Jomamoko moriwo wedene nyalo kwede nikech puonj manyien mochako luwo. Ber chako ike ne akwede chon mondo ong’e gima obiro wacho kata timo ka oromo gi akwede.

15. Ang’o ma nyalo konyo japuonjre Muma nyagore maber sama joodgi kata wedene kwede?

¹⁵ Jiw japuonjreni mondo otem paro gik ma nyalo miyo moko kuom wedene kod joodgi okwede. Nyalo bedo ni giparo ni osewuonde, kata samoro gin gi paro ma ok kare e wi Joneno mag Jehova. Kata mana moko kuom wede Yesu ne ok mor kode nikech tije mar yalo. (Mar. 3:21; Joh. 7:5) Kony japuonjreni ng’eyo kaka onyalo nyiso horuok kod rieko sama owuoyo gi jomamoko, moriwo nyaka joodgi kod wedene.

16. Ere kaka wanyalo konyo japuonjre mar Muma lero yiene e yo mariek?

¹⁶ Kata sama nenore ka gima wede kod joodgi orwako wach, ber ka japuonjre ok onyisogi puonj duto mag Muma mosepuonjore dichiel. Kotimo kamano, to ginyalo jok kode kendo ginyalo tamore wuoyo kode e wi yiene kinde machielo. Kuom mano, jiwe mondo oler puonj moyiego e yo mayot, kendo ma weyo jomamoko gi siso mar gombo winje e kinde machielo. (Kol. 4:6) Onyalo nyisogi websaitwa mar jw.org. Mano nyalo konyogi ng’eyo weche momedore e wi Joneno mag Jehova e thuologi giwegi.

17. Ere kaka inyalo konyo japuonjreni chiwo dwoko e wi paro ma ok kare ma jomoko nyalo bedogo e wi Joneno mag Jehova? (Ne picha bende.)

¹⁷ Inyalo tiyo gi kare mar “Penjo ma Ji Jopenjo” ma yudore e jw.org mondo ikony japuonjreni ng’eyo dwoko mayot mag penjo ma wedene kata jotich wetene nyalo penje. (2 Tim. 2:24, 25) E giko sula ka sula ma yudore e bug Inyalo Dak gi Mor Nyaka Chieng’! unyalo nono kode kare ma wacho ni “Paro ma Jomoko Nigo.” Jiw japuonjreni mondo opuonjre kaka onyalo chiwo dwoko gi wechene owuon. Kik idikri miye paro moko ma nyalo konye chiwo dwoko e yo maber. Tiegruok ma kamano biro konye bedo gi chir sama okedo ne yiene.

18. Ere kaka inyalo jiwo japuonjreni mondo ochak lendo gi kanyakla? (Mathayo 10:27)

¹⁸ Yesu nojiwo jopuonjrene ni giland wach maber ne ji duto. (Som Mathayo 10:27.) Ka japuonjre ochako lendo mapiyo, to mano biro konye chako geno Jehova. Ere kaka inyalo konyo japuonjre bedo gi chenrono? Sama oland ne kanyakla kampen moro amora mar lendo, penj japuonjreni ka doher bedo jalendo ma pok obatisi. Lerne gimomiyo yot chako lendo e kinde mag kampen. Bende, onyalo yudo tiegruok mag wuoyo e lela ka otimo migepe mag jopuonjre e chokruok ma kor juma. Tiegruok moyudo sama ogolo migepego biro konye lero yiene ka en gadier kod chir.

NYIS NI IN GADIER GI JAPUONJRENI

19. Ere kaka Yesu nonyiso ni en gadier gi jopuonjrene, to wanyalo luwo ranyisine e yo mane?

¹⁹ Ka ne Yesu pok odok e polo, nosingo ne jopuonjrene ni ne gidhi romo kendo. Ne ok giwinj tiend gima Yesu ne wacho e kindego e wi dhi e polo. Jopuonjrego ne nigi kiawa moko, kata kamano, Yesu nonyiso ni ne en gadier kodgi. (Joh. 14:1-5, 8) Nong’eyo ni kinde ne dhi kalo ka pok giwinjo tiend weche moko, kaka dhi e polo. (Joh. 16:12) Wan bende wanyalo nyiso japuonjrewa ni wan gadier ni onyalo moro chuny Jehova.

20. Nyaminwa moro ma wuok Malawi nonyiso nade ni en gadier gi japuonjrene?

²⁰ Wadwaro ni wabed gadier ni japuonjrewa dwaro timo gik makare. Par ane ranyisi mar Nyaminwa Chifundo modak e piny Malawi. Nochako puonjore Muma gi nyako moro ma ne lemo Katholik miluongo ni Alinafe. Ne gitiyo gi bug Inyalo Dak gi Mor Nyaka Chieng’! Ka ne gitieko sula mar 14, nopenjo Alinafe paro ma ne en-go e wi tiyo gi sanamu e lamo. Penjono nowang’o iye modwoko ni, “Mano en yiero mar ng’ato owuon!” Bang’ mano, Chifundo ne paro ni Alinafe ne dhi weyo puonjore Muma. Nohore kode kendo ne en gadier ni mos mos Alinafe dhi neno rach mar tiyo gi sanamu e lamo. Dweche matin bang’e, Chifundo nopenje penjo ma yudore e sula mar 34 ma penjo niya: “Ere kaka gik ma isepuonjori e Muma kod gik miseng’eyo e wi Jehova osekonyi?” Owacho ni Alinafe nowacho gik mang’eny mabeyo, mowacho nyaka ni Joneno mag Jehova ok timga gik ma kwedo puonj mag Muma.” Mapiyo bang’ mano, Alinafe noweyo tiyo gi sanamu kendo nobatise.

21. Ere kaka wanyalo konyo japuonjre mondo obed gadier ni onyalo chung’ motegno e adiera?

²¹ Kata obedo ni Jehova ‘e ma miyo kodhi dongo,’ pod wanyalo konyo japuonjrewa timo dongruok. (1 Kor. 3:7) Ok wapuonje mana gima Jehova dwaro ni otim kende, to bende wakonye mondo oher Jehova gi hera matut. Wadwaro jiwe ni onyis ni ohero Jehova kuom keto dwache obed mokwongo e ngimane. Bende, dwaher puonje geno Jehova sama oromo gi pek e ngimane. Ka wanyiso ni wan gadier gi yiero mosetimo mar tiyo ne Jehova, mano biro jiwe kendo miye chir ni en bende onyalo chung’ motegno e adiera.