16, 17. (a) Ang’o mabiro timore mogik ma Yesu nowacho e ngerone? (b) Ang’o momiyo wanyalo wacho ni wachno biro chopo e kinde mabiro?

¹⁶ Mar abich en, rieny kaka wang’ chieng’. Yesu tieko wechene mokor kowacho kama: “Eka [kindeno] jo makare norieny kaka wang’ chieng’ e pinyruodh Wuon-gi.” (Math. 13:43) Mano notimre kanye kendo karang’o? Magi gin weche mabiro chopo e kinde mabiro. Yesu nokoro ni wechego ok bi timore e pinyka, to gin gik mabiro timore e polo e kinde mabiro.f Ne ane gik moko ariyo mamiyo wawacho kamano.

¹⁷ Mokwongo, mano biro timore karang’o? Yesu nowacho ni: ‘Eka kindeno jo makare norieny.’ Wach motigo ni ‘eka kindeno’ nyiso ratiro gima Yesu ne oa wuoyoe, matiendeni ‘wito ogolo e mach maduong’ kendo maliet.’ Mano biro timore e kinde giko masira maduong’. Kuom mano, Jokristo mowal bende biro ‘rieny kaka wang’ chieng’’ mana e kindego. Mar ariyo, gibiro rieny kanye? Yesu nowacho ni joma kare ne biro ‘rieny e Pinyruoth.’ Mano nyiso nang’o? Mano nyiso ni bang’ ka okang’ mokwongo mar masira maduong’ osekadho, Jokristo mowal duto mapod nie piny biro yudo ka oseyudo kido mogik. Kae to, mana kaka Yesu nokoro, ibiro chokgi e polo. (Math. 24:31) Ka gin kuno e ka gibiro rieny ‘e pinyruodh Wuon-gi,’ to mapiyo bang’ lweny mar Har–Maggedon, gibiro yudo mor mar bedo miaha mar Yesu, e “kend mar Nyarombo.”—Fwe. 19:6-9.