Jagowi mokwongo dwoke niya: “Mor zeituni moromo gige pimo mia achiel.” Mago nyalo romo mo lita 2,200. Nyalo bedo ni jagowino ne nigi puodho maduong’ mar yiend zeituni, kata ni ne en ja ohand mor zeituni. Jaritno wacho ne jagowino kama: “Kaw barupi mar winjruok ma ne undikorugo kendo ibed piny, kae to indikie mapiyo ni in gi 50 [lita 1,100].”​—Luka 16:6.

Nikech jaritno e ma pod ochung’ ne mwandu mag ruodhe, inyalo wach ni en gi teko mar duoko piny gope ma jomoko onego ochul ruodhe. Kata kamano, mano kelone ber mane? Sama oduoko piny gope ma jomoko nigo kamano, jaritno loso osiep gi joma chieng’ moro nyalo konye bang’e ka oseriembe e tich.