Ang’o ma Muma Wacho e Wi Kend mar Joma Wuok e Ogendni Mopogore Opogore?

Dwoko ma Muma chiwo

Nyasaye oyie gi kend e kind dichwo gi dhako ma wuok e ogendni mopogore opogore nikech ogendni duto rom e wang’e. Muma wacho kama: ‘Nyasaye ok buon ng’ato ang’ata kata bed ni oa e oganda mane.’​—Tich Joote 10:34, 35.

We wane ane moko kuom puonj mag Muma motudore gi kend e kind ogendni mopogore opogore.

Ogendni duto owuok kuom ng’at achiel

Dhano duto owuok kuom Adam gi chiege miluongo ni Hawa ma Muma wuoyo kuome ka luonge ni “min ji duto mangima.” (Chakruok 3:20) Mano e momiyo Muma wacho ni Nyasaye “noloso ogendni duto koa kuom ng’ato achiel.” (Tich Joote 17:26) Dhano duto gin joot achiel kata bed ni gia e oganda mane. To nade ka idak kama ibuone ji kaluwore gi oganda ma giae?

Joma riek “manyo rieko kuom ji”

Kata obedo ni Jehova oyie gi kend e kind joma wuok e ogendni mopogore opogore, nitie jomoko ma ok oyie gi wachno. (Isaya 55:8, 9) Ka ichano donjo e kend gi ng’at ma wuok e oganda mopogore, onego uwuo e wi weche ma luwogi:

• Ere kaka ubiro nyagoru gi akwede mowuok kuom ogandau kata joodu?

• Ere kaka unyalo konyo nyithindu mondo ging’e gima ginyalo timo sama ibuonogi?

“Manyo rieko” e yo ma kamano nyalo konyou mondo kend maru odhi maber.​—Ngeche 13:10; 21:5.