• Be ‘Ineno Nyasaye Maok Ne’?
    Ohinga mar Jarito—2014 | April 15

    • 10. (a) En ang’o ma Jehova nochiko Jo-Israel mondo otim e dwe mar Nisan 1513? (b) Ang’o momiyo Musa noluwo kaka Nyasaye nochike?

      10 E dwe mar Nisan e higa 1513 Ka Ndalowa Podi, Jehova nonyiso Musa gi Harun mondo gichik Jo-Israel otim gik ma ne pok gitimoga nyaka nene. Nonyisogi ni giyier nyaim kata diel ma ngimane ber mondo giyang’ kae to gimien rembe e dhoutgi. (Wuok 12:3-7) Musa notimo nang’o? Jaote Paulo bang’e nondiko kama e wi Musa: “Kuom yie, noloso sawo mar Pasaka, kendo nokiro remo, mondo janek mar jo makayo kik omul jo Israel.” (Hib. 11:28) Musa nong’eyo ni Jehova ne nyaka chop singo mage, omiyo ne en gi yie ni nyithindo duto makayo mag Jo-Misri ne idhi negi.

      11. Ang’o momiyo Musa ne siko chiwo siem ne jowetene?

      11 Musa nohero dhano wetene. Mano e momiyo kata obedo ni yawuote ne ok nyal negi nikech nenore ni ne gin Midian, nosiko ochiwo siem ne Jo-Israel wetene mondo yawuotgi makayo kik tho e lwet “janek.”a (Wuok 18:1-6) Muma wacho niya: “Eka Musa noluongo jodongo duto mag Israel, nowachonigi, Dhiuru, ukaw nyirombe . . . uneg pasaka.”—Wuok 12:21.

      12. En ote mane maduong’ ma Jehova ochikowa mondo waland?

      12 Kitayogi gi malaike mag Jehova, oganda Nyasaye bende lando ote maduong’ ka giwacho kama: “Luoruru Nyasaye, kendo miyeuru duong’, nikech sa mong’adoe bura osechopo; kendo lamuru jachuech polo gi piny gi nam gi sokini.” (Fwe. 14:7) Magi e kinde mag lando oteno. Nyaka wachiw siem ne joma odak e alworawa mondo giwuog e Babulon Maduong’, ‘mondo kik giriwre e richone, kendo kik ginwang’ masichene.’ (Fwe. 18:4) ‘Rombe mamoko’ bende riwo lwedo Jokristo mowal ka gihombo ji mondo olos ‘winjruokgi gi Nyasaye.’—Joh. 10:16; 2 Kor. 5:20.

      Achiel kuom Joneno mag Jehova ikore mar dhi lendo ka sechego bende otemo paro matut kuom malaike mogeng’o yembe ma makeko kethruok

      Keto yie kuom singo mag Jehova biro miyo isik ka in gi gombo mar lando wach maber e okang’ momedore (Ne paragraf mar 13)

      13. En ang’o mabiro miyo imed bedo gi gombo mar dwaro lando wach maber?

      13 Wan gadier ni ‘sa ming’adoe bura osechopo’. E wi mano, wan gi yie bende ni tij lendo onego otim e okang’ mapiyo mana kaka Jehova wacho. E fweny ma ne omi jaote Johana, ‘noneno malaike ang’wen kochung’ e tunge ang’wen mag piny, ka gimako yembe ang’wen mag piny.’ (Fwe. 7:1) Be ineno e pachi kaka malaikego oikore weyo yembe mag masira maduong’ mondo oketh pinyni? Ka in gi yie motegno kuom wachno, mano biro miyo iland wach maber gi chir.