Be Nyasaye ne Dwaro ni Mondo Piny Obed Machalo Kama?

SOM gaset moro amora. Ng’i ane e televison, kata winj e redio. Nitie weche mang’eny mag mahundu, lweny, kaachiel gi timbe makelo luoro! Par ane chandruok ma in iwuon in-go. Nyalo bedo ni tuwo, kata tho mar ng’at mihero keloni kuyo mang’eny ahinya. Nyalo bedo ni in bende iwinjo kaka Ayub ng’at makare ne winjo, kane owacho ni ngimane ne “opong’ gi kuyo.”—Ayub 10:15, The Holy Bible in the Language of Today.

Penjri niya:

Be Nyasaye ne dwaro ni ngimana obed machalo kama kaachiel gi ngima dhano duto?
Ere ka manyalo yudoe kony mar nyagruok gi chandruok ma ayudo?
Be nitie geno moro amora ni piny biro bedo gi kuwe chieng’ moro?

Muma chiwo dwoko maber mowinjore e wi penjogi.

MUMA PUONJO NI NYASAYE BIRO KELO LOKRUOKGI E PINY KAE.

“Nyasaye noywe pi wang’ duto e wengegi; tho ok nobedie kendo, kata ywak, kata nduru, kata rem ok nobedie.”—Fweny 21:4

“Ng’ato ma rang’ol nochikre ka ngau.”—Isaiah 35:6

“Wang’ mwofini noyepi.”—Isaiah 35:5

“Ji duto manie liete . . . giniwuog oko.”—Johana 5:28, 29

“Japiny ok nowachi, Atuwo.”—Isaiah 33:24

“Bel nobedi mang’eny e piny.”—Zaburi 72:16

The earth changed as God purposed: Old become young, sick and blind are healed, dead are resurrected, there’s plenty of food

YUD KONY KUOM GIMA MUMA PUONJO

Kik irikni wacho ni weche monyis e kalatase moteloni mae, ni gin paro manono. Nyasaye osingo ni obiro timo gigi, kendo Muma nyiso kaka obiro timogi.

Two men studying the Bible using the Bible Teach book

Kata kamano, Muma nyisowa weche mamoko bende. Okonyowa ng’eyo yo ma wanyalo yudogo mor madier e ngima, kata mana gie sani. Par ane matin kuom chandruoge ma in-go. Ginyalo bedo mag pesa, mag ngima mar joot, midekre, kata tho mar ng’at mihero. Muma nyalo konyi nyagruok gi chandruok e ndalogi, kendo onyalo hoyo chunyi ka ochiwo dwoko mag penjo kaka:

Ang’o momiyo wachandore?
Ere kaka wanyalo nyagore gi chandruok mag ngima?
Ere kaka wanyalo miyo ngima mar joot obed mamor?
Ang’o ma timore ka ng’ato otho?
Be wabiro neno jowa mosetho kendo?
Ere kaka wanyalo bedo gi adier ni Nyasaye biro timo gigo ma osingo e kinde mabiro?

Nikech isomo bugni gie sani, mano nyiso ni idwaro ng’eyo gima Muma puonjo. Bugni biro konyi. Ne ni paragraf ka paragraf nikod penjo mayudore piny mar kalatas. Ji tara gi tara osebedo ka puonjore Muma gi Joneno mag Jehova ka gitiyo gi chenro mar penjo gi dwoko. Wan gi geno ni in bende ibiro timo kamano. Nyasaye mondo ogwedhi e seche ma iyudo mor e nono gima Muma puonjo kuom adier!