Be Law Kitani Mantie Turin e ma Notuego Ringre Yesu ka Pok Oyike?

Dwoko ma Muma chiwo

Muma ok wuo kuom law kitani mantie Turin. Ng’eny ji paro ni law kitanino e ma ne otuego ringre Yesu ka pok oyike. Nikech paro ma ji nigono, lawno en achiel kuom gik maler ma Jokristo mag miriambo ogeno ahinya. Lawno okan maber ahinya e kanisa moro maduong’ man e taon mar Turin e piny Italy.

Be Muma wacho ni law kitani mantie Turin e ma notuego ringre Yesu ka ne pok oyike? Ooyo.

Ne ane weche adek miwacho kuom lawno kod kaka opogore ahinya gi gima Muma wacho.

1. Bor mar law kitano en sentimita 442 to lachne en sentimita 113 kendo olwor dhoge gi law moro matin ma romo sentimita 8.

   Gima Muma wacho: Ringre Yesu nonal gi lewni mang’eny, to ok law kitani achiel. Wiye notwe gi law mopogore. Ka Yesu ne osechier, achiel kuom jootene nobiro e liel, kendo “noneno lep kitani kanyo.” Muma medo niya: “Law ma noyudo oket e wiye ne ok nigi mamoko, to ne en kar kende kodole.”​—Johana 20:6, 7.

2. Law kitanino nigi alama moko kendo ji paro ni samoro gin alama mag remb ng’at motho ma ne ok olwoki.

   Gima Muma wacho: Ka ne Yesu otho, jopuonjrene noiko ringrene “mana kaka Jo-Yahudi ne timoga ka giyiko ng’ato.” (Johana 19:39-42) Mano noriwo lwoko ringre ng’at motho, wire gi mo, kendo ketone gik ma nigi suya mamit ka pok oyike. (Mathayo 26:12; Tich Joote 9:37) Omiyo, nyaka bed ni joote Yesu nolwoko ringre Yesu ka pok giboye gi lewni.

3. Kaluwore gi Encyclopædia Britannica, law kitanino nigi picha mar ng’at moro ma “opiel e nus mar lawno kae to nus machielo oumgo wiye gi dende.”

   Gima Muma wacho: Jopuonjre Yesu nowuoyo e wi thone, liende ma nodong’ nono, kod neno mar mon moko ma nowacho ni “malaike bende nofwenyorenegi monyisogi ni ongima.” (Luka 24:15-24) Ka dine bed ni law kitani ne nie liel, jopuonjre Yesu dine owuoyo kuom lawno kod kaka nochalo. Kata kamano, Muma ok wach gima kamano.

Be ji onego olam law kitanino?

Ooyo. Kata ka dine bed ni notue ringre Yesu gi law kitanino, lamo law ma kamano ok en gima owinjore. Ne ane Ndiko moko ma lero wachno.

1. Ok en gima owinjore. Yesu nowacho niya: “Nyasaye en Roho kendo jo ma lame nyaka lame kuom roho kod adiera.” (Johana 4:24) Sanamu ok tigo e lamo madier.

2. Chik ne kwero timo gima kamano. Chike Apar ne kwedo lamo sanamu. (Rapar mar Chik 5:6-10)Muma bende chiko Jokristo niya: “Tang’uru ne sanamu.” (1 Johana 5:21) Jomoko nyalo wacho ni law kitanino ok en sanamu to en mana gima nyiso yie ma Jokristo nigo. Kata kamano, gimoro nyalo bedo sanamu ka ng’ato lame.a Omiyo, ng’at ma dwaro moro Nyasaye ok bi miyo gimoro amora duong’ kata lame, to mano oriwo nyaka law kitani miparo ni ne oyikgo Yesu.