Ang’o Momiyo Joneno mag Jehova ok Tim Nyasi mar Krismas?
Paro ma ok kare ma ji nigo
Miriambo: Joneno mag Jehova ok tim nyasi mar Krismas nikech ok giyie kuom Yesu.
Adiera: Wan Jokristo. Wayie ni warruok biro mana kokalo kuom Yesu Kristo.—Tich Joote 4:12.
Miriambo: Upogo Joot ka upuonjogi ni kik gitim nyasi mar Krismas.
Adiera: Wadewo joot kendo watiyo gi Muma e konyogi mondo gibed gi winjruok maber e kindgi.
Miriambo: Nikech ok utim nyasi mar Krismas, ok uyud mor mar bedo jochiwo, joma kelo kuwe e piny, kod bedo gi paro makare kuom jomoko.
Adiera: Pile ka pile watemo ahinya bedo jochiwo kendo jo mohero kuwe. (Ngeche 11:25; Jo-Rumi 12:18) Kuom ranyisi, yo ma watimogo chokruogewa kod lando wach maber luwore gi puonj mar Yesu ma wacho ni: “Nuyudo nono, omiyo chiwuru nono.” (Mathayo 10:8) E wi mano, wakonyo ji mondo oket genogi kuom Pinyruodh Nyasaye mabiro kelo kuwe madier e piny.—Mathayo 10:7.
Ang’o Momiyo Joneno mag Jehova ok Tim Nyasi mar Krismas?
Yesu nochiko ni wapar thone to ok nyuolne.—Luka 22:19, 20.
Joote kod jopuonjre Yesu mokwongo ne ok tim nyasi mar Krismas. New Catholic Encyclopedia wacho ni nyasi mar paro nyuol Yesu nochakore bang’ The tho mar joote.
Onge gima nyiso ni nonyuol Yesu Desemba 25; tarik ma ne onyuole ok ondik e Muma.
Wan gadier ni Nyasaye ok oyie gi Krismas, nikech nochak nyasino gi joma ne ok lam Nyasaye.—2 Jo-Korintho 6:17.
Ang’o ma monou time atima kaka jomoko?
Nitie joma pod timo nyasi mar Krismas kata obedo ni ging’eyo ni ok en puonj mar Muma kendo ni otudore gi lamo nyiseche manono. Joma kamago nyalo penjre kama: Ang’o ma dimi Jakristo opogore gi jomoko? Ang’o ma monowa time atima kaka jomoko?
Muma jiwowa ni wati gi “nyalowa mar paro.” (Jo-Rumi 12:1, 2) Bende onyisowa ni wamakre gi adiera. (Johana 4:23, 24) Omiyo, kata obedo ni wadewo ahinya gima jomoko paro e wiwa, wamakore chuth gi puonj mag Muma kata ka timo kamano biro miyo wabed mopogore gi jomoko.
Kata obedo ni ok watim nyasi mar Krismas, wachiwo luor ne yiero ma jomoko timo e wi wachni. Ok wadonjre gi chenro ma ng’ato oketo mag nyasino.