Yesu osenyiso jootene weche monego giluw sama giyalo ka gin ji ariyo-ariyo. Kata kamano, ok owe gikanyo. Onyisogi ni nitiere jo akwede ma biro kwedogi. Owachonegi kama: “Neuru! Aorou kaka rombe manie kind ondiegi . . . Tang’uru gi ji nikech giniteru e utegi mag ng’ado bura kendo ginichwadu e sunagokegi. Bende, giniteru e nyim joloch gi ruodhi nikech an.”​—Mathayo 10:16-18.

Mano kaka weche, siem, kod jip ma Yesu chiwo ne jootene 12 gin makende! En adier ni kata mana jopuonjre Yesu ma biro tiyo tij yalo bang’ ka osetho mochier, bende biro luwo weche ma ne ochikogo. Mano nenore kuom weche mosewacho konyiso ni ‘ji duto nosin kod’ jopuonjrene ma ok mana joma joote dhi yalonegi kende. E wi mano, onge kama wasomoe ni oter joote e nyim joloch gi ruodhi e kinde machuok ma giyalogo e alwora mar Galili; bende onge kama wasomoe ni joutegi ochiwogi mondo oneggi.

Kuom adier, Yesu nyiso ni ong’eyo gik ma biro timore e kinde ma biro sama owacho ne jootene wechego. Par ni nonyiso ni jopuonjrene ok bi tieko alwora duto ma onego giyalie “ka pok Wuod dhano ochopo.” Wechego konyowa ng’eyo ni jopuonjre ok bi tieko yalo wach Pinyruodh Nyasaye ka pok Ruoth Yesu Kristo ochopo kaka jang’ad-bura mar Nyasaye.