Gimomiyo Onego Owarwa

Dhano osebedo ka paro ahinya kuom kaka ngima nyalo bedo maber kapo ni ginyalo dak nyaka chieng’ ma onge tuoche kod bedo moti. Kata kamano, gima lit en ni dhano tho. Ayub nowacho weche man malogo higni aluf adek mokalo, to pod wechego gin adier nyaka chil kawuono.

Dhano duto gombo ahinya dak nyaka chieng’. Muma nyisowa ni Nyasaye osemiyo chuny dhano paro kuom piny, tiende ni oseketo ei chunywa gombo mar dak nyaka chieng’ ka watiyo gi ngimawa e yo maber. (Eklesiastes 3:11) Be Nyasaye ma jahera nyalo keto ei chunywa gombo mong’eyo ni ok wanyal chopo? Kapo ni dwoko mari en ooyo, to in kare. Wach Nyasaye wacho ni tho en jasigu kendo osingonwa ni ‘ibiro tieke.’—1 Jo-Korintho 15:26.

Ji duto oyie ni tho en jasigu. Onge ng’ato ang’ata ma pache ni kare ma nyalo gombo tho. Sama gimoro marach ma nyalo hinyowa ochomowa, wajopondo kata ringo. Ka wabedo matuo, to wajomanyo thieth. Wajotimo duto mwanyalo mondo wageng’ gimoro amora ma nyalo ng’ado ngimawa.

Be wanyalo bedo gadier tho ma en jasigu mosebedo e pinyka kuom higni mang’eny ibiro tiek? Ee, wanyalo. Jachuechwa ma en Jehova Nyasaye, ne ok ochueyo dhano mondo odak mana kuom higni matin kae to githo. Ne ok ochueyo dhano mondo gibi githo bang’e. To ne ochueyogi mondo gidag e piny nyaka chieng’, kendo dwaroneno nyaka ochop.—Isaiah 55:11.

Kare, ere kaka ibiro tiek tho nyaka chieng’? Kuom higni mang’eny mosekalo dhano osetemo ahinya manyo yore ma ginyalo tiekogo tho, to osetamogi. To wachno pod chando pachgi nyaka kawuono. Josayans osefwenyo yore moko mag thieth manyalo geng’o tuoche moko. Gisetimo nonro matut kuom kaka gik ma ngima chalo. E pinje mang’eny, dhano dak higni mang’eny moloyo kaka ji ne dak higni mia achiel mosekalo. Kata kamano, tho to pod otamo dhano tieko. Muma wacho ni, “giduto gilokore buch lowo kendo.”—Eklesiastes 3:20.

Gima hoyo chunywa en ni ok ochuno ni wa ti gi riekni mag dhano e loyo wach mosechando pach dhano kuom higni mang’enyni. Jehova Nyasaye oseloso chenro mar resowa a e tho, kendo Yesu Kristo e mobiro tiyogo e waro dhano.