PENJO MA ROWERE OHERO PENJORE

Ang’o Momiyo Onego Alem?

Rowere mang’eny wachoga ni gilemoga, kata kamano, ok gitimga kamano pile ka pile. Onge kiawa ni moko kuomgi penjorega niya: Be lemo en gima miyo awinjo awinja maber koso en gima okalo kanyo?’

Lemo en ang’o?

Lemo en wuoyo gi Jachuech mar gik moko duto. Parie apara wachno! Jehova duong’ moloyo dhano e yore te kata kamano, “ok en mabor gi ng’ato ka ng’ato kuomwa.” (Tich Joote 17:27) Muma nyisowa niya: “Suduru machiegni gi Nyasaye to en bende nosud iru.”—Jakobo 4:8.

Ere kaka wanyalo sudo machiegni gi Nyasaye?

Yo achiel en kokalo kuom lemo nikech mano e yo ma wawuoyogo gi Nyasaye.
Yo machielo en ka wasomo Muma nikech mano e yo ma Nyasaye wuoyogo kodi.

Sama walemo kendo wasomo Muma, mano biro konyowa bedo gi osiep motegno gi Nyasaye.

“Wuoyo gi Jehova ma en Ng’at Mamalo Chutho en achiel kuom thuolo makende ahinya ma dhano nyalo bedogo.”—Jeremy.

“Lemo ka anyiso Jehova gik manie chunya ma iye miyo asudo machiegni kode.”—Miranda.

Be Nyasaye winjo lamowa?

Kata obedo ni iyie kuom Nyasaye kendo ilemoga, nyalo bedo matek yie ni owinji sama ilemo. Muma luongo Jehova ni “Jawinj lamo.” (Zaburi 65:2) Muma jiwowa ni ‘waket parruokwa duto kuome.’ Nikech ang’o? ‘Nikech odewowa.’—1 Petro 5:7.

Par wachni: Be ikawoga thuolo mar wuoyo gi osiepeni pile ka pile? Inyalo wuoyo gi Nyasaye pile ka pile. Wuo kode pile ka pile kendo itim kamano kitiyo gi nyinge ma Jehova. (Zaburi 86:5-7; 88:9) Muma jiwowa ni ‘walem kinde duto.’—1 Jo-Thesalonika 5:17.

“Sama alemo, agoyo mbaka gi wuonwa manie polo kendo anyisega gik moko duto manie chunya.”—Moises.

“Awuoyoga gi Jehova ka alerone gik moko duto e yo matut mana kaka anyalo timo ne mamawa kata osiepna moro.”—Karen.

Anyalo lemo e wi ang’o?

Muma wacho niya: “To kuom gik moko duto, kulamo kendo kusayo kaachiel gi goyo erokamano, nyisuru Nyasaye kwayou.”—Jo-Filipi 4:6.

Be mano nyiso ni en gima rach lemo e wi chandruoge ma iyudo? Ooyo! Muma jiwowa niya: “Bol ting’ mari kuom Jehova, to obiro konyi.”—Zaburi 55:22.

En adier ni sama ilemo, ok onego iwuo awuoya e wi chandruoge miyudo. Nyako moro miluongo ni Chantelle wacho kama: “Osiep manie kindi gi Jehova ok nyal dhi maber ka kinde duto ikwaye akwaya kony. Aparo ni onego akwong ago erokamano kendo list mar gigo onego obed mabor.”

Par wachni: Gin gik mage e ngimani minyalo goyonego Nyasaye erokamano? Be inyalo paro gik moko adek ma nyalo miyo igone Jehova erokamano kawuono?

“Gimoro matin kaka ng’iyo ang’iya ber mar maua, nyalo miyo igone Jehova erokamano.”—Anita.

“Par matut e wi chuech moro ma moriga, kata Ndiko moro ma muloga chunyi kae to igone Jehova erokamano kuom gigo.”—Brian.

Gik mbeseni wacho

“Lamowa onego obed matut kaka pi manie nam to ok ma thany thany kaka pi matin mogudore kamoro. Jehova dwaro konyowa kendo ong’eyo gik ma chandowa kata ka pok wanyise. Kata kamano, wanyalo nyiso ni wageno kuome ka wanyise gigo e yo matut kata obedo ni ong’eyogi.”—Moises.

“Lemo chal ka tol ma amako koni to Jehova omako komachielo. Sama alemo ka awacho gik manie chunya ma iye, chal ka gima amako tolno motegno to Jehova bende mako komachielo motegno. Mano miyo wabedo gi winjruok motegno e kindwa.”—Miranda.

“Ka ok watang’, lamowa nyalo pong’ mana gi kwayo gik moko. Kata kamano, ka wagoyo ne Jehova erokamano, mano konyowa bedo mamor gi gik mabeyo ma osemiyowa kendo waketo pachwa e gik mamoko to ok mana kuomwa wawegi.”—Jeremy.

“Kaka wamedo goyo ne Jehova erokamano e kaka wamedo bedo mamor. Lemo ka wagoyone Jehova erokamano konyowa keto pachwa kuom gueth ma wayudo kar keto pachwa mana kuom chandruoge ma waromogo.”—Shelby.