Bedo Japuonjre Yesu En Ting’ Monego Okaw Mapek

Yesu osechiwo puonj ma konyo jowinjone ahinya sama en e od jatelo moro mar Jo-Farisai. Sama Yesu pod nie wuoth kochomo Jerusalem, oganda mang’ongo wuotho kode. Nikech ang’o? Be dibed ni giikore bedo jolup Yesu gadier, ka gikawo ting’ ma dwarore kuom jolupne, bed ni tek kata yot?

Sama gidhi nyime gi wuoth, Yesu wachonegi gima nyalo bedo ni bwogo moko kuomgi. Owachonegi kama: “Ka ng’ato biro ira to ok osin gi wuon-gi, gi min-gi, gi chiege, gi nyithinde, gi owetene, kod nyiminene, ee, to kata mana gi ngimane owuon, ok onyal bedo japuonjrena.” (Luka 14:26) Wach ma Yesu wachono tiende ang’o?

Yesu ok tem wacho ni ji duto ma bedo jolupne nyaka sin gi wedegi. To tiend gima owacho en ni jolupne onego ohere moloyo okang’ ma giherogo wedegi. Ok onego gibed kaka ng’at ma notamore dhi e nyasi mar chiemo modhiambo ma Yesu nowuoyoe e ranyisi ma nochiwo mana nikech oa kendo. (Luka 14:20) Muma wacho ni Jakobo ma en kwar Jo-Yahudi ne ohero Rahel to ne ‘osin’ gi Lea. Tiend mano en ni nohero Rahel moloyo kaka nohero Lea nyamin-gi.​—Chakruok 29:31.

Ne ni Yesu wacho ni japuonjrene onego osin “kata mana gi ngimane owuon.” Mano tiende ni japuonjre madier nyaka her Yesu moloyo ngimane owuon, koikore kata mana tho ka mano dwarore. Nenore maler ni bedo japuonjre Kristo en ting’ monego okaw mapek. Ng’ato ok onego okaw ting’no gi tugo, to onego opar kuome matut.

Bedo japuonjre Yesu nyalo kelo pek moko kod sand, nimar Yesu wacho kama: “Ng’at ma ok ting’ yadh-sandne kendo luwa, ok onyal bedo japuonjrena.” (Luka 14:27) Ee, japuonjre madier mar Yesu nyaka ikre yudo akwede kod sand ma Yesu bende noyudo. Yesu owuon oseketo ranyisi konyiso ni kata mana en bende obiro tho e lwet jowasike.

Omiyo, oganda ma wuotho kod Yesu onego opar matut e wi ting’ ma bedo japuonjre Kristo kelo. Yesu jiwo wachno kotiyo gi ranyisi moro. Owachonegi kama: “Kuom ranyisi, en ng’a kuomu ma ka dwaro gero ot ma rabora ok obi bet piny mondi kendo kwano nengo mondo one ka en-gi gima orome tieko odno? Nono to onyalo keto mise mar odno kae to tieke tame.” (Luka 14:28, 29) Kuom mano, onego obed ni joma wuotho kod Yesu ka gichomo Jerusalemgo oseyie kawo ting’no ka pok gikawo okang’ mar bedo jopuonjrene. Ojiwo puonjno kotiyo gi ranyisi machielo kendo.

Yesu wachonegi niya: “Ere ruoth ma ka dhi kedo e lweny gi ruoth machielo, ok obi bet piny mondi mi ong’ad paro kabe onyalo tiyo gi jolweny 10,000 ma en-go e kedo gi jal ma birone gi jolweny 20,000? Ka kuom adier ok onyal kedo kode, obiro oro joote mondo gidhi gilos kuwe gi ng’atno ka pod ng’atno ni mabor.” Mondo wach maduong’ mopuonjo owinjre malong’o, Yesu wacho kama: “E yo ma kamano, ng’euru ni onge ng’ato kuomu ma nyalo bedo japuonjrena ka ok owere gi gik moko duto ma en-go.”​—Luka 14:31-33.

En adier ni Yesu ok wach wechego mana ne oganda ma luwe ka gidhi Jerusalemgo. Jogo duto ma puonjore e wi Kristo nyaka ikre timo kaka osewacho kae. Mano dwaro ni giikre weyo gik moko duto ma gin-go moriwo nyaka ngimagi, eka gibed jopuonjrene. Mano en wach ma ng’ato onego opar matut kendo oket e lamo bende.

Koro Yesu chako wach moro ma nosewuoyoe e Twak ma ne ogolo e Got. Ne owacho ni jopuonjrene “e chumbi mar piny.” (Mathayo 5:13) Nenore ni notemo nyiso ni kaka chumbi masie itiyogo e kano gimoro kik kethre, jopuonjrene bende nigi nyalo mar rito ji mondo winjruokgi gi Nyasaye kik kethre, kendo miyo kik gibed gi timbe maricho. Koro giko mar migawone e piny kae okayo machiegni. Omiyo, Yesu wacho niya: “Kuom adier, chumbi ber. To ka chumbi olalo ndhadhu, ibiro ti kode e twono ang’o?” (Luka 14:34) Jowinjone ong’eyo ni moko kuom chumbi ma ndalono ne ochido kendo ne gikikore gi gik moko kaka lowo. Omiyo, chumbi ma kamago ne ok nyal konyo ahinya.

Kuom mano, Yesu nyiso ni kata mana joma osebedo jopuonjrene kuom kinde mogwaro nyaka ked matek mondo kik giol kata miyo chilo mag piny onjawgi. Kapo ni mano nyalo timorenegi, gibiro bedo joma nono mana kaka chumbi molalo ndhathe. Mano nyalo miyo jopiny ojargi. Marach moloyo en ni ok gibi bedo joma long’o e wang’ Nyasaye, to mago duto biro miyo ji oyany kata mana nying Nyasaye. Yesu jiwo gimomiyo dwarore ni ji otang’ mondo mano kik timre. Owacho kama: “Ng’at ma nigi it ma winjo mondo owinj.”​—Luka 14:35.