² Muma nyiso adiera ma ok dikwedi kowacho kama: “Ng’a mawuotho kod jo mariek nobedi mariek: to ng’a ma wadgi jo mofuwo none chandruok.” (Ngeche 13:20) Ngeroni ok wuo mana kuom joma wang’erego mana matin. Wach mawacho ni ‘wuotho kod’ nyiso osiep madhi nyime.a Buk moro ma wuoyo kuom Muma wacho kama e wi ndikoni: “Wuotho gi ng’ato tiende en hera kod tudruok.” Donge inyalo yie ni wahinyo luwo timbe joma wahero? Kuom adier, nikech watudore ahinya gi joma wahero, ginyalo chikowa e yo maber kata marach.