Waduto Wan gi Gima Wanyalo Miyo Jehova
1 Bende ing’eyo ni dhano nyalo miyo Nyasaye gimoro? Abel ne ochiwo ne Jehova misango moko kuom jamni ma ne gihero ahinya, kendo Noa kod Ayub bende ne otimo kamano. (Chak. 4:4; 8:20; Ayub 1:5) En adier ni, misango kaka mago ne ok omedo Jachwech mwandu e yo moro amora nikech en e wuon gik moko duto. Kata kamano, misangogo ne onyiso hera mang’eny ma jo makarego ne oherogo Nyasaye. E ndalogi, wanyalo tiyo gi kinde, teko kod mwanduwa e miyo Jehova “misango ma en pak.”—Hibr. 13:15.
2 Kinde: Mano en wach maber ahinya bedo ni ng’ato ‘ng’iewo’ kinde kuom thuolo mag timo gik ma ok ochuno ahinya mondo omed lendo! (Efes. 5:15, 16, NW) Wanyalo loko chenrowa mondo wabed painia makonyo kuom dwe achiel kata mokalo achiel e higa. Ka ok kamano to wanyalo medo seche ma walendogo. Medo dakika 30 e tij lendo juma ka juma biro medonwa seche ma ok tin ne ariyo e dwe!
3 Teko: Mondo omi wabed gi teko moromo e tij lendo, ok onego wadonj e weche mag mor kata tije mamiyo waol ahinya ma ok wanyal miyo Jehova gima ber moloyo kar nyalowa. Bende dwarore ni waket tenge parruok manyalo miyo chunywa ‘ool,’ kendo ma mayowa teko ma wanyalo tiyogo ne Nyasaye. (Nge. 12:25) Kata ka nitie gima chando chunywa kuom adier, dibed maberie moloyo ‘keto ting’ mari kuom Jehova’!—Zab. 55:22; Fili. 4:6, 7.
4 Mwandu: Wanyalo chiwo mwanduwa bende e tiyo tij lendo. Paulo ne ojiwo Jokristo wetene mondo ‘okan yore’ pile gimoro mondo gibed gi gima ginyalo miyo joma ochando. (1 Kor. 16:1, 2) Kamano bende, wanyalo kano pesa mondo okony e dwaro manie kanyaklawa, kaachiel gi tij Nyasaye madhi nyime e piny mangima. Jehova mor gi chiwo marwa mwatimo gi chunywa duto, kata obed mana matin.—Luka 21:1-4.
5 Jehova osemiyowa gik mang’eny. (Jak. 1:17) Wanyiso erokamano kuom chiwo thuolo ma wan-go, teko kod mwanduwa mamoko e tiyone. Timo kamano moro Jehova, “nikech Nyasaye ohero jachiwo mamor.”—2 Kor. 9:7.