Be Pinje Nyalo Riwore ma Gigeng’ Lokruoge Madongo ma Timore e Kor Lwasi?—Ang’o ma Muma Wacho?

Chieng’ Jumapil, Novemba 20, 2022, romo mar COP27 United Nations Climate Change Conference norumo. Kata obedo ni jotelo ma ne nie romono nosingore ni idhi chiw kony mar pesa ne pinje modhier ma yudoga masiche nikech lokruoge ma timore e kor lwasi, pod thothgi nofwenyo ni kony ma kamano ok bi tieko chandruogego chuth.

Tarik 19, Novemba 2022, António Guterres ma en jagoro maduong’ mar Riwruok mar Pinje (U.N.) nowacho kama: “Ayie gi paro mar golo pesa minyalo konygo pinje ma romoga gi chandruoge ma kor lwasi kelo. Kata kamano, nenore maler ni mano ok bi tieko chandruogego. Pinywani inyalo pim gi jatuo mohewore manie wod.”
Tarik 20, Novemba 2022, Mary Robinson ma ne en president machon mar Ireland, kendo ma kinde moro ne en UN High Commissioner for Human Rights, nowacho niya: “Machiegnini, lokruoge ma timore e kor lwasi biro kelo ne ji chandruoge madongo e piny ngima.”

Thoth joma tindo parore kaka pinywani biro chalo e kinde mabiro. Be pinje nyalo riwore ma gitiek chandruoge ma lokruoge ma timore e kor lwasi kelo? Ang’o ma Muma wacho?

Be pinje biro riwore ma gichop dwachgino?

Muma fwenyonwa ni kata obedo ni pinje nyalo temo matek mondo gitiek chandruoge ma lokruoge mag kor lwasi keloga, pod ok ginyal tieko chandruogego duto. Ne ane weche ariyo momiyo wawacho kamano:

“Gima obam ok nyal rie.”—Eklesiastes 1:15.

Tiende wachno: Sirkende mag dhano ok nyal timo kamano nikech dhano ne ok onego oloch e wigi giwegi. (Jeremia 10:23) Kata ka pinje oriwore, pod ok ginyal tieko chandruoge manie piny, kata gitem matek manade.
“Nimar ji nobed jo moherore giwegi, jo mohero pesa, . . . jo ma ok oikore loso winjruok moro amora.”—2 Timotheo 3:2, 3.

Tiend wachno: Muma nosekoro chon ni thoth ji e kindewagi ne dhi bedo joma oherore giwegi kendo ma ok oikore timo winjruok moro amora ma nyalo kelo ne ji ber.

Gima miyowa geno

Gik ma biro timore ne pinywani ok otenore kuom singo ma sirkende mag pinyni nyalo miyowa. Nyasaye osemiyowa Jaloch ma nigi teko ma en Yesu Kristo. Muma wacho kuome kama:

“Loch nobed e lwete. Ibiro luonge ni Jang’ad Rieko Molony, Nyasaye ma Jateko, Wuoro Mosiko, Ruodh Kuwe.”—Isaya 9:6.

Yesu e Ruodh Pinyruodh Nyasaye, ma en loch manie polo. (Mathayo 6:10) Yesu nigi teko, rieko, kod gombo mar loso pinywani kendo rito joma odak e iye. (Zaburi 72:12, 16) Loch manie polono biro “ketho jo ma ketho piny,” kendo obiro loso alwora mar pinywani ma bed ma jaber.—Fweny 11:18; Isaya 35:1, 7.

Mondo iyud weche momedore e wi kaka ibiro tiek chandruoge ma kor lwasi kelo, ne sula ma wacho ni, “Biblia Inasema Nini Kuhusu Mabadiliko ya Hali ya Hewa na Wakati Wetu Ujao?”