Imiyo Yesu Duong’ Kata ka Pok Onyuole

Bang’ ka malaika Gabriel osewacho ne Maria ni obiro nyuolo wuowi ma ne idhi luong ni Yesu kendo ma ne dhi bedo Ruoth ma nyaka chieng’, Maria penjo malaikano niya: “Mano biro timore nade to pok ne anindo gi dichwo?”​—Luka 1:34.

Gabriel dwoke kama: “Roho maler nobi kuomi kendo teko mar Ng’at Mamalo Chutho biro umi. Kendo nikech mano, jal mibiro nyuolono noluong ni maler, Wuod Nyasaye.”​—Luka 1:35.

Gabriel medo wacho ne Maria niya: “Ne! Elizabeth ma watni bende osemako ich mar nyathi ma wuowi kata obedo ni oseti, kendo mani en dweye mar auchiel, dhako ma ji luongo ni migumba; nikech onge gima Nyasaye wacho ma ok nyal timore.” Samoro onyise kamano mondo okony Maria bedo gi yie kuom oteno.​—Luka 1:36, 37.

Weche ma Maria dwokogo Gabriel nyiso ayanga ni oyie gi weche ma Gabriel osewachonego. Maria dwoke kama: “Ne! an misumba mar Jehova! We mondo otimrena kaka isewacho.”​—Luka 1:38.

Ka Gabriel osea, Maria ikore mondo odhi olim Elizabeth. Elizabeth gi Zekaria chwore odak e gode mag Judea machiegni gi Jerusalem. Wuodhno nyalo kawe ndalo adek kata ang’wen kowuok Nazareth dalagi.

Gikone, Maria chopo e od Zekaria. Bang’ donjo, omoso Elizabeth ma watne. Gikanyono, roho maler pong’o Elizabeth kendo owacho ne Maria kama: “In ng’at moguedhi e kind mon kendo nyathi manie iyi en moguedhi! Omiyo, ere kaka ayudo thuolo moyiedh kama momiyo min Ruodha obiro ira? Nimar ne! sama ne awinjo awinja ka imosa ni i, nyathi manie iya a otugo gi ilo.”​—Luka 1:42-44.

Maria dwoke gi chuny mamor niya: “Chunya miyo Jehova duong’, kendo ok anyal weyo bedo gi mor mogundho kuom Nyasaye ma Jawarna nimar oseparo misumbane ma nyako ma jachan. Kendo ne! chakre sani tienge duto biro kwana kaka ng’at mamor nikech Jal ma nigi teko osetimona gik madongo.” Wanyalo neno ni kata obedo ni osenyise ng’wono kamano, Maria dwaro ni Nyasaye oyud duong’ duto. Owacho kama: “Nyinge iluongo ni maler, kendo e tienge duto kechne bedo kuom joma oluore.”​—Luka 1:46-50.

Maria tiyo gi weche ma ne okor gi much Nyasaye komedo pako Nyasaye kama: “Osetimo gik madongo gi bade; osekeyo joma nigi kido mar ng’awruok e chunygi. Osegolo joma nigi teko a e kombegi mag loch, kendo oseting’o malo joma ngimagi ni piny; oseyieng’o chuth joma kech kayo gi gik mabeyo kendo oseriembo joma ne nigi mwandu mi gia gi lwetgi nono. Osekonyo Israel jatichne kuom paro kechne mana kaka nosingo ne kwerewa, ne Ibrahim kod kothe nyaka chieng’.”—Luka 1:51-55.

​Maria dak gi Elizabeth kuom dweche adek kama, kendo nenore ni okonyo Elizabeth ma koro chiegni nyuol. Donge en mor ndi neno kaka mon ariyogi, ma gin mon moluoro Nyasaye kendo ma omako ich kuom teko mar Nyasaye konyore kanyachiel?

Ne ane kaka imiyo Yesu duong’ kata ka pok onyuole. Elizabeth luonge ni “Ruodha,” kendo nyathi ma ni e iye ‘tugo gi ilo’ sama Maria ochopo achopa ire ni i. Mano opogore ahinya gi kaka jomamoko biro timo ne Maria kaachiel gi nyathine ma pok onyuolno mana kaka wabiro neno bang’e.