Maria Magdalina ne En Ng’a?
Dwoko ma Muma chiwo
Maria Magdalina ne en jalup Yesu Kristo. Nyinge mar Magdalina nyiso ni ne owuok e taon mar Magdala (kata Magadan), ma ne ni machiegni gi Nam Galili. Nyalo bedo ni Maria nodakga kuno.
Maria Magdalina ne en achiel kuom mon ma ne wuotho gi Yesu kaachiel kod jopuonjrene kendo ne omiyogiga gige ringruok ma ne ginyalo konyorego. (Luka 8:1-3) Ne oneno ka iguro Yesu kendo ne en achiel kuom joma nokwongo neno Yesu bang’ chierne.—Mariko 15:40; Johana 20:11-18.
Be Maria Magdalina ne en jachode?
Muma ok nyiswa ni Maria Magdalina ne en jachode. Gima Muma wacho en ni Yesu nogolo kuome jochiende abiriyo.—Luka 8:2.
To kare paro mar ni ne en jachode nowuok kanye? Higni mang’eny bang’ ka ne osetho, ji ne ochako paro ni en e dhako ma nyinge ok ong’ere (ma samoro ne en jachode) ma ne oluoko tiende Yesu gi pi wang’e kendo twoyogi gi yie wiye. (Luka 7:36-38) Kata kamano, onge Ndiko moro amora ma siro wachno.
Be Maria Magdalina ne en “jaote mar joote”?
Ooyo. Jo-Katholik luongo Maria ni “St. Mary Magdalene” kendo ni “jaote mar joote” nikech en achiel kuom joma ne okwongo kelo wach chier mar Yesu ne joote. (Johana 20:18) Bedo ni ne okelo wach chier Yesu, ok nyis ni koro ne en jaote. Kendo onge kamoro amora e Muma ma iluongee kamano.—Luka 6:12-16.
Ne otiek ndiko Muma e higni mogik ogik mag kinde Jokristo mokwongo. Kata kamano, higni mang’eny bang’e, jotend kanise ne ong’ado mar luongo Maria Magdalina ni “jatakatifu” ka gimiye luor makende. Buge mamoko ma ne ondik bang’e e higni mag 100-300—ma ok gin achiel kuom buge mag Muma—ne wacho ni moko kuom joote Yesu ne nigi nyiego gi Maria. Sigendni mochuogigo onge e Muma.
Be Maria Magdalina ne en chi Yesu Kristo?
Ooyo. Muma wacho maler ni Yesu ne ok okendo.a
a Som sula ma wacho ni “Je, Yesu Alikuwa na Mke? Je, Alikuwa na Ndugu na Dada?”