Rawar—Mich Maduong’ Ahinya Moa Kuom Nyasaye

1, 2. (a) Mich bedoni maber ahinya ka otimoni ang’o? (b) Ang’o momiyo inyalo wach ni rawar e mich maber ahinya ma inyalo yudo e ngimani?

MICH maber moloyo duto ma iseyudo e ngimani en mane? Ok ochuno ni nyaka mich obed ma nengone tek eka mondo obed gima duong’. Kuom adier, nengo mar mich ok e gima nyiso ber mare. Mopogore gi mano, ka mich en ma miyi mor e ngima kata loyoni rem moro ma in-go, mano bedoni mich maber ahinya e ngimani.

² Kuom mich duto ma inyalo gombo yudo, nitie achiel maber moloyogi duto. En mich ma Nyasaye omiyo dhano. Jehova osemiyowa gik mang’eny, to kata kamano, gima duong’ moloyo duto mosemiyowa en misango mar Wuode Yesu Kristo kaka rawar. (Mathayo 20:28) Mana kaka wabiro neno e sulani, rawarno e mich maber ahinya ma inyalo yudo, nikech onyalo keloni mor mang’eny ahinya, kendo onyalo loyoni gik moko ma inyalo chando ahinya e ngimani. Kuom adier, rawarno e yo maduong’ ahinya ma Jehova nyisigo ni oheri.

RAWAR EN ANG’O?

3. Rawar en ang’o, to en ang’o monego wang’e mokwongo eka wane ber mar michni?

³ Ka okete e yo mayot, rawar e yo ma Jehova warogo, kata resogo dhano koa kuom richo kod tho. (Jo Efeso 1:7) Mondo wawinj tiend puonjni mayudore ei Muma, dwarore ni wadog chien mondo wapar gima ne otimore e puodho mar Eden. Wanyalo ng’eyo gimomiyo rawar en mich maber ahinya, mana ka wakwongo wang’eyo gima Adam ne olalo kane otimo richo.

4. Ngima makare ma ne omi Adam ne chalo nade?

⁴ Kane Jehova ochweyo Adam, ne omiye gimoro maber ahinya—ngima man kare chuth, kendo maonge richo moro amora. Par ane kaka ngima Adam ne dhi bedo. Nikech ne en gi ringre kod paro ma ok orem kata matin, onge kaka ne onyalo bedo matuwo, bedo moti kata tho. Kaka dhano makare chuth, ne en gi winjruok makende ahinya e kinde gi Jehova. Muma wacho ni Adam ne en “wuod Nyasaye.” (Luka 3:38) Kuom mano, Adam ne nigi tudruok maber ahinya gi Jehova Nyasaye, mana kaka winjruok mantie e kind wuowi gi wuoro mohere. Jehova ne wuoyo gi wuode modak e piny, kendo ne omiyo Adam tije mamoro chuny, ka onyise gik mamoko ma ne odwaro ni mondo otim.—Chakruok 1:28-30; 2:16, 17.

5. Muma kawacho ni ne ochwe Adam “e kit Nyasaye,” mano tiende ang’o?

⁵ Ne ochwe Adam e ‘kit Nyasaye.’ (Chakruok 1:27) Mano ok onyiso ni Adam ne nigi del kaka mar Nyasaye. Mana kaka ne waneno e Sula mokwongo mar bugni, Jehova en roho ma wang’ dhano ok nyal neno. (Johana 4:24) Kuom mano, del ma Jehova nigo ok en mar ringruok gi remo. Bedo ng’a mochwe gi kido mar Nyasaye, nyiso ni Adam ne nyalo nyiso hera, rieko, bedo jaadiera, kod teko mana kaka Nyasaye. Adam ne chalo gi Wuon mare e yo moro machielo bende, tiende ni, ne omiye thuolo mar yiero kaka otiyo gi ngimane. Kuom mano, Adam ne ok en kaka masin matiyo mana kaka olose mondo oti. Kar mano, ne onyalo yiero gik moko e ngimane, kendo ne onyalo yiero e kind ber gi rach. Ka dine bed ni oyiero winjo chik Nyasaye, dine odak nyaka chieng’ e Paradis e piny ka.

6. Adam kane oketho chik Nyasaye, ang’o ma ne olalo, kendo nyithindgi ne dhi bedo nade nikech mano?

⁶ Mano nyiso maler ni kane Adam oketho chik Nyasaye ma oyudo kum mar tho, ne olalo gima duong’ ahinya. Richo ma ne otimo, ne omiyo owito ngimane makare kaka dhano, kaachiel gi gweth duto ma ne dhi bedoe. (Chakruok 3:17-19) Gima lit en ni, Adam ne olalo ngima maberni ok mana mare kende, to kata mar nyithinde duto ma ne ibiro nyuolo bang’e. Muma wacho ni: “Richo nobiro e piny kuom ng’at achiel [Adam], kendo tho nobiro e piny kuom richo, kamano bende tho nobiro ni ji duto, nikech ji duto ne otimo richo.” (Jo-Rumi 5:12) Ee, waduto ne wayudo richo kuom Adam. Kuom mano, Muma wacho ni ne ‘ong’iewe’ kaachiel gi nyithinde kaka wasumbini e richo kod tho. (Jo-Rumi 7:14) Adam gi Hawa koro ne onge geno moro amora nikech ne giyiero ketho chik Nyasaye. To nyithindgi ma oriwo kata wan, ne dhi bedo nade?

7, 8. Wanyalo ng’iyo rawar e yore ariyo mage?

⁷ Jehova ne okawo okang’ mar reso dhano kokalo kuom ngima Yesu kaka rawar. Rawar en ang’o? Wanyalo ng’iyo wach rawar e yore ariyo. Mokwongo, rawar en gima ichulo mondo ogony kata oduok gima osingi. En kaka gima ichulo mondo ogonygo ng’at ma omak e lweny. Mar ariyo, rawar en pesa michulo mondo oromre gi nengo mar gimoro. Ochal gi pesa michulo ng’at ma ohinyore. Kuom ranyisi, ka ng’ato otimo aksident, ibiro dwaro ni mondo ochul pesa maromre gi gima oketho.

⁸ Mondo ogonywa waduto wawuogi e twech mar richo kod tho, ne idhi chul nade ngima ma ne Adam olalo, ma omiyo dhano duto odonjo e chandruok? We mondo wanon ane rawar ma Jehova ne ochiwo kod kaka rawarno nyalo konyi.

KAKA JEHOVA NE OCHIWO RAWAR

9. Rawar ma ne dwarore ne onego obed machalo nade?

⁹ Nikech ngima ma ne olal ne en ngima makare chuth mar dhano, onge dhano ma jaricho ma ne nyalo waro ngimano kendo. (Zaburi 49:7, 8) Gima ne dwarore en rawar ma nengone rom gi gima ne olal. Mani winjore maber gi chik bura makare ma yudore e Wach Nyasaye, mawacho ni: “Ngima kar ngima.” (Rapar mar Chik 19:21) Kuom mano, ang’o ma ne nyalo chulo ngima makare ma ne Adam olalo? Gima ne dwarore ne en ngima machielo ma onge richo mondo obed kaka ‘nengo mar waro ji duto.’—1 Timotheo 2:6, Luo NT 2003.

10. Jehova ne ochiwo rawar e yo mane?

¹⁰ Jehova ne ochiwo rawar e yo mane? Ne ooro achiel kuom yawuote mag roho mondo obi e piny. Kata kamano, Jehova ne ok okwanyo akwanya achiel kuom yawuote mag roho mondo oor ma ok oyiero. Ne ooro Wuode ma ne ohero moloyo, Wuode ma miderma. (1 Johana 4:9, 10) Wuowini ne oyie wuok kar dak mare e polo. (Jo Filipi 2:7) Mana kaka waseneno e sula mokalo ei bugni, Jehova ne otimo hono e daro ngima Wuode nyaka ei Mariam. Yesu ne onyuol kuom teko mar roho maler mar Nyasaye, kaka dhano maonge richo moro amora, kendo ne ok en e bwo kum mar richo.—Luka 1:35.

11. Dhano achiel ne nyalo bedo kaka rawar ne ji mang’eny e yo mane?

¹¹ Ng’at achiel ne nyalo bedo kaka rawar ne dhano mang’eny ahinya e yo mane? Mokwongo, onego wapenjre ni dhano tara gi tara ne ochako bedo joricho e yo mane? Par ni kane otimo richo, Adam ne olalo ngima makare, ma ne onge richo kata matin. Kuom mano, ne ok onyal miyo nyithinde ngima machalo kamano. Mopogore gi mano, ne onyalo mana miyo nyithinde richo kod tho. Yesu, ma Muma luongo ni “Adam machien,” ne nigi ngima makare chuth kane en dhano, kendo ne ok otimo richo kata dichiel. (1 Jo Korintho 15:45) Wanyalo wacho ni Yesu ne okawo kar Adam mondo owarwa. Kane obolore e nyim Nyasaye ma ochiwo ngimane, Yesu ne ochulo nengo mar richo ma Adam ne otimo. Kuom mano, Yesu ne omiyo yawuot Adam obedo gi geno kendo.—Jo-Rumi 5:19; 1 Jo Korintho 15:21, 22.

12. Sand mar Yesu ne onyiso ang’o e yo ma ratiro?

¹² Muma wuoyo e yo matut kuom sand ma ne Yesu oyudo ka podi ok otho. Ne ochwade gi del, ne ogure ma onge ng’wono, kendo ne otho tho malit e yadh sand. (Johana 19:1, 16-18, 30; Apendiks, ite mag 204-206.) Ang’o momiyo ne nyaka Yesu sandre ahinya? E sula moro mabiro nyime, wabiro puonjre ni Satan osekwedo ka be Jehova nikod dhano manyalo tiyone kinde duto kata e bwo tem. Kane Yesu ochung’ motegno kata mana e bwo sand malit, ne ochiwo dwoko maber ahinya ni akwede mar Satan. Yesu ne onyiso ratiro ni dhano makare ma omi thuolo mar yiero gima odwaro timo, nyalo chung’ motegno e nyim Nyasaye kata bed ni Jachien timone ang’o. Nyaka bed ni Jehova ne mor ahinya nikech Wuode ne ochung’ motegno!—Ngeche 27:11.

13. Ne ochul rawar e yo mane?

¹³ Ne ochul rawar e yo mane? E odiechieng’ mar 14, e dwe mar Jo-Yahudi mar Nisan higa mar 33 E Ndalowa, Jehova ne oyie mondo oneg Wuode makare, kendo ma ne onge richo moro amora. Kuom mano, Yesu ne ochiwo ngimane makare mar dhano kaka misango “dichiel kende.” (Jo Hibrania 10:10) E odiechieng’ mar adek bang’ tho Yesu, Jehova ne ochiere ma omiye ngima mar roho kendo. E polo, Yesu ne ochiwo ni Nyasaye nengo mar ngimane makare mar dhano, ma ne ochiwo kaka misango mar waro nyithind Adam. (Jo Hibrania 9:24) Jehova ne oyie kawo misango Yesu kaka rawar ma ne dwarore mondo owargo dhano kuom bedo wasumbini mag richo gi tho.—Jo-Rumi 3:23, 24.

KAKA RAWAR NYALO KONYI

14, 15. Mondo ‘owenwa richowa,’ ang’o ma nyaka watim?

¹⁴ Kata obedo ni wan joricho, podi wanyalo yudo gweth mang’eny ahinya nikech rawar. We mondo wane gweth moko ma wayudo sani, koda ma wabiro yudo e kinde mabiro nikech mich maduong’ni moa kuom Nyasaye.

¹⁵ Iweyonwa richowa. Nikech ne onyuolwa gi richo, kinda en gima dwarore ahinya mondo watim gik makare. Waduto watimo richo e wuoyo kata e timbewa. Kata kamano, nikech misango ma ne Yesu ochiwo kaka rawar, inyalo ‘wenwa richowa.’ (Jo Kolosai 1:13, 14) To mondo owenwa richowa, dwarore mondo walokore e chunywa wawe richo. Bende nyaka wabolore e nyim Jehova, kendo wakwaye mondo owenwa richowa ka waketo yie marwa kuom misango ma ne Wuode ochiwo kaka rawar.—1 Johana 1:8, 9.

16. Lamo Nyasaye gi chuny maler en gima nyalore nikech ang’o, kendo ang’o momiyo bedo gi chuny machalo kamano en gima ber?

¹⁶ Bedo gi chuny maler e nyim Nyasaye. Bedo gi chuny machandore nyalo miyo wabed maonge geno, kendo wane ni ok wan gimoro. To nikech iweyonwa richowa kokalo kuom rawar, Jehova nyisowa ng’wono ka oyienwa mondo walame gi chuny maler kata obedo ni wan joricho. (Jo Hibrania 9:13, 14) Mano miyo wabedo gi chir ka wawuoyo gi Jehova. Kuom mano, wanyalo wuoyo kode e lamo ka wan thuolo. (Jo Hibrania 4:14-16) Bedo gi chuny maler miyo ok wachandre e paro, wamiyo ngimawa luor, kendo chuny maler kelonwa mor.

17. Gin gweth mage ma wabiro yudo nikech Yesu ne othonwa?

¹⁷ Geno mar ngima ma nyaka chieng’ e paradis e piny ka. Jo-Rumi 6:23 wacho ni: “Misach richo en tho.” Ndikono kendo medo ni: “To mich Nyasaye en ngima mochwere e Yesu Kristo Ruodhwa.” E Sula mar 3 ei bugni, ne wapuonjore e wi gweth mag Paradis madhi bedo e piny ka. (Fweny 21:3, 4) Gwethgo duto mag kinde mabiro, moting’o nyaka ngima mochwere maonge tuoche, biro nyalore nikech Yesu ne othonwa. Mondo omi wayud gwethgo, onego wanyis erokamano nikech mich mar rawar.

INYALO NYISO EROKAMANO E YO MANE?

18. Ang’o momiyo onego wanyis erokamano ni Jehova kuom mich mar rawar?

¹⁸ Ang’o momiyo onego wanyis Jehova erokamano ahinya kuom miyowa rawar? Mich bedo maber ahinya ka ng’at ma chiwe okawo thuolone, otiyo gi teko mare, kata mwandune mondo oyudni michno. Wabedo mamor ahinya e chunywa ka waneno ni michno en yo ma ng’at ma ochiweno nyisowago ni oherowa. Rawar e mich maber moloyo mich duto, nikech Nyasaye ne otimo misango maduong’ ahinya e chiwe. Johana 3:16 wacho ni, “Nyasaye nohero piny ahinya, omiyo nochiwo Wuode ma miderma.” Rawar e yo maduong’ ahinya ma Jehova nyisowago ni oherowa. Bende en ranyisi maber ni Yesu oherowa, nikech ne ochiwo ngimane nikech wan. (Johana 15:13) Mich mar rawar onego onyiswa ma onge kiawa ni Jehova kod Wuode oherowa waduto ng’ato ka ng’ato.—Jo Galatia 2:20.

19, 20. Inyalo nyiso erokamano e yore mage nikech mich ma Nyasaye ochiwo mar rawar?

¹⁹ Koro, inyalo nyiso Nyasaye erokamano e yo mane nikech mich mar rawar? Mokwongo tim kinda mondo ing’e maber, Jachiwo Maduong’ ma en Jehova. (Johana 17:3) Ka ipuonjori Muma kitiyo gi bugni, mano biro konyi mondo ing’e Jehova e yo maber. Kaka imedo puonjori e wi Jehova, e kaka ibiro medo here ahinya. Kendo herano biro miyo itim gik mamoro chunye.—1 Johana 5:3.

²⁰ Ket yie kuom misango mar Yesu kaka rawar. Yesu ne owacho niya: “Ng’a ma oyie kuom Wuowi en gi ngima ma nyaka chieng’.” (Johana 3:36) Wanyalo nyiso e yo mane ni waketo yie kuom Yesu? Yie machalo kamano ok nyisi mana gi weche mawuok e dhowa. Jakobo 2:26 wacho ni, “Yie bende ka onge tim otho.” Ee, yie mar adier inyiso gi “tim,” matiende ni timbewa. Achiel kuom yore mag nyiso ni wayie kuom Yesu en timo kinda mondo waluw timne, ok mana e weche ma wawacho to bende e timbewa.—Johana 13:15.

21, 22. (a) Ang’o momiyo onego wachop e chokruok mar higa ka higa mar paro Chiemb Odhiambo mar Ruoth? (b) Ang’o ma wabiro puonjore e Sula mar 6 kod 7?

²¹ Bedo e chokruok mar Chiemb Odhiambo mar Ruoth matimore dichiel higa ka higa. Odhiambo mar dwe mar Nisan e odiechieng’ mar 14 e higa mar 33 E Ndalowa, Yesu ne ochako rapar makende ma Muma luongo ni “sawo mar Ruoth.” (1 Jo Korintho 11:20; Mathayo 26:26-28) Raparni iluongo bende ni Rapar mar Tho Yesu. Yesu ne ochako raparno mondo okony jootene kod jogo duto ma ne dhi bedo Jokristo maadier bang’gi, mondo giket e paro ni, kokalo kuom tho mar Yesu kaka dhano ma onge richo, ne ochiwo ngimane kaka rawar. Yesu ne ogolo chik kaluwore gi raparni kama: “Timuru ma, uparago.” (Luka 22:19) Rito Raparno, paronwa hera maduong’ ma Jehova gi Yesu osenyisowa kokalo kuom rawar. Wanyalo nyiso erokamano nikech rawarno, ka wachopo ka ma itime Rapar mar tho Yesu ma bedo dichiel higa ka higa.a

²² Rawar ma Jehova omiyowano en mich maber ahinya kuom adier. (2 Jo Korintho 9:14, 15) Mich maberni nyalo konyo kata jogo mosetho. Sula mar 6 kod 7 biro nyisowa kaka mano biro timore.