Yesu Dongo Nazareth

Yesu dongo e taon moro matin miluongo ni Nazareth. Taondni yudore malo nyandwat, e gweng’ motimo gode e alwora mar Galili, man yo podho chieng’ mar nam miluongo ni Nam Galili.

Nyalo bedo ni Josef gi Maria nowuok Misri ka gibiro kanyo ka Yesu en jahigni ariyo. Nenore ni gie kindeno, Yesu e nyathi kende ma ne gin-go. Kata kamano, bang’e ginyuolo owetene ma gin, Jakobo, Josef, Simon, kod Judas. Josef kod Maria nyuolo bende nyiri ma nyimine Yesu. Adiera en ni Yesu nigi owetene kod nyiminene ma ok tin ne auchiel.

En adier ni Yesu nigi wedene mamoko. Waseng’eyo watne ma Elizabeth kod Johana wuod Elizabeth. Odak Judea ma en kilomita mang’eny yo milambo. Watgi ma gidakgo machiegni e alwora mar Galili en Salome, ma nenore ni en nyamin Maria. Chwor Salome iluongo ni Zebedi. Nenore ni yawuotgi ariyo, Jakobo kod Johana gin kaka owete Yesu. Ok wang’eyo kabe Yesu nokawo thuolo mang’eny mar bedo gi yawuowigo e kinde ma ne gidongo, kata kamano gikone gibedo osiepene machiegni ahinya, kendo gitiyo kaka joote Yesu.

Chuno Josef mondo oti matek ahinya eka orit joode ma kwan-gi medo dongo. En fundi bao. Josef pidho Yesu mana kaka wuode owuon, omiyo ji luongo Yesu ni ‘wuod fundi bao.’ (Mathayo 13:55) Josef puonjo Yesu mondo en bende obed fundi bao, kendo Yesu ng’eyo tijno maber. Mano e momiyo bang’e ji nowacho e wi Yesu kama: “Jali en fundi bao.”​—Mariko 6:3.

Jood Josef oketo weche motudore gi lamo Jehova e ma obed motelo e ngimagi. Nikech Josef kod Maria luwo Chik Nyasaye, gipuonjo nyithindgi weche Nyasaye ‘ka gibedo e ot, ka giwuotho e yo, ka gidhi nindo, kendo ka gia malo.’ (Rapar mar Chik 6:6-9) Nitiere sunagogi e taon mar Nazareth. Wanyalo bedo gadier ni Josef jadhi lemo kuno kanyachiel gi joode ma ok gibare. Bang’e iwachonwa ni ‘ka luwore gi kaka Yesu ne jatimo chieng’ Sabato,’ ne odhi e sunagogi. (Luka 4:16) Jood Josef duto bende mor gi chenro mar dhi e hakalu mar Jehova man Jerusalem ma ok gibare.