Ang’o ma Muma Puonjo e Wi Dhum gi Dhok Mopogore Opogore?
Dwoko ma Muma chiwo
“Dhum gi dhok mopogore opogore” en nyalo ma Jokristo mokwongo noyudo e yor hono, ma ne okonyogi wuoyo e dhok ma ne ok ging’eyo. (Tich Joote 10:46) Ka ng’ato nong’eyo dhok ma ne idhumgono, nonyalo winjo tiend weche miwacho. (Tich Joote 2:4-8) Dhum gi dhok mopogore opogore ne en achiel kuom mich mag roho ma ne Nyasaye omiyo moko kuom Jokristo mokwongo.—Jo-Hibrania 2:4; 1 Jo-Korintho 12:4, 30.
Dhum gi dhok mopogore opogore nochakore karang’o to notimore kanye?
Hononi ne okwongo timore Jerusalem gokinyi, ka ne Jo-Yahudi timo Sawo mar Pentekost e higa mar 33 Bang’ Kristo. Jopuonjre Yesu ma dirom 120 ne ochokore kanyachiel mi “roho maler nopong’ogi giduto kendo ne gichako wuoyo gi dhok mopogore opogore.” (Tich Joote 1:15; 2:1-4) Oganda maduong’ “ma noa e ogendni duto e piny” nochokore kendo “ng’ato ka ng’ato kuomgi ne winjo ka jopuonjrego wacho dhogi.”—Tich Joote 2:5, 6.
Ang’o momiyo ji ne dhum gi dhok mopogore opogore?
Ne en gima nyiso ni Nyasaye ne tayo Jokristo. E kinde mokalo, Nyasaye notiyo gi honni mopogore opogore mondo onyisgo ni ne otayo joge momakore kode kaka Musa. (Wuok 4:1-9, 29-31; Kwan 17:10) Dhum e dhok mopogore opogore bende ne nyiso maler ni Nyasaye ne tayo kanyakla mag Jokristo ma nochak manyien. Jaote Paulo nowacho kama: “Dhum gi dhok mopogore opogore ok en ranyisi ne jo ma ni e yie, to en ranyisi ne jo ma ok ni e yie.”—1 Jo-Korintho 14:22.
Mondo okony Jokristo chiwo neno e yo mong’ith. Joma nowinjo jolup Yesu chieng’ Pentekost nowacho niya: “Wawinjo jogi ka wuoyo e wi tije madongo mag Nyasaye e dhowa wawegi.” (Tich Joote 2:11) Omiyo, gimachielo maduong’ ma ne miyo Jokristo dhum en ni mondo ‘gichiw neno e okang’ mong’ith’ kendo ‘gidhi e ogendni duto mondo gilok ji obed jopuonjre,’ mana kaka Yesu nochiko. (Tich Joote 10:42; Mathayo 28:19) Ji ma dirom 3,000 ma noneno ka ji dhum kendo ma nowinjo neno ma nochiw nobedo jopuonjre chieng’no.—Tich Joote 2:41.
Be dhum gi dhok mopogore opogore ne dhi siko?
Ooyo. Mich mag roho maler moriwo dhum gi dhok mopogore opogore ne ok dhi siko. Muma nokoro kama: “Ka nitie mich mag koro wach, gibiro lal nono; ka nitie dhum gi dhok mopogore opogore, gibiro rumo.”—1 Jo-Korintho 13:8.
Dhum gi dhok mopogore opogore norumo karang’o?
Joote ne nyalo pogone Jokristo mamoko mich mag roho maler. Kinde mang’eny, ne gitimo kamano kuom keto lwetegi kuom Jokristogo. (Tich Joote 8:18; 10:44-46) Nenore ni joma joote nomiyo michno ne ok opogone jomamoko michno. (Tich Joote 8:5-7, 14-17) Kuom ranyisi, sirkal nyalo miyo ng’ato lesen mar riembo, kata kamano, ok oyiene ng’atno chiwe ne ng’at machielo. Nenore ni mich mar dhum gi dhok mopogore opogore ne orumo e kinde ma joote kaachiel gi joma ne gimiyo michgo ne otho.
To nade joma dhum e kindegi?
Nenore ni hono mar dhum gi dhok mopogore opogore ne orumo e kinde Jokristo mokwongo. E kindegi, onge ng’ato ang’ata ma nyalo wacho ni odhum gi teko Nyasaye.a
Ere kaka inyalo fweny Jokristo madier?
Yesu nowacho ni hera e ma ne idhi fwenygo jopuonjrene. (Johana 13:34, 35) Jaote Paulo bende nowacho ni hera e ma ne idhi fwenygo Jokristo madier kinde duto. (1 Jo-Korintho 13:1, 8) Nowacho ni roho maler mar Nyasaye ne dhi miyo Jokristo obed gi kido ma Muma luongo ni “olembe ma roho nyago.” Hera e kido mokwongo kuom olembego.—Jo-Galatia 5:22, 23.
a Som sula ma wacho ni “Uwezo wa Kusema kwa Lugha—Je, Unatoka kwa Mungu?”