Paro ma Joneno mag Jehova Nigo e Wi Holocaust—Ang’o ma Muma Wacho?

Tarik 27 Januar, 2023, ji mang’eny biro paro odiechieng’ mong’ere ni International Holocausta Remembrance Day. Gik maricho ma notimore higni 75 gi wiye mokalo, nyalo miyo ipenjri ni, ‘Ang’o momiyo Nyasaye noweyo mondo Holocaust otimre?’

• Mondo ine gima Muma wacho, som sula ma wacho ni, “Ang’o Momiyo Noneg Jo-Yahudi Mang’eny e Kinde Lweny mar Ariyo mar Piny Ngima? Ang’o Momiyo Nyasaye ne Ok Ogeng’o Nekno?”

Noneg Jo-Yahudi mang’eny ahinya e kinde Holocaust. Thothgi ne oneg e nek ma nenore maler ni nochan. Ji moa e dinde mamoko bende nosand, monegi e kinde Holocaust. Moko kuom joma nosand nikech yiegi ne gin Joneno mag Jehova.

• Mondo iyud weche momedore, som sula ma wacho ni, “Ang’o ma Notimore ne Joneno mag Jehova e Kinde Lweny mar Ariyo mar Piny?”

“Gima unyalo geno bang’e”

Ji mang’eny oluor ni nek kaka ma notimore e kinde Holocaust nyalo timore kendo. Gima ber en ni Muma nyisowa ni e kinde mabiro masiche kaka mago ok nobedie kendo.

• “‘Nimar an awuon ang’eyo gima aparo kuomu,’ Jehova owacho, ‘adwaro ni ubed gi kuwe to ok masira, mondo amiu gima unyalo geno bang’e.’”​—Jeremia 29:11.b

Wechego biro chopo machiegnini e kinde ma Jehova biro tieko richo kod gik ma richo osekelonwa. Machiegnini obiro:

• Tieko joma hinyo jowetegi.​—Ngeche 2:22.

• Chango ji duto ma chandore.​—Fweny 21:4.

• Chiero jomotho mondo gichak gidag e piny.​—Johana 5:28, 29.

Inyalo bedo gadier chuth ni gik mosingnwa e Muma biro timore. Mondo ine gimomiyo wawacho kamano, wakwayi ni itemie chenro marwa mar puonjruok Muma ma onge chudo.