Ang’o ma Muma Wacho e Wi Bedo gi Mirima?

Dwoko ma Muma chiwo

Muma puonjowa ni mirima kata ich-wang’ ok ber nikech ohinyo ng’at man kode kaachiel gi joma ni machiegni kode. (Ngeche 29:22) Kata obedo ni nitie seche moko minyalo bedo gi mirima, Muma wacho ni joma dhi nyime bedo gi “mirima mager” ok nyal yudo resruok. (Jo-Galatia 5:19-21) Muma oting’o puonj ma nyalo konyowa geng’o mirima.

• Be bedo gi mirima rach kinde duto?

• Gin kinde mage ma ok ber bedo gi mirima?

• Ere kaka inyalo geng’o mirima?

• Ndiko ma wuoyo e wi mirima

Be bedo gi mirima rach kinde duto?

Ooyo. Nitie kinde moko ma ng’ato nyalo bedo gi mirima. Kuom ranyisi, Nehemia ne ‘iye owang’’ ka ne ofwenyo ni nitie jotich Nyasaye wetene moko ma ne isando.​—Nehemia 5:6.

Nyasaye be kinde moko bedoga gi mirima. Kuom ranyisi, ka ne jotichne moko machon oketho winjruok ma ne en-go kodgi mi gichako lamo nyiseche manono, “nobedo gi mirima.” (Jobura 2:13, 14) Kata kamano, mirima ok e kido maduong’ ma Jehova Nyasaye nigo. Kinde duto nitiega gimomiyo obedo gi mirima kendo ok obed gi mirima mokalo tong’.​—Wuok 34:6; Isaya 48:9.

Gin kinde mage ma ok ber bedo gi mirima?

Bedo gi mirima mokalo tong’ kata bedo abeda kode ma onge gimomiyo ok en gima ber. Kata kamano dhano morem to bedoga gi mirima ma kamano. Kuom ranyisi:

• Kain nobedo gi “mirima mager” ka ne Jehova ok oyie gi misango ma ne ochiwo. Kain noweyo ma mirima oloye mochopo kama onego owadgi.​—Chakruok 4:3-8.

• Kane Nyasaye okecho Jo-Nineve, “wachno ne owang’o i Jona ahinya.” Nyasaye ne orieyo Jona konyise ni ‘ok ber mondo obed gi mirima,’ kar mano onego okech joricho ma ne olokorego.​—Jona 3:10–4:1, 4, 11.a

Ranyisigo nyiso maler ni “mirimb dhano ok chop gima kare e wang’ Nyasaye.”​—Jakobo 1:20.

Ere kaka inyalo geng’o mirima?

• Ng’e rach minyalo yudo sama in gi mirima mager. Jomoko nyalo paro ni golo mirimbgi nyiso ni gitek. To kuom adier, ng’at ma ok nyal geng’o mirimbe nigi nyawo maduong’ ahinya. Muma wacho kama: “Ng’at ma ok nyal geng’o mirimbe, chalo mana gi dala ma omonji, kendo ma ohingage omukore.” (Ngeche 25:28; 29:11) Omiyo, wanyiso ni wariek kendo watek gadier mana ka wageng’o mirimbwa. (Ngeche 14:29) Muma wacho niya: “Ng’at ma iye ok wang’ piyo ber moloyo ng’at ma ratego.”​—Ngeche 16:32.

• Geng’ mirimbi ka pok omiyo itimo gima nyalo miyo iyuag ang’e. Zaburi 37:8 wacho niya: “We mirima, kendo kik iwe iyi owang’.” Omedo bende niya: “Kik iyi wang’, mano nyalo miyo idonj e richo.” Ka iwa owang’, nitie yiero ma onego watim, tiende ni wanyalo geng’o mirimano ka pok ‘wadonjo e richo.’ Jo-Efeso 4:26 wacho niya: “Beduru gi mirima, to kik utim richo.”

• Ka nyalore, wuog sama iyi ochako wang’. Muma wacho niya: “Tugo dhawo chalo gi yawo ranga nam; ka pok dhawo omuoch, wuogi.” (Ngeche 17:14) Kata obedo ni ber ka ji oloso weche mapiyo, pod unyalo kawo thuolo mar kuwe mos ka pok uchako wuoyo e wi weche ma ochwanyou.

• Non weche duto. Ngeche 19:11 wacho niya: “Rieko miyo i ng’ato ok wang’ piyo”. Wanyiso rieko ka po ni wakwongo wanono weche duto ka pok wang’ado paro e wi wach moro. Ka wachiko itwa mi wawinjo weche duto, mano nyalo konyowa kueyo mirima.​—Jakobo 1:19.

• Lem mondo ibed gi chuny mokuwe. Lamo nyalo konyi yudo “kuwe mar Nyasaye ma loyo ng’eyo duto.” (Jo-Filipi 4:7) Lamo en achiel kuom yore madongo ma wanyalo yudogo roho maler kendo rohono e ma konyowa bedo gi kido kaka kuwe, horuok, kod ritruok.​—Luka 11:13; Jo-Galatia 5:22, 23.

• Ti gi rieko e yiero osiepeni. Waheroga kopo gik ma osiepewa timo. (Ngeche 13:20; 1 Jo-Korintho 15:33) Mano e momiyo Muma siemowa niya: “Kik imak osiep gi ng’at ma jamirima kata kik iriwri gi ng’at ma iye wang’ piyo.” Nikech ang’o? “Di po ka ipuonjori yorene ma idonjo e obadho.”​—Ngeche 22:24, 25.