Muma Wacho Ang’o e Wi Medo Remo?

Dwoko ma Muma chiwo

Muma chikowa ni kik wacham remo. Omiyo, ok wayie mondo wacham remo kata omedwago, bed ni en remo oduto kata ng’injo madongo maloso remo. Ne ane ndiko ma luwogi:

• Chakruok 9:4. Nyasaye ne oyie ne Noa gi joode mondo ocham ring’o bang’ Ataro, kata kamano, nochikogi ni kik gicham remo. Nyasaye ne onyiso Noa niya: “To ring’o gi ngimane, tiende ni rembe, e ma kik ucham.” Chikno omako dhano duto chakre kindeno nikech waduto wan nyikwa Noa.

• Tim Jo-Lawi 17:14. “Kik ucham remb gimoro amora nikech ngima gimoro amora nie rembe. Ng’ato ang’ata mochamo remo ibiro negi.” Nyasaye ne neno ni ngima ng’ato ni e remo kendo ngimano en mare. Kata obedo ni chikni ne omi oganda Jo-Israel, okonyowa ng’eyo kaka Nyasaye nokawo mapek wach chamo remo.

• Tich Joote 15:20. ‘Weri gi remo.’ Nyasaye ne omiyo Jokristo chik achiel achiel ma ne omiyo Noa. Weche mag histori nyiso ni Jokristo mokwongo notamore chamo remo kata tiyo kode e weche mag thieth.

Ang’o momiyo Nyasaye chikowa ni wawere gi remo?

Nonro ma osetim e weche mag thieth nyiso ni medo remo hinyo ngimawa. Kata kamano, gimomiyo Nyasaye chikowa ni wawere gi remo, en nikech oneno remo kaka gima ler.​—Tim Jo-Lawi 17:11; Jo-Kolosai 1:20.