Bug Puonjruok Muma Molos e Yo Mopogore Ahinya

E dwe mar Januar 2021, Bura Matayo nolando buk manyien mipuonjruokgo Muma gi ji miluongo ni Inyalo Dak gi Mor Nyaka Chieng’!a Lendono nomiyo iwinjo nade? Matthew ma wuok Canada wacho kama: “Namor aduwa! Namedo bedo mamor ka nawinjo twege kendo neno vidio ma ne lero gimomiyo nolos bugno, kod kaka nomi jolendo mopogore opogore mondo otemie tiyo kode. Ne an gi siso mar neno bugno kendo tiyo kode.”

Bug Inyalo Dak gi Mor Nyaka Chieng’! nigi yo mopogore ahinya mipuonjruokgo gi ji Muma. Kata kamano, mano kende ok e pogruok ma bugni nigo kopime gi buge mamoko ma wasebedo ka watiyogo e puonjo ji Muma. Ka po ni isebedo kitiyo gi kopi mar bugno mogo e otas, nyalo bedo ni isefwenyo ni kalatesene opogore ahinya. Mondo wane gimomiyo wawacho kamano, we wane ane kaka olos bugno.

Buk Manyien Molos e Yo Mopogore Ahinya

Olose gi kalatese mapek. Ang’o momiyo ne dwarore ni olose gi kalatese kaka mago? Bug Inyalo Dak gi Mor Nyaka Chieng’! nigi pichni mokalo 600 mobuk mabeyo, mohingo nyadipar kwan mar pichni duto manie bug Gima Muma Puonjo. Kalatese mag bugno bende nigi kuonde mang’eny ma ok ondikie gimoro, kata ma ok ogorie pichni. Nikech weche ariyogo, ka di ne oti gi kalatese mayot, pichni manie ite moro ne nyalo nenore e ite machielo, kata ka ne ginyalo nenore ma mirimiri. Mondo mano kik timre, Migawo Mochung’ne Goyo Buge e Piny Ngima man Wallkill, New York, e piny Amerka, notemo tiyo gi kalatese mopogore opogore ang’wen mitiyogago e goyo buge. Komiti mar Ndiko mar Bura Matayo nonono kalatesego, kendo ne giyiero kalatas mapek moloyo e kalatesego. Kata obedo ni kalatas ma ne giyierono nengone ohingo nengo mag kalatese mamoko ma osebed kitiyogo e goyo bugewa gi pasent ma dirom 16, ober nikech omiyo japuonjre somo bug Inyalo Dak gi Mor Nyaka Chieng’! ma pichni me ite machielo ok ochoche.

Olos toke e yo mopogore. Tok buk manyienno opogore ahinya gi tok bugewa mamoko nikech omwone gi jwala moro motegno. Kar tiyo gi jwala mitiyogago pile e tok buk, noti gi jwala moro motegno mamiyo pichni man e tok buk nenore maler. Jwalano bende konyo mondo bugno osik ka ler nikech wabiro tiyo kode kinde mang’eny. Kata kamano, nengo jwala motigono nyalo hingo nengo jwala mitiyogago pile e mwono tok bugewa nyadibich. Kuom mano, ofise mopogore opogore notimo matek mondo ging’iew jwala motegnono e nengo ma ok tek ahinya.

Ang’o momiyo noti gi gik ma nengogi tek kamano e loso bugno? Owadwa moro ma tiyo e Migawo Mochung’ ne Goyo Buge e Piny Ngima wacho kama: “Nikech bugno ibiro tigo nyading’eny, dwaher ni osik koler kinde duto.” Eduardo ma tiyo e Migawo Mochung’ ne Goyo Buge e ofiswa ma Brazil wacho kama: “Wamor ahinya ni riwruok mar oganda Jehova notiyo gi gik mabeyo mondo bugni onen ma jaber, obudh, kendo obed mayot tiyogo, ka e sechego bende gitiyo maber gi chiwo mag owete.”

Goyo Buge e Kinde Tuwo mar Korona

Ne wachako goyo bug Inyalo Dak gi Mor Nyaka Chieng’! e dwe mar Mach 2021. Mago e kinde ma tuo mar korona ne landoree, to mano nomiyo waromo gi pek moko. Nikech Bethel duto ne nie lockdown, owete ma biroga konyo tich e Bethel ka wuok e miechgi ne ok nyal biro, kendo ne ok nyal gwel Jo-Bethel manyien. Nikech mano, ofisewa moko mag goyo buge ne onge gi jotich moromo, to moko nolor kuom kinde nikech chike ma sirkende noketo.

Ere kaka ne waloyo pekgo? Ka ne ofisewa moko mag goyo buge oyaw, owete gi nyimine ma ne tiyo e migepe mamoko e Bethel nomi migawo mar konyo goyo buge kuom kinde. Joel ma tiyo e Migawo Mochung’ ne Goyo Buge e Piny Ngima wacho kama: “Chuny maber mar chiwruok ma owetego ne nigo, kendo kaka ne giikore puonjore gik manyien, nokonyo ahinya timo tijno.”

Kata obedo ni ne waromo gi pek kaka mago, wasegoyo kopi tara gi tara mag bug Inyalo Dak gi Mor Nyaka Chieng’! Mondo walos bugego, watiyoga gi gik mopogore opogore kaka masinde, jwala mimwonogo tok buge, kalatese, wino, kod gam. Kuom dweche abich mokwongo, ne watiyo gi dola milion mokalo 2.3 mag Amerka e ng’iewo gik milosogo bugego kende. Mondo wakung pesa, wasebedo ka wagoyo mana buge ma kanyakla mopogore opogore okwayo.

“Ochane e Yo Maber Ahinya”

Jopuonj kaachiel gi jopuonjre mag Muma neno nade bugno? Owadwa moro miluongo ni Paul ma wuok Australia wacho kama: Bug “Inyalo Dak gi Mor Nyaka Chieng’! mit tiyogo sama ipuonjo ng’ato Muma! Olose e yo maber ahinya, kendo olose e yo mamiyo japuonjre kod japuonj goyo mbaka e yo matut. En gi penjo ma konyo japuonjre wacho gima nie chunye. Bende, en gi vidio, pichni, chat, kod gik ma japuonjre nyalo timo. Ochane e yo maber ahinya, kendo osemiyo atimo dongruok e yo ma apuonjogo.”

Japuonjre moro mar Muma ma a e piny Amerka nowacho kama: “Ahero buk manyienni ahinya. Pichni manie iye konya winjo tiend puonj madongo. Vidio mopogore opogore muloga chunya kendo konya kawo okang’ mowinjore.” Japuonjreno puonjorega diriyo e juma kendo odhiga e chokruoge mag kanyakla ma ok obare.

Pod dwarore ni ogo kopi mang’eny mag bug Inyalo Dak gi Mor Nyaka Chieng’! e dhok mamoko. Chop sani, Bura Matayo osepwodho mondo ogo bugni e dhok 710. Mano ohingo dhok ma nogoe bug Gima Muma Puonjo gi dhok 340.

Wayudoga pesa migoyogo bugego kanye? Gin chiwo misirogo tij piny ngima ma thothne igologa kitiyo gi websaitwa mar donate.jw.org. Wagoyonu erokamano kuom chiwo magu ma konyo e goyo buge mipuonjogo ji Muma, kendo ma konyo ji ng’eyo Jehova mondo “gidag nyaka chieng’.”​—Zaburi 22:26.