Nade ka Ji Kuodha?

Gimomiyo kuoth en gima lit

Kuoth moko litga ahinya. Kuom ranyisi, ng’ato nyalo wacho miriambo e wiyi mana ni mondo oketh nyingi. Kata ka gima owach kuomino ok en gima lich ahinya, kuoth pod nyalo bedo malit, ahinya-ahinya ka ifwenyo ni ng’at mowache en osiepni migeno!​—Zaburi 55:12-14.

“Nafwenyo ni osiepna moro wuoyoga marach e wiya sama aonge kode kowacho ni ok adewga jomamoko. Wachno ne litna ahinya! Akiya gimomiyo nonyalo wacho gima kamano e wiya.”​—Ashley.

Adiera: Bed ni ng’ama okuodhi en osiepni kata ooyo, onge ng’ama bedoga mamor sama iwuoyo kuome marach.

Gima rach en ni ok wanyal tamo ji kuotho

Ji nyalo kuotho nikech weche mopogore opogore, moriwo nyaka ma luwogi:

Gidwaro ng’eyo mana kaka ngimani dhi. Dhano gin chuech ma gomboga ng’eyo kaka ngima jowetegi dhi. Omiyo, en gima ong’ere ni wabiro wuoyo e wi jomamoko to gin bende giwuoyo e wiwa. Kata Muma bende jiwowa ni wang’i “gik ma kelo ber ne jomamoko.”​—Jo-Filipi 2:4.

“Wuoyo e wi jomamoko mitnega ji ahinya!”​—Bianca.

“Kiwacho awacha adier, aheroga wuoyo e wi ji sama an gi jomamoko. Akiya kata gimomiyo​—timo kamano mora amora.”​—Katie.

Sama gionge gima gitim. E kinde ma nindikoe Muma, ne nitie joma “ne ohero tiyo gi thuologi mag yueyo mana e goyo mbaka kata e winjo weche manyien.” (Tich Joote 17:21) Mano be e gima timore e kindewagi!

“Seche moko ka onge gimoro ma timore ma ji nyalo wuoye, gichakoga goyo mbaka e wi jomamoko.”​—Joanna.

Sama gidwaro mondo gin e modewgi. Nitie gimomiyo Muma nyisowa ni kik wapimre gi jomamoko. (Jo-Galatia 6:4) Kata kamano, nitie joma timoga kamano nikech gin e ma gidwaro ni odewgi kendo mano miyo gilando gik maricho e wi jomamoko.

“Joma wuoyoga marach e wi jomamoko nyisoga kido moro marach ma gin-go. Ginyisoga ni gin gi nyiego gi joma gikuodhogo. Giwachoga miriambo e wi jomamoko mondo giwinj ni gin e ma gibeyo moloyo jogo.”​—Phil.

Adiera: Bed ni idagi kata iyie, ji biroga wuoyo e wi jomamoko​—moriwo nyaka in.

Gima ber en ni ok ochuno ni weche mag kuoth omayi mor

Ok inyal tamo ji wuoyo e wiyi, kata kamano, inyalo yiero gima ibiro timo kata wacho sama ng’ato owuoyo marach kuomi. Kifwenyo ni nitie kaka iwuoyo marach e wiyi, nitie gik moko ariyo minyalo yiero timo.

MOKWONGO: Inyalo fwayo wachno. Ng’enyne, gima ber en weruok gi wechego ahinya-ahinya ka ok en wach moro malich. Luw weche ma Muma nyisowa ni: “Kik ibed ng’at ma chwanyore piyo.”​—Eklesiastes 7:9.

“Wach moro ne landore ni an osiep wuoyi moro​—wuoyi ma pok naromogo kata! Ka nawinjo gima kamano, nanyiero anyiera kae to awera gi wechego.”​—Elise.

“Bedo gi nying maber e ma biro miyo ilo joma kuodhi gi wach. Ka in-ga gi nying maber, kata ka po ni ji olando gik maricho e wiyi, ji matin e ma biro yie gi wechego. Adiera ma ji ong’eyo e wiyi biro miyo kik giyie gi gimoro amora marach ma giwinjo kuomi.”​—Allison.

Gima inyalo timo: Ndik piny (1) gima rach ma nowach e wiyi kod (2) kaka niwinjo e wi gima nowachno. Kisetimo kamano, “wach wecheni e chunyi ka in otandani,” kae to bang’e nyalo bedoni mayot weri gi wachno.​—Zaburi 4:4.

MAR 2: Inyalo wuoyo gi ng’ama nochako wechego. Seche moko wach mowach e wiyi nyalo bedo marach ahinya ma chuno ni iwuo gi ng’ama nochako wachno.

“Kichomo joma kuodhi miwachonegi weche ma ne giwacho e wiyi, gibiro fwenyo ni kare wechego nochoponi. E wi mano, timo kamano nyalo miyo irie wechego kendo tiekogi e yor kuwe.”​—Elise.

Ka pok iwuoyo gi ng’ama nowuoyo e wiyi marach, non ane puonj mag Muma ma luwogi, kae to ipenjri ane penjo moket kanyo motudore gi puonjgo.

• “Ka ng’ato dwoko wach ka pok owinjo weche duto, mano en fuwo kod wich-kuot.” (Ngeche 18:13) ‘Be ang’eyo weche duto? Dibed ni ng’at ma wacho weche maricho e wiyigo ne ok owinjogi maber?’

• “Bed ng’at ma winjo wach piyo, ma ok rikni e wuoyo, kendo ma iye ok wang’ piyo.” (Jakobo 1:19) ‘Be sani e sama owinjore wuoyoe gi ng’ama nokuodhano? Be an gadier ni ka awuoyo kode sani to weche dhi rumo e yo maber? Koso nyalo bedo maber weyo kinde okal matin mondo mirimba okuwe?’

• “Gik moko duto ma udwaro ni ji otimnu, un bende utimnegiuru kamano.” (Mathayo 7:12) ‘Ka dipo ni an e ma nakuodho ng’ato, dagombo ni ng’atno owuo koda e yo mane? Daher ni owuo koda e wi wachno kanye? Gin weche mage ma dagomb ni owachna, to owachgi e yo mane?’

Gima inyalo timo: Ka pok idhi ir ng’at ma nowuoyo e wiyi marach, ndik piny weche michano wachone. Bang’ juma achiel kata jumbe ariyo, som weche ma nindikogo kendo, kae to ine ane ka nitie lokruok moko minyalo timo e wechego. Bende, inyalo wuoyo gi janyuolni kata Jakristo motegno mosiepni e wi wachno kae to ipenje gima inyalo timo.

Adiera: Mana kaka gik mamoko e ngima, ok inyal tamo ji wuoyo e wiyi. Ok ochuno in iyie mondo gik ma giwachogo e ma ochik ngimani!