Muma Wacho Ang’o Kuom Tuoche ma Landore e Piny Ngima?
Dwoko ma Muma chiwo
Muma nokoro ni tuoche ma landore nobedie e ndalo mag giko. (Luka 21:11) Tuochego ok gin kum kata chwat mowuok kuom Nyasaye. Nyasaye biro tieko tuoche duto kotiyo gi Pinyruodhe.
Be Muma nokoro ni tuoche ma landore ne dhi betie?
Muma ok wach achiel kachiel nyinge mag tuoche ma landore kata tuoche mamoko kaka COVID-19, ayaki, kahera (TB), maleria, kata Spanish flu. Kata kamano, ne okoro ni “tuoche ma landore” kata ‘tuoche ma kelo tho’ ne dhi betie. (Luka 21:11; Fweny 6:8) Tuochego gin ranyisi ma nyiso ni wan e “ndalo mag giko,” kata “giko mar ndalo.”—2 Timotheo 3:1; Mathayo 24:3.
Be Nyasaye osegakumo ji gi tuoche?
Nitie ranyisi moko manok e Muma mag joma Nyasaye ne okumo gi tuoche. Kuom ranyisi, nitie jomoko ma ne ogoyo gi tuo mar dhoho. (Kwan 12:1-16; 2 Ruodhi 5:20-27; 2 Weche mag Ndalo 26:16-21) Kata kamano, tuochego ne ok gin ma ne landore ma mak nyaka joma ne onge gi ketho. Kar mano, mago ne gin kum ma ne oyudo joma ne ong’anyo ne Nyasaye.
Be tuoche ma landore ma waneno e kindegi gin kum mowuok kuom Nyasaye?
Ooyo. Nitie jomoko ma wacho ni Nyasaye tiyo gi tuoche ma landore kod tuoche mamoko mondo okumgo ji e kindewagi. Kata kamano, Muma to kwedo parono. Nikech ang’o?
Nitie jotich Nyasaye moko machon gi masani ma osegabedo matuo. Kuom ranyisi, ‘tuoche nohero goyo’ Timotheo ma ne en jatich Nyasaye motegno. (1 Timotheo 5:23) Kata kamano, mano ok nyis ni Nyasaye ne ok oyie kode. E kindegi bende, nitie jotich Nyasaye ma bedoga matuo. Kinde mang’eny, tuochego yudogi nikech gin kama rach e kinde ma ok owinjore.—Eklesiastes 9:11.
E wi mano, Muma puonjo ni kinde ma Nyasaye biro kawoe okang’ mar kumo jomaricho pok ochopo. Bende, wadak e ‘odiechieng warruok,’ ma en kinde ma Nyasaye rwakoe ji duto mondo osud machiegni kode kendo oresgi. (2 Jo-Korintho 6:2) Yo achiel ma orwakogo ji en kokalo kuom tij lando “wach maber mar Pinyruoth” mitimo e piny ngima.—Mathayo 24:14.
Be tuoche ma landore norum?
Ee. Muma koro ni ndalo biro ma tuoche ok nobedie kendo. Nyasaye biro tiyo gi Pinyruodhe e tieko tuoche duto. (Isaya 33:24; 35:5, 6) Obiro tieko chandruok, rem, kod tho. (Fweny 21:4) Kendo obiro chiero jomotho mondo gidag e ngima maber e piny ka.—Zaburi 37:29; Tich Joote 24:15.
Ndiko ma wuoyo e wi tuoche
Mathayo 4:23: Yesu “nowuotho e Galili duto kopuonjo e sunagokegi, kendo koyalo wach maber mar Pinyruoth. Bende, nochango tuoche duto kod midekre duto ma ji ne nigo.”
Tiend Ndikono: Honni ma ne Yesu otimo ne nyiso mana gik ma Pinyruodh Nyasaye biro timo ne dhano duto.
Luka 21:11: “Tuoche ma landore nobedie.”
Tiend Ndikono: Tuoche en achiel kuom ranyisi ma nyiso ni wadak e ndalo mag giko.
Fweny 6:8: “Ne aneno faras moro ma kite ne chal ka gima obokore, to nying jal ma ne oidhe ne en Tho. Kendo Liel ne luwe machiegni. To ne omiye teko . . . mondo onek . . . gi tuo ma kelo tho.”
Tiend Ndikono: Weche mokor e bug Fweny e wi joidh farese ang’wen, nyiso ni tuoche ma landore ne dhi betie e kindewagi.