-
Joneno mag Jehova Gin Jomage?Ohinga mar Jarito—2015 | Septemba 1
-
-
WACH MADUONG’ MA GASET WUOYOE
Joneno mag Jehova Gin Jomage?
Dhako moro miluongo ni Becky ma a California e piny Amerka, nowacho kama: “Ne ang’eyo jal moro ma ne iluongo ni Mike ma nosebedo Janeno mar Jehova kuom higni mang’eny. Kata kamano, thothne ne an gi penjo mang’eny e wi dinno. Penjogo ne gin kaka, ‘Jehova en ng’a? Ang’o momiyo Joneno mag Jehova ok timga nyasi mag odiechienge yueyo? Dibed ni dinno oseketho pach Mike?’”
Dichwo moro miluongo ni Zenon ma a Ontario e piny Kanada, nowacho kama: “Ne awuoro ahinya ka ne jirendena ochako puonjore Muma gi Joneno mag Jehova. Ne achako penjora kama: ‘Tiend nying Joneno mag Jehova en ang’o? Nying dinno galagala manadeno!’”
Dichwo moro miluongo ni Kent ma a Washington e piny Amerka, nowacho kama: “An gi jaoda ne waparo ni Joneno mag Jehova ne limowa mondo gimiwa kum nikech ne ok wajodhi e kanisa. Ne waparo ni ka kanise madongo e ma ok nyal chopo gik ma ne wadwaro, to be din ma galagala kaka mar Joneno mag Jehova ne dhi chopo gigo adier?”
Dhako moro miluongo ni Cecilie ma a Esbjerg e piny Denmark, nowacho kama: “Kuom adier, ne ok ang’eyo maber Joneno mag Jehova kaachiel gi puonj maggi.”
Nyalo bedo ni iseneno Joneno mag Jehova ka lendo ot ka ot kata kuonde ma ji mang’eny yudoree, kendo ka gipogo ne ji buge ma lero Muma, kaachiel gi puonjo ji Muma. Samoro kata gaset ma isomoni achiel kuomgi e ma nomiyi. To podi nyalo bedo ni ipenjori ni, ‘Joneno mag Jehova gin ng’a gini?’ Nyalo bedo ni paro ma in-go kuom Joneno mag Jehova chalo gi paro mag joma owuo kuomgi malo kanyo.
Kapo ni in gi penjo moko e wi Joneno mag Jehova, inyalo yudo dwoko kanye? Ere kaka inyalo ng’eyo puonj ma Joneno mag Jehova oyiego, kaka giyudo pesa mag rito kuondegi ma gilamoe, kod siro tijgi mar lendo? Ang’o momiyo gilimoga ji e udi kata wuoyo gi ji kuonde ma ji mang’eny yudoree?
Cecilie ma owuo kuome malono wacho kama, “Ne ajasomo weche mathoth e wi Joneno mag Jehova e Intanet. Ne ajachiko ita ne weche moko ma ok kare ma ji ne wacho e wi Joneno. Mano nomiyo abedo gi paro ma ok nikare e wi Joneno mag Jehova.” Kata kamano, bang’e Cecilie nowuoyo gi Joneno mag Jehova achiel kachiel kendo noyudo dwoko mag penjo ma nosechando pache e wigi.
Dibed ni in bende diher yudo dwoko makare mag penjo ma in-go e wi Joneno mag Jehova? Wajiwi ni imany Joneno mag Jehova, gin e ma gigoyo gasedni kendo gibiro miyi dwoko makare. (Ngeche 14:15) Wageno ni sula ma luwogi biro konyi ng’eyo Joneno mag Jehova e yo maber, kaachiel gi puonj maggi kod tijgi.
-
-
Riwruok mar Joneno mag Jehova Chalo Nade?Ohinga mar Jarito—2015 | Septemba 1
-
-
WACH MADUONG’ MA GASET WUOYOE | JONENO MAG JEHOVA GIN JOMAGE?
Riwruok mar Joneno mag Jehova Chalo Nade?
Wan riwruok achiel mokwako piny ma ngima kendo ok wariwre gi grube mag dinde mamoko. Kata obedo ni ofiswa maduong’ nie piny Amerka, thoth Joneno mag Jehova odak e pinje mamoko. Nitie Joneno ma kwan-gi dirom milion aboro, ma puonjo ji Muma e pinje mokalo 230. Watimo kamano ka waluwo weche ma Yesu nowacho niya: “Wach maber mar Pinyruothni ibiro yal e piny mangima mondo ochiw neno ne ogendni duto, eka giko nobi.”—Mathayo 24:14.
Kamoro amora ma wadakie, waluwo chike moket, kendo ok wadonjre gi weche mag siasa. Mani en nikech waluwo gima Yesu nowacho ne Jokristo ni, ‘ok gin mag piny.’ Mano e momiyo ok wadonjre e weche siasa kata e lwenje mag ogendni. (Johana 15:19; 17:16) En adier ni kata e kinde ma ji ne kedo e Lweny mar Ariyo mar Piny, Joneno mag Jehova notue e jela, nosandgi, kendo moko kuomgi ne oneg mana nikech ne gitamore riwo lwedo joma ne kedo e lwenyno. Bishop moro ma a e piny Germany nondiko kama: “Riwruok mar Joneno mag Jehova kende e ma ne ok oriwo lwedo loch mar Jo-Nazi.”
“[Joneno mag Jehova] gin joma timbegi beyo ahinya. Wanyalo kata ndikogi e tije madongo mag siasa, en mana ni ok inyal yudogi ka gidonjore e weche mag siasa. . . . Giyie bedo e bwo sirkande mag dhano, kata kamano ging’eyo maler ni Pinyruodh Nyasaye kende e ma biro tieko ne dhano chandruoge duto.”—Gaset miluongo ni Nová Svoboda mar piny Czech Republic
Kata kamano, ok watimga gikwa kar kendwa. Yesu nolamo ne jolupne kama: “Ok akwayi ni mondo igolgi e piny.” (Johana 17:15) Omiyo, inyalo yudowa kamoro amora obed kama watiye, e chirni, kata e skunde manie alworau.
-
-
Joneno mag Jehova Oyie Kuom Ang’o?Ohinga mar Jarito—2015 | Septemba 1
-
-
WACH MADUONG’ MA GASET WUOYOE | JONENO MAG JEHOVA GIN JOMAGE?
Joneno mag Jehova Oyie Kuom Ang’o?
Joneno mag Jehova oyie ni “Ndiko duto okudh gi much Nyasaye kendo gikonyo.” (2 Timotheo 3:16) Muma e ma konyowa ng’eyo Jachwech e yo maber, bende okonyowa mondo wadag e ngima maber.
Muma wacho niya: “Ni mondo ging’e ni in, ma nyingi Jehova, In kendi e ng’a Ma Malo Chutho e piny ngima.” (Zaburi 83:18) Kuom mano, walamo Jehova Nyasaye kende, kendo watimo kinda kaka Joneno mage mondo waland ne ji mang’eny nyingeno.—Isaiah 43:10-12.
Kaka Jokristo, wan gi yie ni Yesu en “Wuod Nyasaye,”a kendo ni nobiro e piny mobedo Mesia. (Johana 1:34, 41; 4:25, 26) Bang’ thone, ne ochiere modok e polo. (1 Jo-Korintho 15:3, 4) Bang’e nokete obedo Ruoth e Pinyruodh Nyasaye. (Fweny 11:15) Pinyruodhno en sirkal madier ma biro duoko Paradiso e piny kae. (Daniel 2:44) Muma wacho niya: “To jo mamuol ginicham piny; kendo ginimor moloyo kuom kwe mang’eny.”—Zaburi 37:11, 29.
“Sama gisomo Muma, gineno ka gima Nyasaye wuoyo kodgi. Samoro amora ma chandruok oyudogi, gitimo nonro e Wach Nyasaye mondo giyud kaka ginyalo loyo chandruogno. . . . Nikech ging’eyo ni Wach Nyasaye ngima.”—Jatelo moro mar Katholik miluongo ni Benjamin Cherayath nowacho wechego e gased Münsterländische Volkszeitung e piny Germany
Joneno mag Jehova oyie ni puonj mag Muma nyalo konyo ji kata mana e kindewagi. (Isaiah 48:17, 18) Emomiyo, waluwo puonjgo. Kuom ranyisi, ok wamadh ndawa kata tiyo gi yedhe ma mero ji nikech Muma chikowa ni wawe timbe duto ma nyalo chido pachwa kod ringrewa. (2 Jo-Korintho 7:1) Bende wakwedo timbe maricho ma Muma kwero achiel kachiel kaka mer, terruok, kod kuwo.—1 Jo-Korintho 6:9-11.
a Muma bende luongo Yesu ni “Wuod Nyasaye ma miderma” nikech en e ma Jehova nokwongo chueye achiel kachiel.—Johana 3:18; Jo-Kolosai 1:13-15.
-
-
Isiro Nade Tijwa mar Lando Wach Nyasaye?Ohinga mar Jarito—2015 | Septemba 1
-
-
WACH MADUONG’ MA GASET WUOYOE | JONENO MAG JEHOVA GIN JOMAGE?
Isiro Nade Tijwa mar Lando Wach Nyasaye?
Higa ka higa wagoyo kendo wapogo Muma kaachiel gi buge ma lero Muma ma kwan-gi romo milionde. Wageroga ofise mag Joneno mag Jehova kaachiel gi kar goyo buge kuonde mopogore opogore e piny ngima. Kanyakla ma kwan-gi odhuro chokorega kuonde mabeyo ma iluongo ni Ute Romo (Kingdom Hall). Mago duto isiro nade?
Tijwa isiro kokalo kuom chiwo ma onge achune. (2 Jo-Korintho 9:7) E higa 1879, gocho mar ariyo mar gasedni nowacho kama: “Nikech wan gi yie ni JEHOVA e ma siro gaset mar ‘Zions Watch Tower’ [kaka ne iluongo gasedni chon], gasedno ok bi kwecho kata timo solro kuom ji mondo giyud kony.” Mano e wach mosebedo ka tayowa kuom higni mang’eny.
Ng’ato nyalo oro chiwo mare ne achiel kuom ofisewa, kata onyalo keto chiwone e sanduge mag chiwo mantiere e Ute Romo. Kata kamano, ok wakwaga ji achiel kuom apar, bende ok wakwaga ji sadaka, kata kwayo mondo ji ochul pesa e ka wakonygi e yo moro kata mondo wamigi bugewa. Ok chulwaga sama wadhi lando wach Nyasaye, kata sama wapuonjo ji e kanyakla, kata sama wakonyo e gero kuonde lamo. Mano en nikech Yesu nowacho kama: “Nuyudo nono, omiyo chiwuru nono.” (Mathayo 10:8) Jogo duto mochiwore tiyo e ofisewa matindo kata e ofiswa maduong’ man Amerka, moriwo nyaka owete manie Bura Matayo mar Joneno mag Jehova, ok chulga osara moro amora.
“Mana kaka tije mamoko mag Joneno mag Jehova, ‘chiwo’ ma gigolo mondo gi sirgo tij Nyasaye gigolo ma onge achune, kendo mana kaka ng’ato ka ng’ato oyango e chunye ni obiro golo, kendo ni obiro timo kamano nyadidi.”—Od Bura ma Ulaya mar Ratiro mag Dhano, 2011
Chiwogo bende konyoga sama masira moro otimre. Jokristo mokwongo noikore golo chiwo mondo gikonygo jowetegi ma ne oyudo masira. (Jo-Rumi 15:26) Bende, wageroga ute ne joma masira moro oketho utegi, kod kuonde ma gilamoe, kendo wamiyogiga gik moko kaka chiemo, lewni, thieth ma dwarore.
-
-
Ang’o Momiyo Walandoga Wach Nyasaye?Ohinga mar Jarito—2015 | Septemba 1
-
-
WACH MADUONG’ MA GASET WUOYOE | JONENO MAG JEHOVA GIN JOMAGE?
Ang’o Momiyo Walandoga Wach Nyasaye?
Nyalo bedo ni tijwa mar lando wach Nyasaye ot ka ot, lendo kuonde ma ji ng’enyie, kachiel gi lendo kamoro amora ma ji yudoree emomiyo ji nyalo pogowa mayot gi dinde mamoko. Ang’o momiyo walendo kamano?
Joneno mag Jehova lendo mondo gipak Nyasaye kendo miyo nyinge ong’ere. (Jo-Hibrania 13:15) Bende, watimo kamano mondo waluw chik ma Yesu Kristo nochiwo kowacho kama: ‘Kuom mano, dhiuru ulok ji obed jopuonjrena, kupuonjogi rito weche duto ma asechikou.’—Mathayo 28:19, 20.
E wi mano, wahero jowetewa bende. (Mathayo 22:39) Wang’eyo ni ji mang’eny ni giyie maggi, kendo ni ok ji duto ma biro rwako wach ma walandonegi. Kata kamano, pod waneno ni puonj mag Muma nyalo reso ngima ji. Mano emomiyo wadhi nyime “puonjo kendo lando wach maber e wi Kristo,” mana kaka Jokristo mokwongo notimo.—Tich Joote 5:41, 42.
Jasomo moro miluongo ni Antonio Cova Maduro nondiko e wi “kinda kod sinani ma Joneno mag Jehova timoga, nyaka chop kama giol . . . , to mana mondo wach Nyasaye ochop e piny ngima.”—Gaset mar El Universal, mar piny Venezuela
Ji mang’eny masomoga bugewa ok gin Joneno mag Jehova. Kendo ji milionde ma puonjre Muma kaachiel kodwa nie dinde mamoko. Kata kamano, gimor ni Joneno mag Jehova pod limogiga.
En adier ni inyalo bedo gi penjo mamoko e wi Joneno mag Jehova. Wakwayi ni imany dwoko mag penjo moro amora ma in-go kuom
Penjo achiel kuom Joneno mag Jehova.
Dhi e websaitwa mar www.pr418.com/luo.
Dhi e chokruogewa ma wagweloe ji duto, kendo onge pesa moro amora mibiro chulo.
-