Kik Uwe Hera ma ne Un-Go Mokwongo
1 Bang’ ka Yesu osemi duong’ e polo, ne osiemo kanyakla machon mar Efeso kama: “To an kodi gi wach, ni, iseweyo herani mokwongo.” (Fwe. 2:4) Nenre ni thothgi ne oselalo hera ma ne gin-go mokwongo kuom Jehova. E kinde ma ne wapuonjore adiera, ne wabedo gi hera matut kuom Nyasaye kod jowetewa, kendo mano ne omiyo wabedo gi kinda mar nyiso jomoko genowa manyienno. Ang’o manyalo konyowa mondo kik walal hera ma ne wan-go mokwongo kendo mondo kindawa e tij lendo kik dog chien?
2 Puonjruok kod Dhi e Chokruok: Ang’o ma ne omiyo wabedo gi hera kuom Nyasaye kod jowetewa kane wakwongo puonjre adiera? Donge ne gin gigo ma ne wapuonjre e wi Jehova kokalo kuom Ndiko? (1 Joh. 4:16, 19) Kuom mano, mondo herawa “omedre mathoth ahinya,” nyaka wadhi nyime gi puonjruok mondo wabed gi ng’eyo makare chuth, ka wamanyo “gik matut mag Nyasaye.”—Fili. 1:9-11; 1 Kor. 2:10.
3 Bedo gi chenro maber mar puonjruok ma ng’ato timo kende owuon ok en gima yot e ndalogi mag giko, mopong’ gi parruok kod chandruok. (2 Timo. 3:1) Nyaka wayang kinde e chenro magwa mondo omi wapidhre e Wach Nyasaye. Dhi e chokruoge mag kanyakla ma ok wabare bende dwarore ahinya, to moloyo ka waneno ni “Chieng’no sudo machiegni.”—Hibr. 10:24, 25.
4 Tij Lendo: Bedo gi kinda e tiyo tij lendo konyowa rito hera ma ne wan-go mokwongo kuom Nyasaye. Lando wach maber en gima paronwa wan wawegi singo mag Jehova manyiso hera, kendo mani konyowa bedo gi geno kod hera motegno. Puonjo ji adiera mag Muma en gima dwaro ni mondo watim nonro mondo omi wawinj tiendgi e yo maber wan wawegi, to timo kamano jiwo yie marwa.—1 Timo. 4:15, 16.
5 Jehova ema owinjore yudo gik moko duto, to mano oriwo kata hera marwa. (Fwe. 4:11) Kik iwe herani mondo odog chien. Mi hera ma ne in-go mokwongo omed bedo motegno kuom puonjruok mitimo in iwuon gi kinda, dhi e chokruoge ma ok ibari, kendo kuom timo kinda e lando ne jomoko gino mihero kendo migeno ahinya e chunyi.—Rumi 10:10.