Chike Apar mag Nyasaye Gin Mage?

Dwoko ma Muma chiwo

Magi gin chike ma Nyasaye ne omiyo oganda mar Jo-Israel. Chikegi bende iluongo ni Weche Apar, ma en wach molok aching’ koa e dho Hibrania ma en ʽaseʹreth had·deva·rimʹ. Wachni otigo nyadidek e buge abich mokwongo mag Muma ma bende iluongo ni Pentateuch (Torah). (Wuok 34:28; Rapar mar Chik 4:13; 10:4) Wach machalo kode e dho Grik en deʹka (apar) loʹgous (weche), to mano e momiyo nochak luong chikego ni “Decalogue” e dho Kisungu.

Nyasaye nondiko Chike Apargo e kite ariyo mopamore ma omiyogi Musa e Got Sinai. (Wuok 24:12-18) Chike Apargo yudore e Wuok 20:1-17 kod Rapar mar Chik 5:6-21.

• Chike Apar

• Ang’o momiyo yo mochan-go Chike Apargo opogore?

• Ang’o momiyo nochiw Chike Apar?

• Be Jokristo nyaka rit Chike Apargo?

• Be Chike Apargo nyalo konyowa e kindegi?

• Puonj ma wayudo e Chike Apar miwuoyo kuomgi e Muma Manyien

Chike Apar

1. Lam Jehova kende.​—Wuok 20:3.

2. Kik ilam sanamu.​—Wuok 20:4-6.

3. Kik iti gi nying Jehova Nyasachi e yo marach.​—Wuok 20:7.

4. Rit Sabato.​—Wuok 20:8-11.

5. Luor jonyuolni.​—Wuok 20:12.

6. Kik ineki.​—Wuok 20:13.

7. Kik ichodi.​—Wuok 20:14.

8. Kik ikwel.​—Wuok 20:15.

9. Kik ichiw neno mar miriambo.​—Wuok 20:16.

10. Kik igomb gir ng’ato.​—Wuok 20:17.

Ang’o momiyo yo mochan-go Chike Apargo opogore?

Muma ok ried chikego komiyo moro ka moro kuomgi nambane. Mano e momiyo ji nigi paro mopogore opogore e wi kaka onego ochan chikego. Kinde mang’eny ichanogiga kaka oriedgi malo kae. Kata kamano, jomamoko chanoga Chike Apargo e yo mopogore. Pogruokno nitie e yo michanogago chik mokwongo, mar ariyo, to kod mogik.a

Ang’o momiyo nochiw Chike Apar?

Chik Musa noriwo nyaka Chike Apar. Chik Musa noting’o chike mokalo 600 kendo gin e ma ne oti kodgi e singruok ma ne Nyasaye otimo gi oganda Jo-Israel. (Wuok 34:27) Nyasaye nosingo ne Jo-Israel ni ne gidhi yudo gueth ka giluwo Chik Musa. (Rapar mar Chik 28:1-14) Kata kamano, gima duong’ momiyo nomigi Chikno en ni mondo okonygi giikre ne biro mar Mesia kata Kristo ma nosingi.​—Jo-Galatia 3:24.

Be Jokristo nyaka rit Chike Apargo?

Ooyo. Nyasaye nochiwo Chik ne oganda Jo-Israel kende to Chikno noriwo Chike Apar. (Rapar mar Chik 5:2, 3; Zaburi 147:19, 20) Jokristo ok nie bwo Chik Musa kendo kata mana Jo-Yahudi ma Jokristo bende ne ‘ogony kuom Chik.’ (Jo-Rumi 7:6)b “Chik Kristo,” ma en chik moriwo gik moko duto ma Yesu nochiko jolupne mondo otim, e ma ne okawo kar Chik Musa.​—Jo-Galatia 6:2; Mathayo 28:19, 20.

Be Chike Apargo nyalo konyowa e kindegi?

Ee. Chike Apargo fwenyonwa paro ma Nyasaye nigo, omiyo, ka wasomogi to ginyalo konyowa. (2 Timotheo 3:16, 17) Chike Apargo otenore kuom puonj ma wanyalo geno kendo ma biro konyowa kinde duto. (Zaburi 111:7, 8) Bende, thothgi e ma siro adiera ma yudore e ndiko ma ong’ere kaka Muma Manyien.​—Som kama wacho ni “Puonj ma wayudo e Chike Apar miwuoyo kuomgi e Muma Manyien.”

Yesu nopuonjo ni Chike duto mag Musa moriwo nyaka Chike Apar, notenore kuom chike ariyo madongo. Nowacho niya: “‘Nyaka iher Jehova Nyasachi gi chunyi duto, gi ngimani duto, kendo gi pachi duto.’ Mani e chik maduong’ie moloyo kendo mokwongo. Mar ariyo ma chal kode e ma: ‘Nyaka iher wadu kaka iherori iwuon.’ Chike ariyogi e ma Chik duto . . . otenoree.” (Mathayo 22:34-40) Omiyo, kata obedo ni Jokristo ok nie bwo Chik Musa, ichikogi ni giher Jehova kaachiel gi jowetegi.​—Johana 13:34; 1 Johana 4:20, 21.

Puonj ma wayudo e Chike Apar miwuoyo kuomgi e Muma Manyien