Weche ma Samuel, Teresa, gi Magdalene owachogo nyiso ni ji lemoga nikech weche mopogore opogore, weche moko gin madongo moloyo mamoko. Lamo mag jomoko gin ma wuok e chuny; to mag jomoko gin miwacho awacha. Ji tara gi tara ong’eyo ni dwarore ni gilem, mano e momiyo jomoko lemoga mondo gikal penj, jotugo ma gihero olochi, Nyasaye otagi e ngimagi mar joot, kata e wi wach moro amora. Nonro ma notim nonyiso ni kata joma ok nie din moro amora bende lemoga pile.

Be ilemoga? Ka en kamano, ilemoga e wi ang’o? Bed ni ilemoga pile, kata ok ilemga, pod inyalo penjori niya: ‘Be lamo nyalo konyo? Be nitie ng’at ma winjaga sama alemo?’ Jandiko moro nowacho ni lamo en achiel kuom gik ma nyalo miyo chunywa obed mokuwe sama wan gi parruok. Lakteche moko nigi paro machal kamano, kendo giwacho ni lamo “chal gi yath.” Be dibed ni ji lemoga mana nikech ginenoga ka jomoko lemo, koso dibed ni gilemoga mana mondo gibed gi kuwe e chunygi?

Muma to nyiso ni lamo ok en mana gima konyo ji obed gi chuny mokuwe kende. Onyisowa bende ni nitie ng’at ma winjo lamowa mana ka walemo e yo makare, kendo ka wakwayo gik ma owinjore. Be mano en adier? We wane gik ma nyiso ni en kamano.

Jomoko paroga ni lamo en gima kethonegi seche, ni kata ka gilemo onge ng’at ma winjogi. Jomoko to osetemo lemo, to ok giseyudo dwoko mag lamogi. Ng’at moro ma ok oyie kuom Nyasaye notemo paro ni Nyasaye en ng’at machalo nade, kae to nolemo kowacho kama: “Wachna kata gimoro matin.” To bang’e nowacho ni Nyasaye ne “oling’ aling’a thi.”

Kata kamano, Muma nyisowa ni nitie ng’at ma winjoga lamo, ng’atno en Nyasaye. Muma ne ondiko wechegi ne oganda moro ma ne odak chon: “Adier, [Nyasaye] nong’wonni kowinjo duondi kiyuak; ka nowinj noduokni wach.” (Isaiah 30:19) Ndiko machielo e Muma wacho kama: “To kwayo mar jo matir omiye mor.”—Ngeche 15:8.

Muma bende oting’o ranyisi mag joma Nyasaye ne owinjo lamogi. Achiel kuom ndikogo wacho ni Yesu ne ‘okwayo Jal ma ne nigi nyalo mar rese, mi ne owinj lamone.’ (Jo-Hibrania 5:7) Ranyisi mamoko yudore e bug Daniel 9:21 kod 2 Weche mag Ndalo 7:1.

Kare ang’o momiyo jomoko paroga ni Nyasaye ok dwokga lamogi? Nyasaye ma Muma wuoyoe ma nyinge en Jehovaa winjoga mana kwayo mag joma lame en kende to ok mag joma lamo nyiseche mamoko kata kweregi. Nyasaye bende dwaro ni “wakwaye kaluwore gi dwache,” tiende ni gik ma oyiego. Ka wakwayo Nyasaye e yo mowinjore, to onyisowa ni “owinjowa.” (1 Johana 5:14) Kuom mano, dwarore ni wang’e Nyasaye ma Muma wuoye, kendo wapuonjre dwache eka obiro winjo lamowa.

Ji mang’eny ong’eyo ni lamo ok en mana gima ji timo atima, to gin gadier ni Nyasaye winjo kendo dwoko kwayogi. Isaac, ma a Kenya, wacho kama: “Nalemo mondo ayudie ng’at ma ne nyalo konya winjo tiend weche Muma. Mapiyo bang’e, ng’ato ne obiro ira mokwaya mondo okonya ng’eyo tiend weche manie Muma.” Hilda ma a Philippines ne dwaro weyo madho ndawa. Bang’ kosetemo ding’eny motame, jaode nojiwe kama, “Donge inyalo lemo mondo Nyasaye okonyi?” Notiyo gi puonjno kendo owacho niya: “Ne awuoro kaka Nyasaye nokonya. Ma achako weyo gombo madho ndawa. Gikone, naweyo madhe chuth.”

Be Nyasaye nyalo konyi loyo gik ma keloni parruok ma nyalo moni timo dwache?

Nyasaye dwaro ni ibed osiepne.

Osiepe ohero goyo mbaka mondo gimed jiwo winjruok maber manie kindgi. Kamano bende, Nyasaye dwaro ni wawuo kode mondo wabed osiepene. Onyisowa kama: “Unuluong nyinga, unudhi lama, mi anawinju.” (Yeremia 29:12) Sama iwuoyo gi Nyasaye, ibiro ‘sudo machiegni kode, to en bende nosud iri.’ (Jakobo 4:8) Muma wacho kama: ‘Jehova chiegni gi ji duto ma luongo nyinge.’ (Zaburi 145:18) Kaka wamedo wuoyo gi Nyasaye e lamo, e kaka osiep manie kindwa kode medo bedo motegno.

Nyasaye dwaro konyi.

Yesu nopenjo niya: “En ng’ano kuomu ma ka wuode okwaye makate to omiye kidi? Kata ma ka wuode okwaye rech to omiye thuol? Kuom mano, ka un, . . . ung’eyo chiwo mich mabeyo ne nyithindu, donge Wuonu manie polo biro chiwo gik mabeyo e okang’ malach moloyo ne joma kwaye?” (Mathayo 7:9-11) Kuom adier, Nyasaye dwaro ni ilem nikech ‘odewi,’ kendo odwaro konyi. (1 Petro 5:7) Bende, odwaro ni inyise chandruogeni. Muma nyisowa niya: “Kik ubed gi parruok e wi gimoro amora, to kuom gik moko duto, kulamo kendo kusayo kaachiel gi goyo erokamano, nyisuru Nyasaye kwayou.”—Jo-Filipi 4:6.

Dhano nigi riyo mar wuoyo gi Nyasaye.

Josomo molony gi weche motudore gi kit ngima dhano, osefwenyo ni ji tara gi tara nenoga ni dwarore ni gilem. Kata mana joma ok oyie ni Nyasaye nitie oyie gi wechego.a To mano en nikech ne ochue dhano gi chan e chunygi mar ng’eyo Nyasaye. Yesu nowacho niya: “Joma mor gin joma nigi riyo mar ng’eyo Nyasaye.” (Mathayo 5:3) Yo achiel ma wanyalo loyogo riyono en kuom wuoyo gi Nyasaye pile.

Gin ber mage ma wabiro yudo sama wawuoyo gi Nyasaye e lamo?

Nyalo bedo ni kapok ichako timo gimoro amora, ijapenjoriga ni, ‘Ber mane ma abiro yudo kuom timo gini?’ Kata kamano, be en gima rach ka wapenjore penjono sama wadwaro lemo? Kinde duto, ok en kamano. Samoro wanyalo penjore kamano mondo wang’e kabe nitie ber moro ma wadhi yudo bang’ lemo.

E sula motelogo, waseneno ni ok walem alema nikech ji mathoth lemoga, kata mondo wabed gi chuny mokuwe. Nyasaye madier winjoga lamo mag ji. Ka walemo e yo makare kendo wakwayo gik mowinjore, to obiro winjowa. Ojiwowa ni wasud machiegni kode. (Jakobo 4:8) Kuom mano, wanyalo geno ang’o ka walemo pile? We wanonuru moko kuom ber ma wanyalo yudo.

Lamo miyowa paro mokuwe.

Be in-ga gi parruok mang’eny sama iyudo chandruoge kod pek e ngimani? E kinde ma kamago, Muma jiwowa ni ‘walam kinde duto,’ kendo ni ‘wanyis Nyasaye kwayowa.’ (1 Jo-Thesalonika 5:17; Jo-Filipi 4:6) Muma nyisowa ni sama walemo mondo Nyasaye okonywa, ‘kuwe mar Nyasaye ma loyo ng’eyo duto biro rito chunywa kod pachwa.’ (Jo-Filipi 4:7) Wanyalo bedo gi chuny mokuwe e okang’ moro sama wanyiso Wuonwa me polo gik ma chandowa. E bug Zaburi 55:22, Nyasaye jiwowa ni watim mana kamano, owacho kama: “Ket ting’ mari kuom Jehova, mi nopidhi.”

Ji mang’eny e piny osebedo gi chuny mokuwe bang’ lemo. Ng’at moro miluongo ni Hee Ran ma a e piny South Korea nowacho kama: “Kata obedo ni akaloga e chandruoge madongo, to bang’ ka aselemo awinjoga ka chunya okuwe, kendo ayudoga teko ma konya dhi nyime ka anano.” Cecilia ma a e piny Philippines to wacho kama: “Aparoraga ahinya nikech nyiga ariyo kod minwa ma sani oti ahinya ma ok onyal kata mana fwenya. Kata kamano, lemo konyaga mondo kik aparra ahinya sama atimo tijena ma pile. An gadier ni Jehova biro konya pidho joodago e yo maber.”

Lamo hoyowa kendo tegowa sama wayudo tembe.

Dibed ni nitie gima chando pachi ahinya, kaka tuo kata masira moro? Kiwuoyo gi “Nyasach hoch duto” e lamo, to obiro miyi chuny mokuwe. Muma wacho ni Nyasaye “hoyowa e masichewa duto.” (2 Jo-Korintho 1:3, 4) Kuom ranyisi, chieng’ moro ka chuny Yesu ne chandore ahinya, “nogoyo chonge piny mochako lemo.” Ang’o ma notimore bang’ mano? “Malaika moro moa e polo nofwenyorene kendo nomiye teko.” (Luka 22:41, 43) Jatich Nyasaye machielo, ma nyinge Nehemia bende noyudo akwede mager moa kuom joma ne geng’e tiyo tij Nyasaye. Nolemo kama: “To koro, yaye Nyasachwa, teg lueta.” Gik ma notimore bang’e nonyiso ni Nyasaye nokonye loyo luoro ma ne en-go kendo notimo tijno maber. (Nehemia 6:9-16) Reginald, ma a e piny Ghana, wacho kama kuom kaka owinjoga koselemo: “Sama alemo, to moloyo sama ayudo chandruoge, awinjoga ka gima agoyo mbaka gi ng’at ma nigi teko mar konya loyo chandruogena, kendo ma jiwa ni kik aluor gimoro amora.” Adier, Nyasaye nyalo hoyowa sama wawuoyo kode e lamo.

Lamo miyowa rieko moa kuom Nyasaye.

Yiero moko ma watimo e ngima nyalo loko ngimawa chuth kata mar joodwa. Ere kaka wanyalo timo yiero makare? Muma wacho kama: “Ka nitiere ng’ato e kindu mochando rieko [to moloyo sama okalo e tembe], osik kokwayo Nyasaye, nimar Nyasaye chiwo rieko ne ji duto e yo mogundho ma ok omany ketho kuom ng’ato, kendo enomiyego.” (Jakobo 1:5) Ka wakwayo Nyasaye mondo omiwa rieko, onyalo tiyo gi rohone maler tayowa mondo watim yiero maber. Kuom adier, wanyalo kwaye rohone maler nikech Yesu ne osingo ni “Wuonu manie polo to biro chiwo roho maler e okang’ malach moloyo ne joma kwaye!”—Luka 11:13.

Kata Yesu ne okwayo Wuon-gi mondo okonye ng’ado paro e weche madongo. Muma nyisowa ni ka ne odwaro yiero chwo 12 ma ne dhi bedo jootene ‘nolemo otieno mangima.’—Luka 6:12.

Mana kaka Yesu, thoth ji kawuono osebedo gadier ni Nyasaye dwokoga lamo, to mano en nikech osedwokogi sama gikwaye mondo okonygi ng’ado paro e yo makare. Regina ma a e piny Philippines, nyisowa chandruoge moko mosekaloe. Chandruogego ne gin rito joode bang’ ka chwore nosetho, pek mag yuto, lalo tich, kod pidho nyige ariyo. Ang’o mosekonye timo yiero makare? Owacho niya: “Jehova osebedo kakonya kokalo kuom lamo.” Dichwo moro miluongo ni Kwabena ma a e piny Ghana, nyisowa gimomiyo okwayoga kony kuom Nyasaye: “Ne alalo tij gedo ma ne nigi chudo maber.” Owacho kama samoro amora ma omanyo tich moro: “Alemoga pile mondo Jehova okonya timo yiero makare.” Odhi nyime wacho niya: “An gadier ni Jehova osekonya yiero tich mamiya gik ma dwarore e ngima, kod thuolo mar tiyone.” In bende inyalo neno kaka Nyasaye miyi rieko, sama ikwaye mondo okonyi timo yiero ma ok bi ketho osiep manie kindi kode.

Wasewuoyo mana kuom ber moko matin ma lamo nyalo keloni. (Inyalo neno ranyisi mamoko e sanduk ma wacho ni “Ber Mwayudo Sama Walemo.”) Kata kamano, mondo iyud bergo, dwarore ni ikwong ing’e Nyasaye kod dwache. Kapo ni diher gima kamano, wakwayi ni mondo itudri gi Joneno mag Jehova mondo gipuonjre kodi Muma.a Mano e okang’ mokwongo ma nyalo konyi sudo machiegni gi Jal ma “winjo kwayo mar ji.”—Zaburi 65:2.