Nyuol Manyien​—Be En e Yo Matero Ji e Warruok?

“BE OSENYUOLI manyien? ” Inyalo dwoko penjono nade? Ji mang’eny maluongore ni Jokristo e piny mangima nyalo dwoko ni, “Ee! ” Gin gi yie ni nyuol manyien e ranyisi manyiso ni ng’ato en Jakristo madier, kendo ni mano e yo kende mar yudo warruok. Giyie gi weche mag jotend din moko kaka Robert C. Sproul, ma nowacho kama: “Ka ng’ato ok onyuol manyien, . . . to ok en Jakristo.”

Be in achiel kuom jogo moyie gi puonj mar ni, ka onyuoli manyien eka in e yo materi e warruok? Kapo ni en kamano, onge kiawa ni idwaro konyo wedeni koda osiepeni mondo onwang’ yorno kendo mondo gichak wuothoe. Kata kamano, mondo gitim kamano, dwarore ni ging’e pogruok mantie e kind ng’at monyuol manyien koda ng’at mapok onyuol manyien. Omiyo, inyalo leronegi nade tiend bedo ng’at monyuol manyien?

Ji mang’eny nigi yie ni ng’at ‘monyuol manyien,’ en ng’at mosingore tiyo ne Nyasaye kod Kristo, kendo kuom timo kamano, jalo lokore kendo obedo ng’at ma nigi winjruok maber gi Nyasaye. Diksonari moro ma kindegi miluongo ni, Merriam-Webster’s Collegiate Dictionary—Eleventh Edition, lero ni ng’at monyuol manyien, ‘en ng’at ma osebedo ka en Jakristo to koro ochiwore ayanga, e okang’ momedore kuom wach yie mare, to moloyo kapo ni wach moro omulo chunye ahinya.’

Be inyalo bwok kuom ng’eyo ni Muma ok oyie gi paro ma diksonarino chiwo? Be diher ng’eyo gima Wach Nyasaye puonjo kuom adier e wi nyuol manyien? Kuom adier, nono wachni matut biro konyi. Nikech ang’o? En nikech bedo gi ng’eyo makare e wi gima nyuol manyien en, biro kelo lokruok e ngimani koda kaka ineno kinde mabiro.

Ang’o ma Muma Puonjo Kuom Wachni?

Wach ‘nyuol manyien’ yudore e Johana 3:​1-​12 kama wayudoe mbaka moro ma ne nie kind Yesu gi jatend din moro e Jerusalem. Ibiro nwang’o weche manie Muma mawuoyo kuom mbakano e sanduk maluwo. Wajiwi mondo isom wechego adimba.

E mbakano, Yesu wuoyo kuom weche mopogore opogore e wi ‘nyuol manyien.’ a

Kuom adier, weche ma Yesu notiyogo konyowa dwoko penjo abich madongo maluwogi:

■ Ang’o momiyo nyuol manyien en gima dwarore ahinya?

■ Be wan wawegi ema wanyalo yiero mondo onyuolwa manyien?

■ Gimomiyo inyuolo ng’ato manyien en ang’o?

■ Inyuolo ng’ato manyien e yo mane?

■ To gin lokruok mage ma nyuol manyienno kelo?

We wanon ane moro ka moro kuom penjogi.

[Weche moler piny]

[Sanduk/Picha manie ite mar 4]

‘Nyaka Nyuolu Nyuol Manyien’

“Ng’ato moro ne nitie kuom jo Farisai, nyinge Nikodemo, jaduong’ kuom jo Yahudi. Jali nodhi ir Yesu gotieno, kendo nowachone ni, ‘Rabbi, wang’eyo ni in japuonj moa ka Nyasaye, nikech onge ng’ato ma nyalo timo ranyisigi mitimo, mak mana Nyasaye e man kode.’ Yesu nodwoke niya, ‘Adier, adier, awachoni, ka ok onywol ng’ato nywol manyien, ok onyal neno pinyruodh Nyasaye.’ Nikodemo nopenje ni, ‘Inyalo nadi nywolo ng’ato ka en jaduong’? Onyalo donjo mar ariyo e i min, kendo chak nywole? ’ Yesu nodwoke niya, ‘Adier, adier, awachoni, ka ng’ato ok onywol gi pi kendo gi Roho, ok onyal donjo e pinyruoth Nyasaye. Gi ma ringruok onywolo en ringruok; kendo gi ma Roho onywolo en roho. Kik iwuor nikech a awachoni ni, “Onego onywolu nywol manyien.” Yamo kudho ku mohero, kendo iwinjo dwonde, to ikiya ka moae kata ku modhiyoe; e kaka obedo kuom ng’ato ka ng’ato ma Roho onywolo.’ Nikodemo nopenje ni, ‘Wechegi kelo nadi bet kamano?’ Yesu nodwoke niya, ‘In japuonj mar Israel to magi ok donjni koso? Adier, adier, awachoni, wawacho gi ma wang’eyo, kendo wan joneno kuom gi ma waseneno, to nenowa ok uyie. Kawachonu me piny to ok uyie, unuyie nadi kawachonu me polo?’”—Johana 3:​1-​12.

Nyuol Manyien​—Ang’o Momiyo En Gima Dwarore Ahinya?

KUOM thuolo duto ma ne owuoyo gi Nikodemo, Yesu nojiwo maler ni nyuol manyien en gima dwarore ahinya. Nonyiso mano nade?

Ne ane kaka e sama nowuoyo gi Nikodemo, Yesu nojiwo kaka nyuol manyien en gima dwarore ahinya. Nowacho kama: ‘Ka ok onyuol ng’ato nyuol manyien, ok onyal neno pinyruodh Nyasaye.’ (Johana 3:3) Wacho ni “ka ok,” kendo ni “ok onyal” nyiso maler kaka dwarore ni onyuol ng’ato manyien. Kuom ranyisi: Ka ng’ato owacho ni, “Ka chieng’ ok orieny, to ler mar odiechieng’ ok dibedie,” tiend mano en ni chieng’ nyaka rieny mondo omi ler mar odiechieng’ obedie. E yo machalo kamano, Yesu nowacho ni, ng’ato nyaka nyuol manyien eka mondo one Pinyruodh Nyasaye.

Gikone, mondo omi ogol kiawa moro amora kuom wachni, Yesu nowacho kama: ‘Nyaka nyuolu nyuol manyien.’ (Johana 3:​7, The Bible in Luo, 1976) Kuom adier, kaluwore gi Yesu, nyuol manyien en gima dwarore—en gima nyaka ng’ato kalie—mondo omi ‘odonji e pinyruodh Nyasaye.’—Johana 3:5.

To nikech Yesu nokawo wach nyuol manyien gi pek maduong’ kamano, Jokristo onego one ni giwinjo tiend puonjni e yo makare. Kuom ranyisi, be iparo ni Jakristo nyalo yiero owuon mondo onyuole manyien?

[Weche manie ite mar 5]

“Ka chieng’ ok orieny, to ler mar odiechieng’ ok dibedie”

Nyuol Manyien​—Be En Yiero mar Ng’ato Owuon?

EN NG’ANO mamiyo inyuolo ng’ato manyien? Sama gijiwo jowinjogi mondo obed Jokristo monyuol manyien, joyalo moko tiyo gi weche ma Yesu nowacho ni: ‘Nyaka nyuolu nyuol manyien.’ (Johana 3:​7, Luo, 1976) Joyalo makamago tiyo gi wechego kaka chik, mamiyo chalo ka gima giwacho ni, “Yier mondo onyuoli nyuol manyien! ” Kuom mano, gipuonjo ni winjo Yesu kendo kawo okang’ mago madwarore kuom wach nyuol manyien, en gima ni e wi ng’ato owuon. Kaluwore gi paro ma kamano, nyuol manyien en yiero mar ng’ato owuon. Kata kamano, be mano en paro machal gi mano ma Yesu nowachone Nikodemo?

Somo mos weche ma Yesu nowacho, nyiso ni ok ne opuonjo ni ng’ato owuon ema ne dhi yiero kabe ibiro nyuole manyien kata ooyo. Ang’o momiyo wawacho kamano? Kaluwore gi dho-Grik, wach molok ni ‘nyuol manyien’ bende inyalo loki ni “onego onyuolu nyuol moa malo.”a Kuom mano, kaluwore gi loko machielono, nyuol manyien timore ‘koa malo’ kata ‘kuom Wuoro.’ (Johana 19:11; Jakobo 1:17) Ee, Nyasaye ema miyo inyuolo ng’ato manyien.—1 Johana 3:9.

Ka waketo e paro ni kaluwore gi dho-Grik machon ng’at monyuol manyien inyalo wach ni onyuol ‘koa malo,’ yot ng’eyo gimomiyo ng’ato owuon ok dimi onyuole manyien. Par ane kuom wach nyuol mari masie kaka dhano. Be in ema ne iyiero ni mondo onyuoli? Ooyo, ngang’! Wuoru ema ne omiyo onyuoli. Kamano bende, wanyalo yudo nyuol manyien mana ka Nyasaye, Wuonwa me polo, ema omiyo onyuolwa manyien. (Johana 1:​13) Omiyo, jaote Petro nowacho kare kama: ‘Opak Nyasaye, Wuon Ruodhwa Yesu Kristo. Kuom kechne maduong’ ne onyuolowa nyuol manyien.’—1 Petro 1:3.

Be En Chik?

Kata kamano, jomoko nyalo penjore ni, ‘Ka onge ng’ato mayiero owuon mondo onyuole nyuol manyien, to kare ang’o momiyo Yesu nochiko ni: “Nyaka nyuolu nyuol manyien”? ’ Mano en penjo mowinjore. Nikech ka dipo ni weche Yesu ne gin chik, nyalo bedo ni omiyowa chik mar timo gima waonge gi nyalo mar timo. Mano ok dibed kare. Kare tiend wacho ni, nyaka ‘nyuolu nyuol manyien’ en ang’o?

Nono mos kaka ne itiyo kod wachno e dhok machon nyiso ni, wacho ni nyaka ‘nyuolu manyien,’ ok ne en chik. Kar mano, wachno ne itiyo godo e nyiso mana gima onego otimore. Tiende ni, sama Yesu nowacho ni, nyaka ‘nyuolu nyuol manyien,’ ne onyiso mana gima onego otimore, to ok ni ne ochiwonegi chik. Nowacho kama: “Dwarore ni mondo onyuolu gi nyuol moa malo.”—Johana 3:​7, Modern Young’s Literal Translation.

Mondo waler pogruok mantie e kind gima en chik kod wacho awacha kaka weche obet, par ane ranyisini. Wawach ni nitie taon moro ma nigi skunde mogwaro. Skul moro oket mondo obed mar nyithindo mawuok e anyuola moro modak mabor gi taondno. Chieng’ moro, rawera moro maok ni e anyuolano nyiso hedmasta mar skundno niya: “Adwaro ni urwaka e skunduni.” Hedmasta nyise ni, “Mondo omi orwaki e skundni, nyaka ibed ja anyuolani.” En adier ni, weche hedmastago ok gin chik. Wechenego ok nyis ni ochiko japuonjreno ni, “Lokri ibed e anyuola mar jo kae! ” Hedmasta wacho mana kaka weche obet—tiende ni gima dwarore mondo eka ng’ato odonj e skundno. Kamano bende, sama Yesu nowacho ni: ‘Nyaka nyuolu nyuol manyien,’ ne otemo mana nyiso kaka weche obet—gima dwarore mondo eka ng’ato ‘odonji e Pinyruodh Nyasaye.’

Wach mogikno—tiende ni, Pinyruodh Nyasaye—otudore gi wach nyuol manyien e yo moro machielo. En wach mamiyo wapenjo kama, Ang’o momiyo nyuol manyien dwarore? Ng’eyo dwoko mar penjono konyo ahinya e ng’eyo malong’o tiend nyuol manyien.

[Weche moler piny]

[Picha manie ite mar 6]

En chal mane mantie e kind nyuol manyien kod nyuol masie?

Nyuol Manyien​—Ang’o Momiyo Inyuolo Ng’ato Manyien?

JI MANG’ENY paro ni ng’ato onego onyuol manyien mondo eka oyud warruok mochwere. Kata kamano, ne ane gima Yesu owuon nowacho kuom gimomiyo inyuolo ng’ato manyien. Nowacho kama: ‘Ka ok onyuol ng’ato nyuol manyien, ok onyal neno pinyruodh Nyasaye.’ (Johana 3:​3) Kuom mano, dwarore ni onyuol ng’ato manyien eka mondo odonji e Pinyruodh Nyasaye, to ok ni mondo oyud warruok. ‘Kata kamano,’ jomoko nyalo penjo ni to, ‘donge weche ariyogi—donjo e Pinyruoth kod yudo warruok⁠⁠—⁠tiendgi en mana gimoro achiel? ’ Ooyo, ok en kamano. Mondo omi wane pogruok, we wakwong wanon ane tiend “pinyruodh Nyasaye.”

Pinyruoth en sirkal. Kuom mano, “pinyruodh Nyasaye” tiende en “sirkand Nyasaye.” Muma puonjo ni Yesu Kristo, “wuod dhano,” e Ruoth mar Pinyruodh Nyasaye, kendo ni Kristo nigi joloch wetene. (Daniel 7:​1, 13, 14; Mathayo 26:​63, 64) E wi mano, fweny ma ne omi jaote Johana nyiso ni jogo malocho gi Kristo gin jo moyier “moa e ogendini duto, gi dhok duto, gi dhoudi duto gi pinje duto” kendo “ginibed gi loch e piny.” (Fweny 5:​9, 10; 20:6) Wach Nyasaye bende konyowa ng’eyo ni jogo ma nolochi kaka ruodhi ema bedo jokanyo mag ‘kweth matin’ mar ji 144,000 “ma nowar oa e piny.”—Luka 12:32; Fweny 14:​1, 3.

Pinyruodh Nyasaye locho ka nikanye? “Pinyruodh Nyasaye” iluongo bende ni “pinyruodh polo,” manyiso ni Yesu kod ruodhi wetene locho ka gin e polo. (Luka 8:⁠10; Mathayo 13:11) Omiyo, Pinyruodh Nyasaye en sirkand polo, miloso gi Yesu Kristo kod kweth mar joloch wetene moyier kuom oganda dhano.

Kare tiende ang’o kane Yesu owacho ni ng’ato nyaka nyuol manyien eka mondo odonji “e pinyruodh Nyasaye”? Tiende ne en ni dwarore ni ng’ato onyuol manyien eka mondo obed jaloch kanyachiel gi Kristo e polo. Kokete e yo machuok, gimomiyo inyuolo ji manyien en ni mondo olosi kweth matin mar dhano mabiro locho e polo.

Nyaka chop sani, waseneno ni nyuol manyien en gima dwarore ahinya, to Nyasaye ema miyo inyuolo ng’ato manyien, kendo ni chenro mar nyuol manyien en mano mar loso kweth manok mar dhano mondo gibi gilochi e polo. Kata kamano, kuom adier nyuol manyienno timore e yo mane?

[Weche manie ite mar 7]

Gimomiyo inyuolo ji manyien en ni mondo olosi kweth matin mar dhano mabiro locho e polo

[Picha manie ite mar 7]

Yesu Kristo kod kweth mar joloch wetene moyier kuom dhano ema gin jokanyo mag Pinyruodh Nyasaye

Nyuol Manyien​—En Gima Timore Nade?

YESU nowuoyo kod Nikodemo, ok mana kuom gimomiyo nyuol manyien dwarore, kata kuom wach ng’ama kelo nyuol manyienno, koda gimomiyo itime kende, to bende nowuoyo kuom kaka nyuol manyienno timore. Yesu nowacho kama: ‘Adier, adier, awachoni, ka ng’ato ok onyuol gi pi kendo gi roho, ok onyal donjo e pinyruodh Nyasaye.’ (Johana 3:5) Kuom mano, ng’ato inyuolo manyien kokalo kuom pi kod roho. To wacho ni “pi kendo gi roho” tiende ang’o?

“Pi Kendo gi Roho”—Gin Ang’o?

Bedo ni ne en Ja-Yahudi mosomo, onge kiawa ni Nikodemo nong’eyo tiend gima Ndiko mag Dho-Hibrania ne wacho sama gitiyo kod wach ni ‘roho mar Nyasaye’—tiendeni teko mar Nyasaye manyalo miyo ji otim gik makende. (Chakruok 41:38; Wuok 31:3; 1 Samuel 10:6) Omiyo, kane Yesu owacho ni ‘roho,’ Nikodemo nyalo bedo ni nong’eyo ni owuoyo kuom roho maler, ma en teko ma Nyasaye tiyogo.

To nade pi ma Yesu nowuoyoe? Par ane weche ma nondiki kapok Yesu owuoyo gi Nikodemo koda bang’e ka gisewuoyo. Wechego nyiso ni Johana Jabatiso kaachiel gi jopuonjre Yesu, ne oyudo batiso ji e pi. (Johana 1:​19, 31; 3:​22; 4:​1-3) Timni en tim ma bang’e ne ong’ere ahinya e Jerusalem. Omiyo, kane Yesu owuoyo e wach pi, Nikodemo ne nyalo fwenyo ni Yesu ok ne wuo kuom pi apia, to nowuoyo kuom pi mar batiso.a

Batiso “gi Roho Maler”

Ka ‘nyuol gi pi’ otudore gi batiso mar pi, tiende ang’o wacho ni ng’ato ‘onyuol gi roho’? Kane pok Nikodemo ochako wuoyo gi Yesu, Johana Jabatiso noyudo osewacho ni ok pi kende ema ibiro ti godo e batiso, to bende ne idhi ti kod roho. Nowacho kama: ‘An asebatisou gi pi; to Yesu nobatisou gi roho maler.’ (Mariko 1:​7, 8) Mariko, ma jandik-Injili lero kaka batiso ma kamano nokwongo otimore. Ondiko niya: ‘Ndalogo Yesu nobiro koa Nazareth man gweng’ Galili, kendo Johana ne obatisoe e Jordan. Gikanyono koa e pi noneno polo kobarore, kendo roho machalo gi akuru ka lorne.’ (Mariko 1:​9, 10) Kane onyum Yesu ei pi aora Jordan, mano nonyiso ni ne obatisoe gi pi. To e sama roho ne olorne koa e polo, ne obatisoe gi roho maler.

Higini madirom adek bang’ batiso mare, Yesu nosingo ne jopuonjrene kama: ‘Un nobatisu gi roho maler ka pok ndalo mang’eny osekadho.’ (Tich Joote 1:5) Mano ne otimore kinde mane?

E odiechieng Pentekost mar higa 33 E Ndalowa, chiegni jopuonjre 120 mag Yesu nochokore e ot moro e Jerusalem. ‘Eka dwol nobiro apoya, koa e polo, kaka yamo maduong’ ma mor matek, mopong’o ot duto ma ne gibetie. Kendo lep mokagore machalo gi ligek mach nowuoknigi, to roho maler nopong’ogi giduto.’ (Tich Joote 2:​1-4) E odiechieng’no bende, ne ojiw jomoko ma ne ni Jerusalem mondo obatisgi e pi. Jaote Petro nonyiso oganda moro niya: ‘Lokuru chunyu, kendo obatisu uduto e nying Yesu Kristo, mondo richou owenu; eka ununwang’ chiwo ma en roho maler.’ Ogandano notimo ang’o? “Jo ma norwako wachne nobatisi: mi chieng’no nomednigi ji kar gana adek.”—Tich Joote 2:⁠38, 41.

Ng’ato Nyaka Kal e Batiso Ariyogi

Batiso milero malo kae nyisowa ang’o kuom wach nyuol manyien? Ginyiso ni nyuol manyien en gima timore kokalo kuom batiso tieng’ ariyo. Ne ni mokwongo Yesu ne obatisi gi pi. Kae to noyudo roho maler. E yo machalo kamano, jopuonjre Yesu ne okwong obatisi e pi (moko gi Johana Jabatiso), kae to bang’e ne giyudo roho maler. (Johana 1:​26-36) Kamano bende, jopuonjre manyien 3,000 ne okwong obatisi gi pi, kae to bang’e ne giyudo roho maler.

Ka waparo batiso ma ne otimore chieng’ Pentekost 33 E Ndalowa, wanyalo geno ni nyuol manyien otimore e yo mane kindegi? Mana kaka ne otimore e kinde joote Yesu koda jopuonjre ma nokwongo betie. Mokwongo, ng’ato loko chunye kuom richone, oweyo timbene maricho, ochiwo ngimane duto ne Jehova mondo olame kendo otine, kae to onyiso chiwruok mareno e lela kokalo kuom batiso mar pi. Bang’e, kapo ni Nyasaye oyiere mondo obi obed achiel kuom joloch e Pinyruodhe, jalo bedo ng’at mowal kuom roho maler. Okang’ mokwongoni (ma en batiso mar pi) en okang’ ma ng’ato owuon ema kawo; to okang’ mar ariyo (ma en batiso gi roho) en okang’ ma Nyasaye ema kawo. Ka ng’ato okalo e batiso ariyogi, mano nyiso ni osenyuole manyien.

Kata kamano, ang’o momiyo Yesu kane wuoyo gi Nikodemo nowacho ni, ‘nyuol gi pi kendo gi roho’? Notiyo gi wach mar ‘nyuol,’ mondo onyisgo ni jogo ma ibatiso gi pi koda roho, gin joma ne dhi kalo e lokruok maduong’. Sula maluwo biro wuoyo kuom lokruok matimore e nyuol manyien.

[Weche moler piny]

[Picha manie ite mar 9]

Johana nobatiso gi pi, Jo-Israel ma noloko chunygi

Nyuol Manyien​—Chopo Ang’o?

ANG’O momiyo Yesu nowacho ni ng’ato ‘inyuolo gi roho,’ kane owuoyo kuom batiso gi roho maler? (Johana 3:5) Kitiyo kode e yor ngero, ‘nyuol’ tiende en “chakruok mar gimoro,” mana kaka “chakruok mar oganda.” Kuom mano, wacho ni ‘nyuol manyien,’ tiende en “chakruok manyien.” Omiyo, tiyo gi weche kaka ‘nyuolo’ koda ‘nyuol manyien,’ medo jiwo ni winjruok manyien ne dhi bedoe e kind Nyasaye koda jogo ma ibatiso gi roho maler. Ere kaka lokruok maduong’no timore e ngimagi?

Kolero kaka Nyasaye iko dhano mondo obi obed joloch e polo, jaote Paulo notiyo gi ranyisi moro mar ngima joot. Nondiko ne Jokristo ma ndalone kowacho ni ne gidhi ‘doko yawuowi,’ kendo ni Nyasaye koro ne dhi bedo kodgi ‘kaka yawuote.’ (Jo Galatia 4:5; Jo Hibrania 12:7) Mondo wane ni en lokruok mane ma jatimore bang’ ka ng’ato obatisi gi roho maler, we wanon ane kendo ranyisi mar rawera madwaro somo e skul kama idwaroe jopuonjre mawuok e anyuola mopogore gi mare.

Lokruok Matimore ka Ng’ato Oloki Mobedo Ja Oganda Machielo

E ranyisino, rawerano ok nyal somo e skundno nikech ok en nyathi monyuol e ogandano. Koro kaw ane ni chieng’ moro, lokruok maduong’ otimore. Wuoro moro mowuok e ogandano kawe mondo obed nyathine. Gin lokruok mage ma koro nie ngima rawerano? Nikech koro oseloke mobedo ja anyuolano, koro en gi ratiro duto mana kaka rowere mamoko ei ogandano—moriwo koda ratiro mar somo e skundno. Tim mar kawe obed ja anyuolano, okelone lokruok chuth e ngimane.

Ranyisino nyiso gima timore e okang’ mamalo ne jogo mayudo nyuol manyien. Ne ane kaka chal margi ket. Rawerano ibiro miyo thuolo mar somo e skundcha, to mana kochopo gino madwarore mondo eka orwake, ma en bedo achiel kuom jo ogandano. Ka kuom adier, en owuon oonge gi nyalo mar timo kamano. Kamano bende, nitie moko kuom oganda dhano mabiro mi thuolo mar bedo jokanyo mag Pinyruodh Nyasaye, ma en sirkal manie polo, to mana ka gichopo gino madwarore kuomgi mondo eka gidonj—ma en ‘nyuol manyien.’ Kata kamano, ok ginyal chopo gino madwarore kendgi giwegi, nikech Nyasaye ema miyo inyuolo ng’ato manyien.

En ang’o mane okelo lokruok e ngima rawerano? Wuoro mawuok e ogandano ne okawe mobedo nyathine. En adier ni timo kamano ne ok oloko kit rawerano. Pod ne odong’ mana gi kite. Kata kamano, bang’ kane wuoro cha osekawe mobedo ja anyuolano, koro rawerano noyudo ratiro momedore. Kuom adier, nochako ngima manyien mana ka ng’at monyuol manyien. Jo anyuolano ne orwake kaka wuodgi, mi gimiye ratiro mar somo e skul, kendo bedo achiel kuom jood wuoro ma ne okawe.

Kamano bende, Jehova noloko chal mar kweth mar dhano moko, kane oloso negi yo mondo gibed nyithinde. Jaote Paulo, ma ne en achiel kuom jogo maloso kwethno, nondiko ne Jokristo wetene kama: ‘Nikech ne ok uyudo roho mar bet misumba kendo, mondo omiu luoro, to nuyudo chuny mar bet yawuot wuon dala, momiyo waywak ni, “Abba! Wuora! ” Roho owuon riwore kaachiel kod chunywa kodoko janeno ni wan nyithind Nyasaye.’ (Jo Rumi 8:​15, 16) Ee, kokalo kuom chenro mar miyo gibed jokanyo mag oganda machielo, Jokristogo nobedo jokanyo mag od Nyasaye, tiendeni “nyithind Nyasaye.”—1 Johana 3:1; 2 Jo Korintho 6:​18.

Kuom adier, gima Nyasaye ne otimono ok ne oloko kit jogo, nimar pod ne gin dhano morem. (1 Johana 1:8) Kata kamano, mana kaka Paulo ne odhi nyime lero, bang’ chopo gigo madwarore mondo omi gibed yawuot Nyasaye, koro ne giyudo ratiro moko manyien. Gie kindeno bende, roho maler mar Nyasaye noketo yie motegno kuom jogo ma ne obedo yawuotego, ka gibedo gi geno madier mar dhi dak gi Kristo e polo. (1 Johana 3:2) Yie motegno ma roho mar Nyasaye nomiyogi, miyo gineno ngima e yo manyien ahinya. (2 Jo Korintho 1:​21, 22) Ee, ne gichako ngima manyien—minyalo wach ni nyuol manyien.

Kowuoyo kuom jogo ma Nyasaye otimo yawuote, Muma wacho kama: “Ginibed jodolo mag Nyasaye kod mag Kristo, kendo giniloch kode kuom higini gana achielgo.” (Fweny 20:6) Ka gin gi Kristo, yawuot Nyasaye-go nobed ruodhi e Pinyruodh Nyasaye, ma en sirkal manie polo. Jaote Petro nowacho ne Jokristo wetene ni ne gidhi yudo “gikeni ma ok tow, ma ok kethre, kendo ma ok lal” ma gin gikeni ‘mokan negi e polo.’ (1 Petro 1:​3, 4) Mano kaka gin gikeni maber miwuoro!

Kata kamano, wach lochni nyuolo penjo moro. Ka jogo mayudo nyuol manyien biro locho ka gin ruodhi e polo, gibiro locho e wi jo mage? Penjono ibiro non e sula maluwo.

[Picha manie ite mar 10]

Paulo nowacho ang’o kuom wach bedo yawuot od Nyasaye?