Somo mar 7

Sudo Machiegni gi Nyasaye e Lemo

Ang’o momiyo en gimaduong’ mondo walem pile ka pile? (1)

Onego walam ng’a, kendo e yo mane? (2, 3)

Gin gik mage mowinjore wakwa e lemo? (4)

Onego ilem kinde mage? (5, 6)

Bende Nyasaye winjo lemo duto? (7)

1. Lemo en wuoyo kod Nyasaye gi dembruok. Onego ilam Nyasaye kinde duto. Kamano ibiro winjo ka in machiegini kode kaka osiepni mihero. Jehova duong’ moloyo kendo engi teko, kata kamano owinjo lamowa! Bende ilamo Nyasaye kinde duto?—Zaburi 65:2; 1 Jo Thessalonika 5:17.

2. Lemo en achiel kuom yore mag miyo Nyasaye duong’. Kuom mano, onego walam Nyasaye, Jehova kende. Kinde ma Yesu ne ni e piny, nolamo Wuon mare kende, to ok ng’at machielo. Onego wan bende watim kamano. (Mathayo 4:10, 6:9) Kata kamano, ndalo duto onego walem e nying Yesu. Mani nyisoni waluoro duong’ Yesu kendo ni wayie gi misango ma nochiwo mar ringre.—Johana 14:6; 1 Johana 2:1, 2.

3. Ka walemo owinjore wawach gi Nyasaye weche mawuok e chunywa. Ok onego walem ka wawacho gik ma wamako e wiwa kata mana somo lemo ei kitap lemo. (Mathayo 6:7, 8) Wanyalo lemo gi luor kama wantie, kinde duto, kendo kamoro amora. Nyasaye nyalo winjo kata mana lemo ma wawacho mos e chunywa. (1 Samuel 1:12, 13) Ber mondo wadwar kama okuwe mabor gi ji ka wawacho kwayowa wawegi e lemo.—Mariko 1:35.

4. Gik mage minyalo kwayo e lemo? Gimoro amora manyalo ketho osiep kod Nyasaye. (Jo Filipi 4:6, 7) Lemo mar ranyisi nyiso kaka owinjore walem kuom nying Jehova kod dwarone. Wanyalo kwayo bende mondo omiwa dwaro magwa mag ringruok, mondo owenwa richowa, kata okonywa kwedo tem. (Mathayo 6:9-13) Lemowa ok onego obed mag gwondo. Owinjore walem mana ka wakwayo gigo mowinjore gi dwaro mar Nyasaye.—1 Johana 5:14.

5. Inyalo lemo e kinde moro amora ma chunyi ohero dwoko erokamano kata pako Nyasaye. (1 Weche mag Ndalo 29:10-13) Owinjore ilem e kinde miyudo chandruok kendo kata ka itemo yie mari. (Zaburi 55:22; 120:1) En gimakare mondo ilem kapok ichiemo. (Mathayo 14:19) Jehova wachonwa mondo walem “kinde duto.”—Jo Efeso 6:18.

6. Onego walem ahinya ka watimo richo mapek. E kinde ma kamano owinjore wakwa ng’wono mar Jehova kod weruok. Ka wawachone richowa kendo timo gima wanyalo mondo kik watim richogo kendo, Nyasaye ‘oikore weyo richo.’—Zaburi 86:5; Ngeche 28:13.

7. Jehova winjo lemo mag ji makare kende. Mondo Nyasaye owinj lemo magi, nyaka item ahinya dak kaluore gi chikene. (Ngeche 15:29; 28:9) Nyaka idembri ka ilemo. (Luka 18:9-14) Onego item matek mondo itim gik moko kaluore gi kwayo mari e lamo. Mano biro nyiso ni ingi yie kendo ni gik miwacho gin adier. Eka Jehova nyalo dwoko lemoni.—Jo Hibrania 11:6.