Barua Mowuok Kuom Bura Maduong’
Joneno mag Jehova Wetewa Mwageno:
Wamor ahinya ndikonu un owetewa mwageno! Wawinjo mana kaka jaote Johana, ma ne owacho ni ne ‘ohero gadier’ Jokristo wetene kendo ne omor nikech ne ‘giwuotho e adiera.’ (2 Joh. 1, 4) Ee, mano kaka adiera en gweth maduong’ kuomwa waduto! Adiera osegonyowa e bwo twech mar Babulon Maduong’ kaachiel gi puonjge koda timbene maketho nying Nyasaye. Rwako adiera osekonyowa bedo johera, joma muol, kendo joma ng’won. Kendo adiera osemiyo wabedo gi winjruok maber gi Nyasaye kaachiel gi geno mar yudo ngima mochwere.
Bende, mano kaka wamor kuom roho mar Jehova, ma chikowa pile kendo jiwowa! Wan gadier ni ne umor ahinya kuom nono puonj mopogore opogore e wi mich mar herani ma wuok kuom Jehova e Chokruoge mag Distrikt ma yande orumo mag “Kuongozwa na Roho ya Mungu.” Kaka chal mar piny medo bedo marach, dwarore ahinya ni waket genowa kuom roho mar Jehova ma nigi teko mondo otawa e kinde matek ma podi nie nyimwa.
Wan gadier bende ni weche manie Kitabu cha Mwaka ma wuoyo kuom owetewa ma osenano e bwo sand mang’eny kuom yiegi, ne omulo chunyu ahinya. Kendo en gima iwuoro ahinya ni ng’eny owete ma ne ochung’ motegnogi ne oyudo osebatisi mana kuom kinde machuok kendo moko pok ne obatisi e kinde ma ne chandruok chakre. Mano kaka wan-gi hera kuomgi nikech chung’gi motegno kaachiel gi siro tim makare! Kuom adier, ranyisigi mabeyo ahinya jiwowa mondo wadhi nyime chung’ motegno ka wariwo Pinyruoth lwedo kata bed ni en chandruok mane manyalo yudowa.—1 Thes. 1:6-8.
Owetewa gi nyiminewa mwageno, wang’eyo ni nitie chandruoge mang’eny mag yuto koda mamoko ma ukedogo mondo umi hera osik e uteu. Moko kuomu, ok en gima yot tiyo tij lendo kendo dhi e chokruoge kinde ka kinde ma ok ubare. Mano emomiyo, bang’ nono wachno nyading’eny kendo lamo, wasetimo lokruok moko e chokruoge mag kanyakla chakre Januar 1, 2009. Wageno ni ubiro tiyo maber gi lokruogego mondo omi uti gi thuolo momedore e puonjruok mar ng’ato owuon koda e puonjruok mar joot.
E chokruoge mang’eny mag alwora kaachiel gi mag distrikt ma higani, ne en mor maduong’ neno joma ng’eny ma ne obatisi. Moko kuomgi ne podi tindo e hikgi. Un jonyuol wapuoyou kuom pidho nyithindu ka umiyo girwako adiera kendo jiwogi gichiw ngimagi mondo giti ne Jehova ka podi gitindo. Bedo ni rowerego ne owinjore gi batiso kata obedo ni giyudo chandruoge mang’eny e skul, nyiso maler ni ne giyudo tiegruok maber e utegi.—Zab. 128:1-6.
Bende en gima ber ahinya neno dongruok e tij puonjruok gi ji Muma—kendo owetewa ma gin jomisonari kaachiel gi jopainia osetiyo matek e tijni. Waduto jokanyo mag Bura Maduong’ wamor ahinya gi tich maduong’ ma un owete gi nyimine utimo e piny mangima, kuom wacho ne joma chunygi tir ni, “Bi!” ka ugwelo jogo duto ma nigi riyo mondo “oyud pi mar ngima nono.” (Fwe. 22:17) Un owete gi nyimine 289,678 ma ne ochiwo ngimagi ne Jehova kokalo kuom batiso mar pi e higa mokalo, warwakou ahinya e riwruok mar owete mar piny mangima!
Ber ka wasiko wanwoyo paro weche mag jaote Johana, ma ne ondiko kama: “Piny kadho, gi gombone: to ng’a ma timo gi ma Nyasaye dwaro osiko nyaka chieng’.” (1 Joh. 2:17) Kendo siko ka waketo e paro ni pinyni chiegni ahinya “kadho”! Mano kaka en gima nyiso rieko ka gima duong’ e ngimawa en siko ka watimo dwach Nyasaye kendo siko ‘ka warito.’ (Math. 24:42) Ok wabi yuago ang’e kuom timo kamano, kendo wabiro yudo gweth mang’eny mag hera mang’won mar Jehova.—Isa. 63:7.
Wageno ni weche mabeyo mayudore e Kitabu cha Mwaka ma higani biro jiwou uduto mondo uket weche mag Pinyruoth obed mokwongo e ngimau. Wadwaro ni ubed gadier ni kinde duto waparou kendo un e lamo magwa bende waherou ahinya. Wakwayo mondo Jehova ogwedhu gi gwethne mogundho.
Wan Oweteu,
Bura Maduong’ mar Joneno mag Jehova