Be Onego Alam Jotakatifu?

Dwoko ma Muma chiwo

Ooyo. Muma puonjo ni onego walam Nyasaye kende kokalo kuom nying Yesu. Yesu nowacho ne jopuonjrene kama: “Un to lemuru kama eri: Wuonwa manie polo, nyingi mondo obed maler.” (Mathayo 6:9, The Bible in Luo, 1968) Onge kama Yesu ne owachoe ni jopuonjrene olam jotakatifu, malaike, kata mana ng’at moro amora mak mana Nyasaye.

Yesu nowacho ne jolupne kama: “An e yo, kendo an e adiera, kendo an e ngima; ng’ato ok bi ka Wuoro ma ok okadho kuoma.” (Johana 14:6) Yesu kende e ma Nyasaye opwodho mondo obed jagach e kind dhano gi Nyasaye.—Jo-Hibrania 7:25.

To nade ka alamo Nyasaye to konchiel bende alamo jotakatifu?

E achiel kuom Chike Apar, Nyasaye nowacho niya: “An, Jehova Nyasachi, an Nyasaye ma janyiego.” (Wuok 20:5) Nyasaye en “janyiego” e yo mane? Muma mar New American Bible nigi weche moler e ndikono ma wacho ni Nyasaye “dwaro ni en kende e ma ji olame.” Nyasaye dwaro ni gimoro amora motudore gi lamo odhine mana en kende.—Isaiah 48:11.

Wachwanyo Nyasaye ahinya sama walamo gimoro amora kata ng’at moro amora mopogore kode, bed ni ng’atno en jatakatifu kata malaika. Kinde moro jaote Johana notemo lamo malaika moro. Malaikano nokwere ka wachone ni: “Kik itim kamano! An jatich wadu, ma tiyo kodi gi oweteni ma doko joneno kuom Yesu. Lam Nyasaye.”—Fweny 19:10.