SOMO MAR 13
Ang’o ma Biro Timore ne Dinde?
1. Be Nyasaye oyie gi dinde duto?
Nitie joma gombo ng’eyo Nyasaye gadier e dinde duto. Nyasaye neno joma kamano kendo odewogi. Kata kamano, gima lit en ni ji osetiyo gi din e timo gik ma richo. (2 Jo-Korintho 4:3, 4; 11:13-15) Weche milando e TV kata redio nyiso ni dinde moko osedonjo e timbe mahundu, nek mag tieko oganda, lwenje, kod dwanyo nyithindo. Timbe kaka mago osino joma lamo Nyasaye gadier!—Som Mathayo 24:3-5, 11, 12.
Din madier miyo Nyasaye duong’, to din ma miriambo ok mor chunye. Din mar miriambo puonjo gik ma onge e Muma, kaka weche ma ok adier e wi Nyasaye kod e wi joma otho. Kata kamano, Jehova dwaro ni ji ong’e adiera e wiye.—Som Ezekiel 18:4; 1 Timotheo 2:3-5.
2. Muma puonjo ni ang’o ma biro timore ne dinde?
Dinde mag miriambo ok nyal wuondo Nyasaye ni gihere to kare gihero piny Satan. (Jakobo 4:4) Wach Nyasaye luongo dinde duto mag miriambo ni “Babulon Maduong’.” Babulon ne en dala machon kama din ma miriambo ne ochakoree bang’ Ataro mar ndalo Noa. Machiegnini, Nyasaye biro tieko dinde ma wuondo ji kendo ma miyo gichandore.—Som Fweny 17:1, 2, 5, 16, 17; 18:8.
Nitie wach machielo maber. Wi Jehova pok owil gi joma gombo ng’eye gadier ma pod ni e dinde mag miriambo e piny mangima. Oywayo joma kamago kuom puonjogi adiera.—Som Mika 4:2, 5.
3. Ang’o ma dwarore ni joma gombo ng’eyo Nyasaye gadier otim?
Din madier miyo ji bedo gi winjruok achiel
Jehova dewo joma ohero gik madier kendo mabeyo. Ojiwogi ni giwuog e dinde mag miriambo. Joma ohero Nyasaye oikore timo lokruok mondo gimore.—Som Fweny 18:4.
E kinde Jokristo mokwongo, ka ne joma gombo ng’eyo Nyasaye gadier owinjo wach maber mowuok kuom joote, ne girwako wachno gi ilo. Jehova ne opuonjogi dak e ngima ma mor kendo ma nigi geno. Ne giketonwa ranyisi maber ma wanyalo luwo kindegi nikech ne girwako wach maber kuom keto Jehova obed mokwongo e ngimagi.—Som 1 Jo-Thesalonika 1:8, 9; 2:13.
Jehova rwako joma weyo dinde mag miriambo. Ka iyie mondo Jehova orwaki, ibiro bedo osiepne, ibiro bedo achiel kuom Jokristo moherore ma lamo Jehova, kendo ibiro yudo ngima mochwere.—Som Mariko 10:29, 30; 2 Jo-Korintho 6:17, 18.
4. Ang’o ma Nyasaye biro timo mondo ji obed ma mor e piny mangima?
Bedo ni ibiro ng’ad bura ne dinde mag miriambo en wach maber. Mano biro tieko chandruoge duto ma din osekelo ne dhano e piny mangima. Dinde mag miriambo ok nochak owuond ji kendo pogogi. Ji duto biro lamo Nyasaye achiel kende madier.—Som Fweny 18:20, 21; 21:3, 4.