Nyasaye dwaro ni wadag gi kuwe koda mor e paradis me piny nyaka chieng’!

Nyalo bedo ni ipenjori niya: ‘Be mano nyalore? ’ Muma wacho ni Pinyruodh Nyasaye biro miyo mano onyalre, kendo onyisowa ni Nyasaye dwaro ni ji duto opuonjre wach Pinyruodhno koda gimomiyo ne ochweyowa.​—⁠Zaburi 37:​11, 29; Isaiah 9:7.

Nyasaye dwaro ni mondo okonywa.

Mana kaka wuoro ma jahera dwaro mana ber ne nyithinde, Wuonwa me polo dwaro ni wayud mor masiko nyaka chieng’. (Isaiah 48:​17, 18) Nyasaye osingo ni “ng’at ma timo dwach Nyasaye siko nyaka chieng’.”​—⁠1 Johana 2:17.

Nyasaye dwaro ni wawuoth e yorene.

Muma wacho ni Jachwechwa dwaro ‘puonjowa’ mondo ‘wawuoth e yorene.’ (Isaiah 2:​2, 3) Oseloso oganda mar “joma iluongo gi nyinge” mondo oland dwaro mare e piny mangima.​—⁠Tich Joote 15:14.

Nyasaye dwaro ni walame e achiel.

Kar kelo pogruok e kind ji, lamo maler mar Jehova riwo ji e hera madier. ( Johana 13:35) Ng’a gini e kindegi mapuonjo ji kuonde duto kaka ginyalo tiyo ne Nyasaye ka gin e achiel? Wakwayi ni imany dwoko mar penjono ei brosuani.

Gin Joneno mag Jehova adi ming’eyo? Nyalo bedo ni moko kuomwa odak machiegni kodi, moko gin jotich, kata joskul weteni. Kata nyalo bedo ni wasewuoyo kodi e wi Muma. Kuom adier, wan jomage, to ang’o momiyo wawuoyo gi ji e wi puonj ma wayiego?

Wan mana jo mapile. Kit ogendini ma wawuokie koda chal marwa mar ngima opogore opogore. Moko kuomwa ne nie dinde mopogore, to moko ne ok oyie ni Nyasaye nitie. Kata kamano, kapok wabedo Joneno, waduto ne wakawo kinde mar nono adimba puonj mag Muma. (Tich Joote 17:11) Ne wayie gi weche ma ne wapuonjore, kae to ne wayiero wan wawegi ni wadwaro lamo Jehova Nyasaye.

Puonjruok Muma konyowa. Mana kaka jomamoko, wan bende wanyagore gi chandruoge koda nyawowa wawegi. Kata kamano, nikech watemo tiyo gi puonj mag Muma e ngimawa mapile, waneno lokruok mabeyo ahinya e kit ngimawa. (Zaburi 128:1, 2) Mano en achiel kuom gimomiyo wawuoyo gi ji kuom gik mabeyo mwasepuonjore e Muma.

Wadak kaluwore gi chike mag Nyasaye. Luwo puonj mayudore e Muma miyo ng’ato owinj e chunye ni ngimane dhi maber, jiwe omi ji luor, kendo obed gi kido kaka bedo ja adiera koda bedo ng’at mang’won. Puonjgo konyo e miyo ji obed gi ngima maber e ringregi, gibed joma kawo ting’ margi e oganda, kendo gijiw tudruok maber koda timbe mabeyo e ngima mar joot. Nikech wan gadier ni “Nyasaye ok buon ng’ato ang’ata,” wan e oganda Nyasaye moriwo owete mawuok e piny mangima, oganda maok ng’i anyuola kata piny ma ng’ato owuokie. Kata obedo ni wan jo mapile, wan oganda makende.—Tich Joote 4:13; 10:34, 35.

• Gin yore mage ma Joneno mag Jehova chalie gi jomamoko?

• Gin chike mage ma Joneno mag Jehova osepuonjore e Muma?

Ji mang’eny paro ni Joneno mag Jehova en din moro manyien. Kata kamano, chon, higini mokalo 2,700, Nyasaye makende madier noluongo jotichne ni ‘jonenone.’ (Isaiah 43:10-12) Nyaka chop higa mar 1931, ne wang’ere kaka Jopuonjre mag Muma. Ang’o momiyo ne waluongore ni Joneno mag Jehova?

Nyingno fwenyo ni Nyasachwa en ng’a. Kaluwore gi buge machon, nying Nyasaye, ma en Jehova, yudore nyadi gana gi gana e Muma. Loko mang’eny mag Muma osewilo nyingno gi nyinge mag telo kaka Ruoth kata Nyasaye. Kata kamano, Nyasaye madier ne ofwenyore ne Musa kotiyo gi nyinge owuon, Jehova, kowacho niya: “Ma e nyinga nyaka chieng’.” (Wuok 3:15) Kuom tiyo gi nyinge, nonyiso ni opogore gi nyiseche duto ma miriambo. Waneno ni bedo joma iluongo gi nying maler mar Nyasaye en gima duong’ ahinya.

Nyingno lero gima tijwa en. E kinde machon, ji mogwaro, chakre gi jal makare Abel, ne ochiwo neno kuom yie ma ne gin-go kuom Jehova. E senchari duto, Noa, Ibrahim, Sara, Musa, Daudi, koda jomamoko ne ikwano kaachiel e “joneno mang’eny molworowa kaka boche polo.” (Jo-Hibrania 11:4–12:1) Mana kaka ng’ato nyalo chiwo neno manyiso ni ng’at moro modonjne onge ketho, e kaka wan bende wang’ado mar lando adiera e wi Nyasaye.

Waluwo ranyisi mar Yesu. Muma luongo Yesu ni “jal mogen kendo ma en janeno madier.” (Fweny 3:14) Yesu owuon nowacho ni ne ‘osemiyo nying Nyasaye ong’ere,’ kendo ni ne ‘ochiwo neno e wi adiera’ kuom Nyasaye. (Johana 17:26; 18:37) Omiyo, jolup madier mag Kristo nyaka luongre gi nying Nyasaye kendo giland nyingno. Mano e gima Joneno mag Jehova temo timo.

• Ang’o momiyo Jopuonjre mag Muma ne okawo nying ni Joneno mag Jehova?

• Jehova osebedo gi joneno mage e pinyka kuom kinde maromo nade?

• Janeno mar Jehova maduong’ie moloyo en ng’a?