Muma Wacho Ang’o e Wi Hera ma Ng’ato Oherorego Owuon?
Dwoko ma Muma chiwo
Muma wacho ni ok en gima rach ka ng’ato oherore owuon e okang’ mowinjore. Hera ma kamano oriwo rito dendi obed maler, miyori luor, kendo bedo gi paro mowinjore. (Mathayo 10:31) Muma wuoyo kuom hera ma ok okalo tong’ kendo ojiwo ji mondo kik gibed joguondo.
En ng’ano monego waher mokwongo?
Hero Nyasaye e ma onego obed motelo e ngimawa. Muma puonjo ni chik maduong’ie moloyo en ma: “Nyaka iher Jehova Nyasachi gi chunyi duto.”—Mariko 12:28-30; Rapar mar Chik 6:5.
Chik maduong’ie mar ariyo en ma: “Nyaka iher wadu kaka iherori iwuon.”—Mariko 12:31; Tim Jo-Lawi 19:18.
Kata obedo ni Muma ok nyiswa achiel ka achiel ni waherre wawegi, chik ma wacho ni “iher wadu kaka iherori iwuon” nyiso ni en gima ber ka ng’ato oherre owuon e yo ma ok kal tong’.
En ng’ano ma Yesu nohero mokwongo?
Yesu nonyisowa kaka wanyalo hero Nyasaye, hero jowetewa kendo herore wawegi. Nonyiso jopuonjrene ni giluw ranyisi mare.—Johana 13:34, 35.
Nohero Jehova Nyasaye mokwongo kendo nochiwore mondo otim dwach Nyasaye. Nowacho niya: “Mondo piny ong’e ni ahero Wuora, atimo mana kaka Wuora osechika ni atim.”—Johana 14:31.
Yesu nohero jowetene, to nonyiso mano kuom konyogi kendo chiwonegi ngimane.—Mathayo 20:28.
Nonyiso ni noherre owuon kuom bedo gi thuolo mar yueyo, chiemo, kendo bedo kanyachiel gi jolupne gi joma ne nyalo bedo jopuonjrene.—Mariko 6:31, 32; Luka 5:29; Johana 2:1, 2; 12:2.
Be hero jomoko moloyo kaka iherori nyalo moni bedo mamor kata nyiso ni ok imiyori luor?
Ooyo. Nochuewa e kit Nyasaye, to kido maduong’ ma Nyasaye nigo en hera. (Chakruok 1:27; 1 Johana 4:8) Mano nyiso ni nochuewa gi nyalo mar hero jomamoko. Hera ma waherorego nigi tong’. Wabedo mamor ahinya ka wahero Nyasaye moloyo gimoro amora kendo keto pachwa e timo ne ji gik mabeyo. Muma wacho niya: “Chiwo kelo mor mang’eny moloyo kawo.”—Tich Joote 20:35.
E kindegi, ng’eny ji wacho ni ng’ato yudo mor madier mana ka oherore owuon. Gineno ni ng’ato onego “oherre owuon” kar “hero nyawadgi.” Kata kamano, nonro mosetim nyiso maler ni ng’ato bedo gi ngima maber kod mor madier mana kuom luwo puonj manie Muma ma wacho niya: “Kik ng’ato odwar mana gik ma kelone ber owuon, to odwar ma kelo ber ne ng’at machielo.”—1 Jo-Korintho 10:24.