Weche Manie Bug Fweny Tiendgi Gin Ang’o?
Dwoko ma Muma Chiwo
E dho Grik bug Fweny iluongo ni A·po·kaʹly·psis kendo tiend nyin gno en “Elo e lela” kata “Fwenyo gimoro.” Nyingno lero tiend bug Fweny, ma en—elo e lela gik mopondo kendo fwenyo kaka gik moko biro timore e kinde mabiro. Thoth gik ma nokor e bugni pok otimore, kata kamano gichiegni timore.
Weche Machuok e wi Bug Fweny
Weche michakogo.—Fweny 1:1-9.
Weche ma Yesu nowacho ne kanyakla abiriyo.—Fweny 1:10–3:22.
Fweny manyiso Nyasaye ka nie kom duong’ne e polo.—Fweny 4:1-11.
Fweny mopogore opogore ma moro ka moro otudore gi machielo.
Kido abiriyo.—Fweny 5:1–8:6.
Turmbeta abiriyo, ma adek mogik kuom turmbetago kelo chandruoge adek.—Fweny 8:7–14:20.
Bakunde abiriyo, ma moro ka moro oting’o masira kata kum ma Nyasaye biro kelo e piny.—Fweny 15:1–16:21.
Fweny ma nyiso kaka ibiro tiek wasik Nyasaye.—Fweny 17:1–20:10.
Fweny ma nyiso gueth ma Nyasaye biro kelo e polo gi piny.—Fweny 20:11–22:5.
Weche mitiekogo.—Fweny 22:6-21.
Gik Manyalo Konyi Winjo Tiend Weche Manie Bug Fweny
Tiend weche manie bugno beyo, ok gikel luoro ne joma tiyone Nyasaye. Kata obedo ni ji mang’eny wachoga ni bug Fweny oting’o mana masiche madongo, bugno chako kendo tieko gi weche ma wacho ni joma some, winjo tiend wechego, kendo tiyo kodgi e ngimagi, biro bedo mamor.—Fweny 1:3; 22:7.
Bug Fweny tiyo gi “ranyisi” mathoth ma tiendgi opondo.—Fweny 1:1.
Ng’eny ranyisi motigo e bug Fweny, nosendik chon e buge mamoko manie Muma:
Jehova—‘Nyasachwa manie polo’ kendo Jachuech ma nochueyo gik moko duto.—Rapar mar Chik 4:39; Zaburi 103:19; Fweny 4:11; 15:3.
Yesu Kristo—“Nyarombo mar Nyasaye.”—Johana 1:29; Fweny 5:6; 14:1.
Satan Jachien—Jasik Nyasaye.—Chakruok 3:14, 15; Johana 8:44; Fweny 12:9.
Babulon Maduong’—en kaka Babulon machon (Babel), nikech en jasik Nyasaye gi joge kendo en e chakruok mar miriambo mag dinde.—Chakruok 11:2-9; Isaiah 13:1, 11; Fweny 17:4-6; 18:4, 20.
“Nam”—dhano maricho ma kwedo Nyasaye.—Isaiah 57:20; Fweny 13:1; 21:1.
Gik machal gi ma ne itiyogo e tabanakel machon e lamo Nyasaye. Gigo gin kaka; sandug singruok, nam mar kio (besen miluokruokgo), teyni, chiwo ubani, kendo mar misango.—Wuok 25:10, 17, 18; 40:24-32; Fweny 4:5, 6; 5:8; 8:3; 11:19.
Ondiek—ochung’ ne loje mag dhano.—Daniel 7:1-8, 17-26; Fweny 13:2, 11; 17:3.
Kwan motigo e yor ranyisi.—Fweny 1:20; 8:13; 13:18; 21:16.
Fwenygo otudore gi “ndalo mar Ruoth,” ma ne ochakore ka ne Pinyruodh Nyasaye nochako locho e higa mar 1914. Higano e ma Yesu ne ochako locho kaka Ruoth. (Fweny 1:10) Omiyo, wanyalo bedo gadier ni weche ma nokor e bug Fweny biro timore e kindewagi.
Mondo wawinj tiend weche manie bug Fweny, dwarore ni wabed gi gik ma konyowaga winjo tiend weche mondik e Muma duto, ma gin rieko moa kuom Nyasaye gi kony ma wuok kuom joma oseng’eyo tiend weche manie bugno.—Tich Joote 8:26-39; Jakobo 1:5.