Ote Ariyo Moa Kuom Nyasaye

Wanyalo wacho ni Muma kaka en oduto en ote moa kuom Nyasaye. Wuonwa manie polo osemiyowa Muma mondo wapuonjrego. Kata kamano, wanon ane ote moko ariyo makende ma ne ochiw higni 2,000 mosekalo. Malaika miluongo ni Gabriel “ma jachung’ e nyim Nyasaye” e ma nochiwo ote ariyogo. (Luka 1:19) En ang’o kata gin gik mage ma ne timore e ndalo ma malaikano ne chiwoe ote madongogo?

Gabriel notero otego chiegni higa mar 3 ka Kristo podi. Notero ote mokwongo kanye? Ne nitie jadolo mar Jehova miluongo ni Zekaria ma ne odak e gode mag Judea, ma nenore ni ne chiegni gi Jerusalem. En gi Elizabeth chiege, hikgi koro ne oseniang’ to ne gionge gi nyithindo. Sa koro ne ochopo mondo Zekaria otim tije kaka jadolo e hekalu mar Nyasaye man Jerusalem. Sama Zekaria pod ne nie hekalu, malaika Gabriel ne ofwenyorene apoya machiegni gi kendo mar ubani.

Kuom adier, Zekaria bwok ahinya. Kata kamano, malaikano hoye ka wachone niya: “Kik iluor in Zakaria, nimar Nyasaye osewinjo kwayoni, kendo Elizabeth chiegi biro nyuoloni nyathi ma wuowi, mi inichake ni Johana.” Gabriel medo wachone ni, Johana dhi “bedo gi duong’ e wang’ Jehova,” kendo ni obiro ‘loso ne Jehova joma oseik.’​—Luka 1:13-17.

Mano chalo mana lek ne Zakaria. Nikech ang’o? En nikech en kaachiel gi Elizabeth hikgi oseniang’. Omiyo, Gabriel wachone kama: “Ibiro bet momo, kendo ok ibi bedo gi nyalo mar wuoyo nyaka chop chieng’ ma gigi biro timoree, nikech ne ok iyie kuom wechena.”​—Luka 1:20.

Kata kamano, joma ochung’ oko wuoro gimomiyo Zakaria obudho ahinya. Gikone, owuok oko ka en momo. Zekaria koro tiyo mana gi ranyisi mag lwetene e wuoyo kodgi. Nenore ayanga ni oneno hono moro e hekalu.

Bang’ tieko tije e hekalu, Zekaria dok dalane. Kinde matin bang’e, Elizabeth mako ich! Elizabeth siko kar kende kuom dweche abich korito nyuolo nyathine.

Koro, Gabriel fwenyore ne ng’at machielo kendo. En ng’a? Ofwenyore ne nyako moro ma pok okend miluongo ni Maria, modak malo nyandwat e alwora miluongo ni Galili, e taon mar Nazareth. Malaikano wachone ang’o? Owachone niya: “Nyasaye oseyie kodi.” Gabriel medo wacho ne Maria kama: “To ne! inimak ich, kendo ninyuol wuowi, mi inimiye nying ni Yesu.” Gabriel medo niya: ‘Jali nobed gi duong’ kendo enoluonge ni Wuod Ng’at Mamalo Chutho, kendo obiro locho kaka Ruoth e wi od Jakobo nyaka chieng’, kendo Pinyruodhe ok norum.’​—Luka 1:30-33.

En adier ni Gabriel mor ahinya gi migawo mar chiwo ote ariyogo. Kaka wamedo somo sigand Johana kod Yesu, wabiro ng’eyo gimomiyo ote ariyo moa e pologo gin ote madongo ahinya.