“Wiu Kik Wil gi Tim Rwako Welo”

1, 2. (a) Gin pek mage ma joma welo romogo e kindegi? (Ne picha man malo.) (b) En wach mane ma jaote Paulo noparo ne Jokristo, to mano miyo wabedo gi penjo mage?

KUOM higni 30 mosekalo, Osei^[1] ma ok en Janeno nowuok e pinygi mar Ghana kodhi Ulaya. Owacho niya: “Ka nachopo kuno, nafwenyo ni ji mang’eny ne ok dewa. Piny bende ne ng’ich kono ahinya. Ka nawuok e paw ndege, koyo nodonjo kuoma ma achako mana ywak.” Nikech Osei ne ok ong’eyo dhok miwacho kuno, yudo tich maber notame kuom higa achiel kama. E wi mano, nikech ne en mabor gi joodgi, nokuyo ahinya mochako gombo thurgi.

² Dine bed ni in e chal mar Osei, diher ni jomoko otimni ang’o? Donge diher ni ji orwaki maber e Od Romo ma ok gidewo ni iwuok e piny mane kata kit pien dendi? Muma jiwo Jokristo madier niya: “Wiu kik wil gi tim rwako welo.” (Hib. 13:2) Omiyo we wanon ane penjo maluwogi: Jehova nigi paro mane kuom joma welo? Ang’o momiyo samoro nyalo dwarore ni walok paro ma wan-go e wi joma welo? To ang’o ma wanyalo timo mondo joma welo one ni warwakogi e kanyakla magwa?

PARO MA JEHOVA NIGO KUOM JOMA WELO

3, 4. Kaluwore gi Wuok 23:9, jotich Nyasaye machon nonego odag nade gi joma welo, to nikech ang’o?

³ Ka ne Jehova oreso joge kogologi e piny Misri, nomiyogi chike ma ne nyiso kaka nonego ginyis ng’wono ne joma welo ma ne owuok kodgi Misri. (Wuok 12:38, 49; 22:21) To nikech ngima ok bedga mayot ne joma welo, Jehova notimo chenro mondo giyud kaka gikonyore. Achiel kuom chenro ma Jehova noketo ne en mar hulo.​—Lawi 19:9, 10.

⁴ Jehova ne ok ochuno Jo-Israel mondo ochiw luor ne welo, kar mano ne odwaro ni gipar lit kod pek ma joma welo bedogago. (Som Wuok 23:9.) Ne ging’eyo kaka ngima jodak chalo. Kata ka Jo-Misri ne pok oloko Jo-Israel obedo wasumbnigi, ne gichayogi nikech ne gineno ni gibeyo moloyo Jo-Israelgo kendo ne gineno ni din margi ber moloyo mar Jo-Israel. (Cha. 43:32; 46:34; Wuok 1:11-14) Jo-Israel nodak e ngima matek e piny Misri, kata kamano Jehova ne dwaro ni gin to gine joma welo kaka ‘joma onyuol e kindgi’ tiende ni kaka jopinygi to ok jodak.​—Lawi 19:33, 34.

5. Ang’o ma biro konyowa mondo wanyis ng’wono ne joma wuok e ogendni mamoko mana kaka Jehova timo?

⁵ E kindegi bende, wan gadier ni Jehova pod dewo joma wuok e ogendni mamoko ma biro e kanyaklawa. (Rap. 10:17-19; Mal. 3:5, 6) Ka waparo pek ma giromogo, kuom ranyisi, samoro jomoko ok dwargi kata samoro ok ging’eyo dhok miwacho, mano biro miyo wamany yore ma wanyalo nyisogigo ng’wono.​—1 Pet. 3:8.

BE DWARORE NI WALOK PARO MA WAN-GO E WI JOMA WELO?

6, 7. Ang’o ma nyiso ni Jokristo mokwongo notimo kinda mondo gilo achaya ma ne ogurore motegno e chunygi?

⁶ Jokristo mokwongo notimo kinda mondo gilo achaya ma nogurore motegno e chunygi nikech ne gia e oganda Jo-Yahudi. Chieng’ Pentekost 33, Jokristo ma nodak Jerusalem nonyiso tim ng’wono kuom rwako joma ne wuok e ogendni mamoko ma nolokore mobedo Jokristo. (Tich 2:5, 44-47) Gima Jokristo ma Jo-Yahudigo notimo nonyiso maler ni ging’eyo tiend “rwako welo.”

⁷ Nikech kanyakla mar Jokristo mokwongono ne medo dongo, nitie wach moro ma nowuok ma nonyiso ni Jokristo moko ne ibwono. Jo-Yahudi ma ne wacho dho Grik nachako ng’ur ni mond lietegi ne ok rit maber. (Tich 6:1) Mondo olos wachno, joote noyiero chwo abiriyo ma ne onego one ni onge ng’ato ang’ata ma ne ijwang’o. Chwo ma ne oyiergo duto ne nigi nyinge mag Jo-Grik, to mano nonyiso kaka joote notiyo gi rieko e temo tieko ywaruok ma ne nyalo betie nikech Jokristogo ne wuok e ogendni mopogore opogore.—Tich 6:2-6.

8, 9. (a) En ang’o ma nyalo nyiso ni wachayo joma wuok e ogendni mamoko? (b) Ang’o ma nyaka wagol e chunywa? (1 Pet. 1:22)

⁸ Kido kod timbe mag ogendni ma wawuokie nyalo chiko ngimawa kata ka ok wang’eyo. (Rumi 12:2) E wi mano, wajawinjo ka jirendewa, jotich wetewa, kata joskul wetewa wuoyo e yor achaya e wi ogendni mamoko, dhok ma jomoko wacho, kata mana kit pien dend jomoko. Wuoyo ma kamago nyalo miyo wabed gi paro mane? To watimoga nang’o sama ng’ato wuoyo marach e wi ogandawa kata kit timbewa?

⁹ Nitie kinde moro ma jaote Petro nochayo joma ne ok gin Jo-Yahudi, kata kamano, mos mos nopuonjore weyo kido marachno. (Tich 10:28, 34, 35; Gal. 2:11-14) E yo ma kamano, ka wafwenyo ni wan gi kido mar chayo joma wuok e ogendni mamoko, onego watim kinda mondo wagol kido marachno e chunywa. (Som 1 Petro 1:22.) Gima nyalo konyowa en ng’eyo ni waduto wan dhano morem kendo ok wawinjore yudo resruok bed ni wawuok e oganda mane kata e piny mane. (Rumi 3:9, 10, 21-24) Omiyo, ere gima dimi wacha jomoko? (1 Kor. 4:7) Onego wabed gi paro kaka mar jaote Paulo ma nojiwo Jokristo wetene mowal niya: “Koro ok un welo kod jodak adaka, to . . . un jokanyo mag jood Nyasaye.” (Efe. 2:19) Kinda ma watimo mondo kik wacha joma wuok e ogendni mamoko biro konyowa mondo warwak kit dhano manyien.—Kol. 3:10, 11.

KAKA WANYALO NYISO NG’WONO NE JOMA WELO

10, 11. Boaz nonyiso nade ni noneno joma welo kaka Jehova nenogi kaluwore gi kaka notimo ne Ruth nyar Moab?

¹⁰ Gima Boaz notimo ne Ruth nyar Moab nonyiso maler ni noneno joma welo kaka Jehova nenogi. Ka nobiro ng’iyo kaka jotich ne keyo e puothe, noneno nyako moro ma jadak ka hulo gi kinda bang’ jokeyo. Ka ne Boaz owinjo ni ne okwayo thuolo mondo ohul kanyo kata obedo ni ne en gi ratiro mar hulo, ne oyiene mondo ohul e kind pidhe mosetue.—Som Ruth 2:5-7, 15, 16.

¹¹ Weche ma Boaz nowacho bang’e nyiso maler ni nodewo Ruth ahinya kod chal ma entiere kaka jadak. Achiel kuom gik ma nowacho en ni nonyiso Ruth mondo ohul machiegni gi kama jotichne ma nyiri ne tiye mondo chwo ma ne ni kanyo kik chande. Bende, nomiye chiemo moromo, kod pi mana kaka joma ne tiyone kanyo. E wi mano, Boaz ne ok owuoyo gi Ruth e yor achaya mana nikech en nyako ma jadak kendo modhier, to kar mano nojiwe.—Ruth 2:8-10, 13, 14.

12. Ng’wono ma wanyiso joma welo mowuok e ogendni mopogore opogore nyalo konyogi nade?

¹² Boaz nonyiso Ruth ng’wono nikech Ruth nohero Naomi da mare ahinya kendo noyie lamo Jehova. Ng’wono ma Boaz notimo ne Ruth ne nyiso kaka Jehova nohero Ruth nikech nobiro ‘e bwo bwomb Nyasach Israel.’ (Ruth 2:12, 20; Nge. 19:17) E kindegi bende, ng’wono ma wanyiso “ji mopogore opogore” nyalo konyogi fwenyo adiera kendo neno kaka Jehova oherogi.—1 Tim. 2:3, 4.

13, 14. (a) Ang’o momiyo onego watem matek mondo wamos welo mobiro e Od Romo? (b) Inyalo timo ang’o mondo ibed thuolo wuoyo gi joma wuok e ogendni mamoko?

¹³ Wanyalo nyiso welo mowuok e ogendni mamoko ng’wono kuom mosogi gi mor sama gibiro e Od Romo. Samoro wasegafwenyo ni joma welo oluor, omiyo giheroga bedo kar kendgi. Samoro kaluwore gi kaka ne gipon kata yuto margi, seche moko ginyalo chako chayore giwegi ka gipimo kit ngimagi gi mag ogendni mamoko. Kuom mano, onego wakaw okang’ mokwongo mar nyiso ni wadewogi kendo waherogi. Kapo ni JW Language app yudore e dhok muwacho, mano nyalo konyou ng’eyo weche moko matin ma unyalo mosogo joma welo ka utiyo gi dhoggi giwegi.—Som Jo-Filipi 2:3, 4.

¹⁴ Inyalo yudo ka tekni wuoyo gi joma wuok e ogendni mamoko. Mondo ibed thuolo kodgi, samoro inyalo goyo kodgi mbaka e wi ngimani iwuon. Mapiyo nono, inyalo chako fwenyo ni kare nitie gik mang’eny ma uchalrue moloyo gik ma nyalo bedo ni pogou. E wi mano, ibiro fwenyo ni oganda ka oganda nigi gik ma giberie kod nyawo maggi.

KONYGI MONDO GINE NI ORWAKGI

15. En ang’o ma biro konyowa mondo kik chunywa jog gi joma welo ma temo ng’iyo gi pinywa?

¹⁵ Mondo ikony jomoko one ni orwakgi e kanyaklau, inyalo penjori niya, ‘Ka dabed ni an e piny machielo, daher ni jopinyno otimna ang’o?’ (Mat. 7:12) Bed ng’at ma hore gi joma welo ma temo ng’iyo gi pinyu. Sama e ka wahango romo kodgi, nyalo bedo matek ng’eyo gik ma giparo kata kaka ginyalo timo sama wach moro oneno. Kar rito mondo gitim gik moko kaka ogandawa timoga, donge wanyalo rwakogi arwaka kaka ginno?—Som Jo-Rumi 15:7.

16, 17. (a) Gin ang’o gini ma wanyalo timo mondo wamak osiep gi joma wuok e ogendni mamoko? (b) Gin okenge mage ma wanyalo kawo mondo wakony joma welo mobiro e kanyaklawa?

¹⁶ Ka wakawo thuolo mondo wang’e kit ngima mar joma welo ma wuok e ogendni mamoko, biro bedonwa mayot mondo wang’egi maber. Sama watimo lamo mar joot, wanyalo tiyo gi thuolo moko e timo nonro e wi joma welo ma pok wang’eyo maber e kanyaklawa kata e alworawa. Yo machielo ma wanyalo makogo osiep gi joma welogo en gwelogi e utewa mondo wachiem kodgi. To nikech Jehova oseyawo “dhoot ne ogendni mamoko mondo girwak yie,” donge wan bende onego warwak joma welo ma “wan-go e yie”?—Tich 14:27; Gal. 6:10; Ayub 31:32.

¹⁷ Ka wakawo thuolo mar bedo kanyachiel gi owete gi nyimine mowuok e ogendni mamoko, wabiro bedo mamor neno kinda ma gitimo mondo ging’i gi kit ogandawa. Kata kamano, wanyalo fwenyo ni dwarore ni wakonygi mondo gipuonjre dhok ma wawacho. E wi mano, donge wanyalo konyogi ng’eyo kaka ginyalo yudo udi kod tich mowinjore? Chiwo kony e yore ma kamago nyalo miyo owadwa kata nyaminwa one ni wadewe ahinya.—Nge. 3:27.

18. En ranyisi mane maber ma Ruth noketo ma joma welo nyalo luwo?

¹⁸ En adier ni joma odar modhi e piny machielo biro temo matek mondo ging’i gi kit ngima mar joma odak e pinyno. Ruth noketonwa ranyisi maber. Mokwongo, nochiwo luor ne chike mag Jo-Israel kuom kwayo thuolo mondo ohul. (Ruth 2:7) Ne ok ochako hulo ahula ma ok openjo mana ka gima nochuno ni nyaka ohul kanyo. Mar ariyo, nojagoyo erokamano kuom gimoro amora maber ma otimne. (Ruth 2:13) Sama joma welo mowuok e pinje kata ogendni mamoko otimo kaka Ruth, mano biro miyo oganda ma gidak e kindgino kod Jokristo wetegi omigi luor.

19. Ang’o momiyo owinjore warwak joma welo manie kindwa?

¹⁹ Wamor ni Jehova osenyiso ji duto ng’wono kuom miyogi thuolo mar winjo wach maber. Nitie joma samoro ne ok nyal yudo thuolo mar puonjore Muma kata dhi e chokruoge mag Joneno mag Jehova ka gin thuchegi. To nikech koro gisenwang’o thuolo mar chokore gi Joneno mag Jehova, donge onego warwakgi maber mondo kik gine ni gin welo ahinya sama gin e kindwa? Kata obedo ni samoro ok wanyal konyogi ahinya e yore mag ringruok kata e yore mamoko, ng’wono ma wanyisogi nyiso kaka Jehova oherogi. Kaka joma luwo tim Nyasaye, watimuru duto ma wanyalo mondo warwak joma welo mobiro e chokruogewa.—Efe. 5:1, 2.