Kaka Inyalo Miyo Jogo Makawo Gasede Obed Jopuonjre Muma
1. En ang’o ma wachano timo e dweche mag April kod Mei?
1 E dweche mag April kod Mei, wabiro chiwo gasede mag Mnara wa Mlinzi kod Amkeni! ka geno marwa en chako puonjruok Muma gi ji e bug Muma Puonjo, seche ma wadok limo jogo ma okawo gasede. Maluwogi gin moko kuom paro manyalo konyowa. Ng’e ni parogi onego oti godo e yo manyalo tiyo e alworau kendo iketgi e wecheni iwuon. Bed thuolo mar tiyo gi yo kata paro moro machielo ka ineno ni mano nyalo tiyoni maber.
2. Ere kaka wanyalo tiyo kod ite mag 4-6 e bug Muma Puonjo e chako puonjruok Muma gi ji?
2 Ti Kod Ite Mag 4-6 e Bugno: Achiel kuom gik ma inyalo timo e seche ma idok en tiyo gi weche machalo kama: “Gasede ma ne aweyoni jiwo weche manie Muma. Ne ane gimomiyo somo Muma en gima dwarore ahinya.” Som Isaiah 48:17, 18; Johana 17:3; kata ndiko moro mowinjore. Bang’ wuoyo kuom buk mar Muma Puonjo kendo kisemiyo wuon ot bugno, inyalo dhi nyime ka iwacho kama:
◼ “Muma miyowa geno madier kuom kinde mabiro.” Nyis wuon ot ite mag 4-5 kendo ipenje ni, “Gin mage kuom gigi ma ne osingi ma diher neno ka timore?” El ne wuon ot sula mawuoyo kuom singo manie Ndiko ma oyiero, kendo wuo machuok kuom paragraf achiel kata ariyo ka wuon ot oyie.
◼ Kata inyalo wacho kama: “Muma chiwo dwoko kuom penjo ma ochuno ahinya e ngima.” El ne wuon ot ite mar 6, kendo ipenje kabe ose penjore penjo manie bwo iteno. El ne sula ma oting’o dwoko, kendo wuo machuok e wi paragraf achiel kata ariyo.
◼ Kata inyalo nyise moko kuom sula mochan e ite moting’o weche mantie ei buk kendo penje sula ma doher mondo uwuoye. El sula ma oyierono, kendo nyise machuok kaka inyalo tim puonjruok Muma.
3. Wanyalo chako puonjruok Muma nade gi ji bang’ weyo negi gasede mawuoyo kuom (a) chandruok mamedore e piny? (b) ngima mar joot? (c) Muma kaka buk minyalo gen?
3 Weye gi Penjo e Limbe Mokwongo: Gimachielo minyalo yiero timo e limbe mokwongo en iko wach ma ubiro wuoyoe seche midok lime. Ka wuon ot osekawo gasede, miye penjo ma kendo inyise ni ibiro dwoko penjono kidok lime. Tim chenro mar dok, kendo ne ni idok. (Math. 5:37) Seche ma idok, par ne wuon ot penjo ma ne iweyone, kendo som machuok paragraf moro achiel kata ariyo e bug Muma Puonjo ma dwoko penjono. Miye buk achiel mondo oluwore kodi e sa misomo. Maluwogi gin moko kuom ranyisi minyalo tiyogo.
◼ Ka gaset ma ne iweyone wuoyo kuom chandruok mamedore e piny inyalo wacho niya, “Ka aduogo, wanyalo wuoyo kuom dwoko mayudore e Muma kuom penjoni, Gin lokruok mage ma Nyasaye biro kelo e pinyka?” Ti gi ite mag 4-5 sama idok. Kata inyalo penje kama, “Be masiche gin dwaro mag Nyasaye?” E sama idok, nyis wuon ot paragraf 7-8 e sula mokwongo.
◼ Ka gaset ma ne iweyone wuoyo kuom ngima mar joot, ka pok igone oriti, inyalo penje niya, “Ang’o ma ng’ato ka ng’ato e ot nyalo timo mondo mor omedre e ngimagi kaka joot?” E sama idok, wuo kuom paragraf mar 4 e sula 14.
◼ Ka gaset ma ne iweyone wuoyo kuom Muma kaka buk minyalo gen, inyalo miye penjoni ma ubiro wuoyoe ka idok, “Be Muma wacho adier kuom weche sayans?” E seche midok, wuo kuom paragraf mar 8 e sula 2.
4. Ang’o monego watim ka wuon ot otamore kawo bug Muma Puonjo?
4 Kinde duto bang’ wuoyo kode, miye penjo machielo ma ibiro dwoko kidok lime. Ka puonjruok mar Muma ma itimo pile ka pile osechakore, puonjri kode bugno ka iluwo sulago kaka ochan-gi chakre sula mokwongo nyaka gikone. To nade ka wuon ot otamore kawo bug Muma Puonjo? Podi inyalo dhi nyime gi kelone gasede kod wuoyo kode e wi Ndiko. Kaka imedo miye obed gi gombo mar dwaro winjo, bang’ kinde onyalo yie puonjruok Muma.
5. Ang’o momiyo kinda marwa ok onego obed mana mar weyo gasede ne ji?
5 Yesu ne ochikowa ni mondo ‘watim jopuonjre, ka wapuonjogi.’ (Math. 28:19, 20) Omiyo, geno marwa maduong’ seche ma waweyo gasede ne ji en puonjo adiera ne jogo ma chunygi dwaro winjo. E dweche mag April kod Mei, tim kinda ahinya mar chako puonjruok Muma gi ji bang’ weyonegi gasede mag Mnara wa Mlinzi kod Amkeni!