Puonj e Wi Weyo ne Ji Richo

Ji rwako puonj mag Yesu e yore mopogore opogore ka luwore gi kaka chunygi chalo. Mano nenore maler sama Yesu ni Galili e ot moro. Ja-Farisai miluongo ni Simon e ma ogwelo Yesu mondo odhi ochiem e ode koparo ni mano dhi konye ng’eyo e yo matut jal ma timo tije madongo kamago. To nikech nyalo bedo ni Yesu neno ni mano en thuolo mar yalo ne ji, oyie dhi e od Simon mana kaka kinde moko bende noseyie chiemo gi josol osuru kod joricho.

Kata kamano, jogo ok dhial Yesu kaka pile itimoga ne welo. Nikech nderni mag Palestina gin mag lowo, pile tiende jowuoth pong’ga gi buru. Omiyo, jo alworano ong’iyoga lwoko ne welo tiendegi. Kata kamano, Yesu to ok olwokne tiendene. Bende, ok nyodhe kaka itimoga ne welo. Gima chielo ma bende itimoga ne welo en olo mo e wigi kinyisogo kaka ohergi. Mae bende ok otim ne Yesu. To kare orwake nade?

Welo bet e mesa kae to ji chako chiemo. Sama gichiemo, dhako moro ma ok ne ogwel e gagono donjo kanyo. Dhakono “ong’ere e taondno kaka jaricho.” (Luka 7:37) En adier ni dhano duto gin joricho. Kata kamano, dhakono to nenore ni odak e ngima mar anjawo. Nyalo bedo ni en dhako ma ndhaga, tiende ni ng’ama tiyo tij terruok mondo oyudgo pesa. Nenore ni osewinjo puonj mag Yesu, moriwo nyaka gima nowacho ni, biuru “un duto mujony kendo ma ting’ turou, to anamiu yueyo.” (Mathayo 11:28, 29) Chal ni obiro manyo Yesu nikech osewinjo humb gik ma Yesu timo kendo puonjo.

Odhi yo ka ng’e Yesu kae to ogoyo chonge piny but tiend Yesu. Pi wang’e chuer ka lwar e tiende Yesu kae to oyweyogi gi yie wiye. Onyodho tiende Yesu kae to ooloe mo mobirogo ma nigi suya mamitno. Simon ok mor gi gima dhakono otimo. Owacho e chunye kama: “Ka da bed ni ng’atni en janabi adier, da ong’eyo ni dhako momuleno en dhako manade, ni en jaricho.”—Luka 7:39.

Nikech Yesu ong’eyo paro ma Simon nigo, Yesu wachone niya: “Simon, an gi wach moro ma adwaro wachoni.” Simon dwoko kama: “Japuonj, wachnago!” Yesu medo wachone niya: “Nitie ji ariyo ma ne nigi gop jaholo moro; achiel ne nigi gowi mar dinari 500, to machielo dinari 50. Kane gionge gi gima digichulego, noweyonegi giduto ma onge wach moro. Kuom mano, en ng’ano kuomgi ma biro here moloyo?” Simon dwoko gi chuny ma nenore ni ng’ichng’ich kama: “Aparo ni en jalno ma noweyone gowi mang’eny.”​—Luka 7:40-43.

Yesu yie gi dwokoneno. Ong’iyo dhakono kae to owacho ne Simon niya: “Ineno dhakoni? Sama nende adonjo e odi, ne ok imiya pi mar lwoko tiendena. To dhakoni osetono pi wang’e e tiendena kendo oseyweyogi gi yie wiye. In ne ok inyodha, to dhakoni, chakre sama nende adonjo ka, pok oweyo nyodho tiendena.” Yesu ne nyalo neno ni dhakoni osetimo gima nyiso ni oloko chunye kendo oweyo ngimane mar anjawo. Omiyo, otieko kowacho kama: “Awachoni ni, kata obedo ni richone ng’eny, osewene nikech herane mogundho. To ng’at ma iwene manok, e ma herane nok.”​—Luka 7:44-47.

Mano ok nyis ni Yesu oyie gi timbe anjawo. Kar mano, onyiso ni okecho joma otimo richo madongo to ginyiso ni giloko chunygi gadier kae to gidhi ire mondo okonygi. To mano kaka chuny dhakono yudo yueyo sama Yesu wachone kama: “Richoni oweni. . . . Yieni oseresi; dhi gi kuwe.”​—Luka 7:48, 50.