Ang’o ma Muma Wacho e Wi Bedo Jochiwo?
Dwoko ma Muma chiwo
Muma jiwowa ni wabed jochiwo kendo watim kamano gi chunywa duto kendo gi paro mowinjore. Bende, onyisowa ni seche ma wachiwo, joma wamiyo mich bedo mamor to wan bende wabedo mamor. (Ngeche 11:25; Luka 6:38) Yesu nowacho niya: “Chiwo kelo mor mang’eny moloyo kawo.”—Tich Joote 20:35.
Gin kinde mage ma Nyasaye mor ka wabedo jochiwo?
Nyasaye mor ka wachiwo gigewa gi chunywa duto. Muma wacho niya: “Ng’ato ka ng’ato otim mana kaka oseng’ado ei chunye, ok gi chuny matek kata e yor achune, nimar Nyasaye ohero ng’at ma chiwo gi ilo.”—2 Jo-Korintho 9:7.
Chiwo gigewa gi chunywa duto, en achiel kuom yore ma walamogo Nyasaye. (Jakobo 1:27) Ng’at mohero konyo jochan, timo gima Nyasaye ohero kendo Nyasaye neno gima otimono kaka gowi. (Ngeche 19:17) Muma nyiso ni Nyasaye owuon biro chulo ng’at ma jachiwono.—Luka 14:12-14.
Gin kinde mage ma Nyasaye ok mor ka wabedo jochiwo?
Ka ng’ato ogolo chiwo gi paro ma ok owinjore. Kuom ranyisi:
Mondo omor jomamoko.—Mathayo 6:2.
Mondo en bende ochule bang’e.—Luka 14:12-14.
Mondo oyud warruok.—Zaburi 49:6, 7.
Ka chiwono ibiro tigo e timo gik ma Nyasaye ok oyiego. Kuom ranyisi, ok en gima owinjore chiwo pesa ne ng’at ma dwaro tiyo gi pesago e tuke mag loyo mich (betting), nyiewo yedhe mamero ji, kata madhogo kong’o asasa. (1 Jo-Korintho 6:9, 10; 2 Jo-Korintho 7:1) Bende, ok en gima owinjore chiwo pesa ne ng’at ma ok dwar tich, to en gi nyalo mar timo kamano.—2 Jo-Thesalonika 3:10.
Ka wakonyo jomoko ahinya to konchiel wajwang’o joodwa. Muma puonjo ni wiye udi nyaka chiw gik ma dwarore ne joutegi. (1 Timotheo 5:8) Ok en gima kare ka wiye udi konyo jomamoko ahinya to konchiel to gijwang’o joutegi. Yesu bende nokwedo joma notamore rito jonyuolgi moti, ka girendore ni gik moko duto ma ne gin-go ne gin “mich mowal ne Nyasaye.”—Mariko 7:9-13.