Puonj Ji Muma e Yo ma Konyogi Timo Dongruok
1. En ting’ mane ma jolendo nigo sama gipuonjo ji Muma?
1 Onge ng’ato ang’ata ma nyalo tiyo ne Jehova ka Jehova owuon ok “e ma oywaye.” (Joh. 6:44) Kata kamano, jolendo nigi ting’ mar neno ni gitimo duto ma ginyalo sama gipuonjo Muma mondo gikony ji osud machiegni gi Wuonwa manie polo. (Jak. 4:8) Timo mano dwaro ikruok maber. Ka wadwaro ni joma wapuonjorego owinj tiend weche ma wapuonjogi kendo gitim dongruok, nyaka watim mathoth moloyo mana somo paragraf gi dwoko penjo moketi.
2. Puonjo ji e yo maber biro miyo gikaw okang’ mane?
2 Mondo wapuonj ji e yo ma konyogi timo dongruok, nyaka wakonygi mondo (1) giwinj tiend puonj mag Muma, (2) giyie gi puonjgo, kendo (3) giti gi puonjgo e ngimagi. (Joh. 3:16; 17:3; Jak. 2:26) Timo weche adekgi duto nyalo kawo dweche mogwaro. Kata kamano, moro ka moro kuom wechego dwarore mondo japuonjre okaw okang’ mar loso winjruokne gi Jehova kendo chiworene.
3. Ang’o momiyo ber tiyo gi penjo ma konyowa fwenyo gima nie chuny japuonjre?
3 Ang’o Manie Chuny Japuonjre?: Ka wadwaro fwenyo kabe japuonjre winjo tiend gik mopuonjore kod kabe oyie gi gigo, onego watem mondo kik wawuo ahinya sama wapuonjore; kar mano, onego wami japuonjre thuolo mar wacho gima oparo e chunye. (Jak. 1:19) Be owinjo tiend gima Muma wacho kuom wich ma uwuoye? Be onyalo lero wechego maok osomogi achiel kachiel? En gi paro mane kuom weche ma opuonjorego? Be oyie ni gima Muma puonjo e gima owinjore? (1 Thes. 2:13) Be ong’eyo ni gik ma opuonjore onego olok kit ngimane? (Kol. 3:10) Mondo wafweny mago duto, nyaka wati gi penjo ma konyowa fwenyo gima nie chuny japuonjre, kae to wachik itwa sama owuoyo.—Math. 16:13-16.
4. Kapo ni japuonjre yudo ka tekne winjo tiend puonj manie sula moro kata tiyo gi puonj moro e ngimane, ang’o monego watim?
4 Timbe ji kod yo ma giparogo gik moko ogurore ahinya e kitgi, kendo kawoga kinde mondo gilokre. (2 Kor. 10:5) Omiyo, ka japuonjre otamore yie gi puonj moro kata nenore maler ni ok oti gi gik mopuonjore, ang’o monego watim? Dwarore ni wahore. Dipo ka bang’ kinde Wach Nyasaye omulo chunye kendo roho maler ochwale mi otim lokruok. (1 Kor. 3:6, 7; Hib. 4:12) Kapo ni japuonjre yudo ka tekne winjo tiend puonj manie sula moro kata tiyo gi puonj moro e ngimane, kar temo chune mondo otim lokruok, nyalo bedo maber ka wakalo sulano komondi wadhi e machielo. Kaka wamedo hore kode kendo puonje e yo ma nyiso ni wadewe, mosmos onyalo chako timo lokruoge ma dwarore.